എതിര്‍ ദിശകളില്‍ നിന്ന് വന്ന സ്വകാര്യ ബസുകള്‍ തമ്മിൽ ഉരസി; കൈ ബസുകള്‍ക്കിടയിൽ പെട്ട് എട്ടാം ക്ലാസ് വിദ്യാര്‍ത്ഥിയുടെ വിരല്‍ നഷ്ടമായി

തിരൂർ: സ്വകാര്യ ബസുകൾക്കിടയിൽ കൈ പെട്ട് എട്ടാം ക്ലാസ് വിദ്യാർത്ഥിയുടെ വിരൽ അറ്റു. മലപ്പുറം തിരൂരിൽ പറവണ്ണ മുറിവഴിക്കൽ ആണ് അപകടം നടന്നത്. നിറമരുതൂർ ഗവ: ഹയർ സെക്കൻഡറി സ്കൂളിലെ വിദ്യാർത്ഥിയായ ഷഹനാസിനാണ് അപകടത്തിൽ വിരൽ നഷ്ടമായത്. വാക്കാട് സ്വദേശിയാണ് ഷഹനാസ്.

രാവിലെ സ്കൂളിലേക്ക് പോകുന്നതിനിടെയാണ് സംഭവം. ഷഹനാസ് സഞ്ചരിച്ചിരുന്ന സ്വകാര്യ ബസ്സും എതിർ ദിശയിൽ നിന്ന് വന്ന മറ്റൊരു ബസ്സും തമ്മിൽ ഉരസുകയായിരുന്നു. ബസ്സിൻ്റെ ഒരു വശത്തെ കമ്പിയിൽ പിടിച്ച് നിന്നിരുന്ന ഷഹനാസിൻ്റെ കൈ രണ്ട് ബസ്സുകൾക്കിടയിൽ കുടുങ്ങുകയായിരുന്നു.

അപകടത്തിൽ പരിക്കേറ്റ ഷഹനാസിന് തിരൂർ ജില്ലാ ആശുപത്രിയിൽ പ്രാഥമിക ചികിത്സ നൽകി. തുടർന്ന് കോഴിക്കോട് മെഡിക്കൽ കോളേജ് ആശുപത്രിയിലും പിന്നീട് കോഴിക്കോട്ടെ ഒരു സ്വകാര്യ ആശുപത്രിയിലും എത്തിച്ചെങ്കിലും നഷ്ടപ്പെട്ട വിരൽ തുന്നിച്ചേർക്കാൻ സാധിച്ചില്ല. മറ്റ് നാല് വിരലുകൾക്കും സാരമായി പരിക്കേറ്റിട്ടുണ്ട്.