അനധികൃതമായി മദ്യവിൽപ്പന നടക്കുന്നതായി രഹസ്യവിവരം; പരിശോധനയിൽ കണ്ടെടുത്തത് രഹസ്യ അറയിൽ സൂക്ഷിച്ചിരുന്ന 25.5 ലിറ്റർ 'ജവാൻ'; പിടിയിലായത് ചന്തക്കുന്നുകാരൻ നൗഷാദ്

തിരുവനന്തപുരം: രഹസ്യവിവരത്തിന്റെ അടിസ്ഥാനത്തിൽ നടത്തിയ പരിശോധനയിൽ തെരഞ്ഞെടുപ്പിന്റെ മുന്നോടിയായുള്ള ഡ്രൈ ഡേ ലക്ഷ്യമിട്ട് അനധികൃതമായി മദ്യവിൽപ്പന നടത്തിയയാൾ എക്സൈസിന്റെ പിടിയിൽ. പാങ്ങോട് ചന്തക്കുന്ന് സ്വദേശി നൗഷാദ് (51) ആണ് വാമനപുരം എക്സൈസിന്റെ പിടിയിലായത്. വീട്ടിലെ രഹസ്യ അറയിൽനിന്ന്‌ അനധികൃത വിൽപ്പനയ്ക്കായി സൂക്ഷിച്ചിരുന്ന 25.5 ലിറ്റർ ജവാൻ ബ്രാൻ്റ് ഉൾപ്പെട്ട ഇന്ത്യൻ നിർമിത വിദേശമദ്യമാണ് പിടികൂടിയത്.

വാമനപുരം എക്സൈസ് ഇൻസ്പെക്ടർ ശ്രാവൺ സി.എസിന്റെ നേതൃത്വത്തിൽ നടത്തിയ പരിശോധനയിലാണ് മദ്യം കണ്ടെത്തിയത്. ക്രിമിനൽ കേസുകളിലും അബ്കാരി കേസുകളിലും ശിക്ഷയനുഭവിച്ചയാളാണ് പിടിയിലായ നൗഷാദ്. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.