കുളിക്കുന്നതിനിടെ കാൽ വഴുതി പുഴയിലേക്ക്; ഭാരതപ്പുഴയിൽ ഒഴുക്കിൽപെട്ടു വിദ്യാർത്ഥികളിൽ ഒരാളെ രക്ഷപ്പെടുത്തി; ഒരാൾക്കായി തിരച്ചിൽ

പാലക്കാട്: കോട്ടായി മുട്ടിക്കടവിൽ ഭാരതപ്പുഴയിൽ കുളിക്കാനിറങ്ങിയ രണ്ട് വിദ്യാർത്ഥികളിൽ ഒരാളെ കാണാതായി. മാത്തൂർ ചുങ്കമന്ദം സ്വദേശികളായ 18 വയസ്സുള്ള രണ്ട് വിദ്യാർത്ഥികളാണ് ഉച്ചയോടെ പുഴയിൽ ഒഴുക്കിൽപ്പെട്ടത്. ഒരാളെ രക്ഷപ്പെടുത്തി ജില്ലാ ആശുപത്രിയിൽ പ്രവേശിപ്പിച്ചു. കോട്ടായി സ്വദേശിയായ അഭിജിത്തിനെയാണ് രക്ഷപ്പെടുത്തിയത്. കുന്നംപറമ്പ് തണ്ണിക്കോട് താമസിക്കുന്ന സവിതയുടെ മകൻ സുഗുണേഷ് (18) ആണ് കാണാതായതെന്ന് തിരിച്ചറിഞ്ഞിട്ടുണ്ട്.

ഇന്ന് ഉച്ചയ്ക്ക് 12.30 ഓടെയാണ് സംഭവം.പുഴയിൽ കുളിക്കുന്നതിനിടെ കാൽ വഴുതി ഇരുവരും പുഴയിലേക്ക് വീഴുകയായിരുന്നു. കുട്ടികളുടെ നിലവിളി കേട്ട് സമീപവാസികൾ ഓടിക്കൂടുകയായിരുന്നു. തുടർന്ന് കോട്ടായി പോലീസ് സ്ഥലത്തെത്തി. അഗ്നി രക്ഷാസേനയുടെ മുങ്ങൽ വിദഗ്ധരുൾപ്പെടെയുള്ള സംഘം തിരച്ചിൽ ആരംഭിച്ചു. ആലത്തൂർ നിന്നുള്ള ഫയർഫോഴ്സ് സംഘവും രക്ഷാപ്രവർത്തനത്തിൽ സജീവമായിട്ടുണ്ട്.