തനിക്ക് കിട്ടിയ റേഷൻ വാങ്ങിയ ശേഷം വീണ്ടുമെത്തി കൂടുതൽ സാധനങ്ങൾ ആവശ്യപ്പെട്ടു; പിന്നാലെ ആക്രമിച്ച് അരിയും ആട്ടയും എടുത്ത് കൊണ്ടോടി; പ്രതി അറസ്റ്റിൽ; ഇവന് ഇത് എന്തുപറ്റിയെന്ന് നാട്ടുകാർ..!

മലപ്പുറം: മിനി എസ്റ്റേറ്റിലെ റേഷൻ കടയിൽ അതിക്രമിച്ചു കയറി കടയുടമയെ ദേഹോപദ്രവമേൽപ്പിക്കുകയും റേഷൻ സാധനങ്ങൾ കവർന്ന കേസിലും പ്രതി അറസ്റ്റിൽ. കൊണ്ടോട്ടി പള്ളിക്കൽ ബസാർ ചാലക്കൽപുരായിലാണ് സംഭവം നടന്നത്. മിനി എസ്റ്റേറ്റ് പാലംകുളങ്ങര ഹരീഷ് (46) ആണ് പിടിയിലായത്.

റേഷൻ കടയിൽ അനുവദിച്ച ഭക്ഷ്യ സാധനങ്ങൾ വാങ്ങിയ ശേഷവും കടയിൽ എത്തി ഹരീഷ് കൂടുതൽ അരിയും സാധനങ്ങളും ആവശ്യപ്പെട്ടത് കടയുടമ ചോലക്കൽ ഫാസിൽ ചോദ്യം ചെയ്തപ്പോൾ കടയിൽ അതിക്രമിച്ചു കയറി ഫാസിലിനെ ദേഹോപദ്രവമേൽപ്പിച്ച് 20 കിലോഗ്രാം അരിയും ആറ് പാക്കറ്റ് ആട്ടയും ഹരീഷ് കവർന്നുവെന്നാണ് പരാതിയിൽ പറയുന്നത്.

നിരവധി കേസുകളിലുൾപ്പെട്ട ഹരീഷ് രണ്ട് വർഷം മുമ്പ് പരാതി അന്വേഷിക്കാനെത്തിയ എസ്.ഐയെ കുത്തിപ്പരിക്കേൽപ്പിച്ച കേസിൽ പ്രതിയാണെന്ന് പോലീസ് വ്യക്തമാക്കി.

അതിക്രമം നടത്തിയ ശേഷം പ്രതി ഒളിവിൽ പോവുകയും ചെയ്തു. പിന്നീട് വീട്ടിലെത്തിയിട്ടുണ്ടെന്ന വിവരത്തിന്റെ അടിസ്ഥാനത്തിലാണ് പോലീസ് സംഘം എത്തിയപ്പോൾ ഇയാൾ രക്ഷപ്പെടാൻ ശ്രമിച്ചെന്നും ഓടിച്ചിട്ടാണ് പ്രതിയെ പിടികൂടിയതെന്നും കൊണ്ടോട്ടി ഇൻസ്‌പെക്ടർ അറിയിച്ചു.