പെരുമണ്ണയിൽ ആക്രി കടയ്ക്ക് തീപിടിച്ചു; ഏഴ് ഫയർഫോഴ്സ് യൂണിറ്റുകൾ എത്തി തീയണച്ചു; വ്യാപക നാശനഷ്ടം; ഒഴിവായത് വൻ അപകടം

കോഴിക്കോട്: പെരുമണ്ണയിൽ ആക്രി കടയ്ക്ക് തീപിടിച്ച് വൻ അപകടം. പുലർച്ചെയാണ് സംഭവം നടന്നത്. ഒടുവിൽ കോഴിക്കോട് നിന്ന് ഫയർഫോഴ്സ് യൂണിറ്റുകൾ എത്തിയാണ് തീയണച്ചത്. പെരുമണ്ണ സ്വദേശി ഷംസീറിന്റെ ഉടമസ്ഥതയിലുള്ള ആക്രിക്കടയ്ക്കാണ് തീ പിടിച്ചത്.

സമീപത്ത് വീടുകളും ആരാധനാലയങ്ങളും ഉണ്ട്. അതിനാൽ ഉടനെ തീയണയ്ക്കാൻ നാട്ടുകാർ ശ്രമിച്ചെങ്കിലും തീ ആളിപ്പടർന്നു. തുടർന്ന് നാട്ടുകാർ അഗ്നിശമന സേനയെ അറിയിച്ചു. മൂന്ന് മണിയോടെ അഗ്നിശമനസേന സ്ഥലത്ത് എത്തി.

മീഞ്ചന്ത, ബീച്ച്, വെള്ളിമാടുകുന്ന് എന്നിവിടങ്ങളിൽ നിന്നായി ഏഴ് ഫയർഫോഴ്സ് യൂണിറ്റുകൾ എത്തിയാണ് തീയണച്ചത്. തീ പൂർണമായും നിയന്ത്രണ വിധേയമായതായി ഫയർഫോഴ്സ് അറിയിച്ചു. തീപിടുത്തത്തിന്റെ കാരണം സംബന്ധിച്ച് ഇതുവരെ വ്യക്തയില്ല.