പാറശാലയിൽ സ്കൂൾ വിദ്യാർത്ഥിയുടെ കൈ തല്ലിയൊടിച്ചു; സഹപാഠികൾക്കെതിരെ പൊലീസിൽ പരാതി
തിരുവനന്തപുരം: പാറശാലയിൽ സ്കൂൾ വിദ്യാർത്ഥിയുടെ കൈ തല്ലിയൊടിച്ചു. പാറശാല ജിഎച്ച്എസ്എസ് ഒൻപതാം ക്ലാസ് വിദ്യാർത്ഥി കൃഷ്ണകുമാറിനാണ് മർദ്ദനമേറ്റത്. വിദ്യാർത്ഥികൾ തമ്മിലുള്ള സംഘർഷത്തിലാണ് മർദ്ദനമെന്നാണ് പരാതി.
ഇന്നലെ വൈകീട്ട് മൂന്ന് മണിയോടെയാണ് സംഭവം. ഉച്ചയ്ക്ക് സ്കൂളിൽ വച്ച് രണ്ടുവിദ്യാർത്ഥികൾ തമ്മിൽ പ്രശ്നം ഉണ്ടായി. ക്ലാസ് ലീഡർ എന്ന നിലയിൽ കൃഷ്ണകുമാർ വിഷയത്തിൽ ഇടപെട്ടു. തുടർന്ന് ഇക്കാര്യം കൃഷ്ണകുമാർ സ്കൂൾ അധികൃതരെ അറിയിച്ചു. വൈകീട്ട് മൂന്ന് മണിയോടെ സ്കൂൾ അധികൃതരെ വിവരം അറിയിച്ചത് എന്തിനാണ് എന്ന് ചോദിച്ച് രണ്ടു വിദ്യാർത്ഥികൾ കൃഷ്ണകുമാറുമായി വാക്കുതർക്കത്തിൽ ഏർപ്പെട്ടു. വാക്കുതർക്കത്തിനിടെ കുപിതരായ സഹപാഠികൾ കൃഷ്ണകുമാറിന്റെ കൈ തല്ലിയൊടിക്കുകയും മർദ്ദിക്കുകയും ചെയ്തതായാണ് പരാതിയിൽ പറയുന്നത്.
ഉടൻ തന്നെ പാറശാല താലൂക്ക് ആശുപത്രിയിൽ കൃഷ്ണ കുമാർ ചികിത്സ തേടി. കൈ ഒടിഞ്ഞതിനെ തുടർന്ന് കുട്ടിയുടെ കൈയിൽ പ്ലാസ്റ്റർ ഇട്ടിട്ടുണ്ട്. സംഭവത്തിൽ സ്കൂൾ അധികൃതർ രണ്ടു വിദ്യാർത്ഥികൾക്കെതിരെ പാറശാല പൊലീസിൽ പരാതി നൽകിയിട്ടുണ്ട്.
