കുഞ്ഞ് ആക്‌സിലറേറ്റര്‍ തിരിച്ചു, സ്‌കൂട്ടര്‍ തുണിക്കടയ്ക്കുള്ളിലേക്ക് പാഞ്ഞുകയറി; രക്ഷപെട്ടത് തലനാരിഴയ്ക്ക്
ഹരിപ്പാട്: നിയന്ത്രണംവിട്ട സ്‌കൂട്ടര്‍ അമിതവേഗത്തില്‍ കടയ്ക്കുള്ളിലേക്ക് ഇടിച്ചുകയറി അപകടം. ഹരിപ്പാട് ഇന്നലെ ഉച്ചയോടെയാണ് അപകടം ഉണ്ടായത്. അപകടത്തില്‍ ആര്‍ക്കും പരിക്കേറ്റിട്ടില്ല. അപകടത്തിന്റെ സിസിടിവി ദൃശ്യങ്ങള്‍ പുറത്തുവന്നിട്ടുണ്ട്. സ്‌കൂട്ടറില്‍ ഉണ്ടായിരുന്ന കുഞ്ഞ് ആക്‌സിലറേറ്ററില്‍ പിടിച്ച് തിരിച്ചതാണ് അപകടകാരണമായത്. ജീവനക്കാരും സാധനം വാങ്ങാനെത്തിയവരും ഉള്‍പ്പടെ നിരവധിപേര്‍ അപകടസമയം കടയ്ക്കുള്ളില്‍ ഉണ്ടായിരുന്നു എങ്കിലും ആര്‍ക്കും പരിക്കേറ്റില്ല.ഇരുചക്രവാഹനത്തില്‍ യുവാവും ഭാര്യയും കുഞ്ഞുമാണ് ഉണ്ടായിരുന്നത്. തുണിത്തരങ്ങള്‍ വാങ്ങാനെത്തിയ ഇവര്‍ ജംഗ്ഷനിലെ ഫിദ ടെക്സ്‌റ്റൈലിനുമുന്നില്‍ സ്‌കൂട്ടര്‍ നിറുത്തി. യുവാവും കുഞ്ഞും സ്‌കൂട്ടറില്‍ ഇരിക്കെ യുവതി ഇറങ്ങി […]
ഹരിപ്പാട്: നിയന്ത്രണംവിട്ട സ്‌കൂട്ടര്‍ അമിതവേഗത്തില്‍ കടയ്ക്കുള്ളിലേക്ക് ഇടിച്ചുകയറി അപകടം. ഹരിപ്പാട് ഇന്നലെ ഉച്ചയോടെയാണ് അപകടം ഉണ്ടായത്. അപകടത്തില്‍ ആര്‍ക്കും പരിക്കേറ്റിട്ടില്ല. അപകടത്തിന്റെ സിസിടിവി ദൃശ്യങ്ങള്‍ പുറത്തുവന്നിട്ടുണ്ട്. സ്‌കൂട്ടറില്‍ ഉണ്ടായിരുന്ന കുഞ്ഞ് ആക്‌സിലറേറ്ററില്‍ പിടിച്ച് തിരിച്ചതാണ് അപകടകാരണമായത്. ജീവനക്കാരും സാധനം വാങ്ങാനെത്തിയവരും ഉള്‍പ്പടെ നിരവധിപേര്‍ അപകടസമയം കടയ്ക്കുള്ളില്‍ ഉണ്ടായിരുന്നു എങ്കിലും ആര്‍ക്കും പരിക്കേറ്റില്ല.ഇരുചക്രവാഹനത്തില്‍ യുവാവും ഭാര്യയും കുഞ്ഞുമാണ് ഉണ്ടായിരുന്നത്.
തുണിത്തരങ്ങള്‍ വാങ്ങാനെത്തിയ ഇവര്‍ ജംഗ്ഷനിലെ ഫിദ ടെക്സ്‌റ്റൈലിനുമുന്നില്‍ സ്‌കൂട്ടര്‍ നിറുത്തി. യുവാവും കുഞ്ഞും സ്‌കൂട്ടറില്‍ ഇരിക്കെ യുവതി ഇറങ്ങി സാധനങ്ങള്‍ നോക്കാനായി കടയിലേക്ക് കയറി. ഇതിനിടെ കുഞ്ഞ് ആക്‌സിലറേറ്ററില്‍ പിടിച്ചുതിരിച്ചു. പൊടുന്നനെ അമിതവേഗത്തില്‍ മുന്നോട്ടുനീങ്ങിയ സ്‌കൂട്ടര്‍ കടയിലേക്ക് കയറുകയായിരുന്ന ഭാര്യയെയും ഇടിച്ചിട്ടുകൊണ്ട് കടയ്ക്കുള്ളിലേക്ക് പാഞ്ഞുകയറുകയായിരുന്നു.
വില്‍പ്പനയ്ക്കായി കൊണ്ടുവന്ന തുണിക്കെട്ടുകളുടെ മുകളിലേക്കാണ് യുവതി വീണതും സ്‌കൂട്ടര്‍ ഇടിച്ചുനിന്നതും. അതിനാല്‍ ആര്‍ക്കും പരിക്കേറ്റില്ല.അപകടം നടക്കുമ്പോള്‍ സാധനങ്ങള്‍ വാങ്ങാന്‍ എത്തിയവരും ജീവനക്കാരും ഉള്‍പ്പടെ നിരവധിപേര്‍ കടയ്ക്കുള്ളില്‍ ഉണ്ടായിരുന്നു. സ്‌കൂട്ടര്‍ പാഞ്ഞുവരുന്നത് കണ്ട് ചിലര്‍ ഉച്ചത്തില്‍ നിലവിളിക്കുന്നതും സിസിടിവി ദൃശ്യങ്ങളില്‍ വ്യക്തമാണ്.
അപകടത്തില്‍ കടയ്ക്ക് കാര്യമായ കേടുപാടുകളുണ്ടായിട്ടുണ്ടോ എന്നും പൊലീസ് കേസെടുത്തിട്ടുണ്ടോ എന്നും വ്യക്തമല്ല. സ്‌കൂട്ടറിന് മുന്നില്‍ ഇരിക്കുന്ന കുഞ്ഞുങ്ങള്‍ ആക്‌സിലറേറ്ററില്‍ പിടിച്ച് തിരിച്ചതുമൂലമുണ്ടാകുന്ന അപകടങ്ങള്‍ നേരത്തേയും റിപ്പോര്‍ട്ട് ചെയ്തിട്ടുണ്ട്.
