ലഹരിവിരുദ്ധ ദിനത്തിൽ സ്‌കൂളിലെ ബോധവത്ക്കരണ പരിപാടിക്ക് മദ്യപിച്ചെത്തി 'മാതൃകയായി'; രക്ഷിതാക്കളുടെ പരാതിയെ തുടർന്ന് അന്വേഷണം; ഒരു മാസത്തിന് ശേഷം ഇടുക്കിയിൽ അദ്ധ്യാപകന് സസ്‌പെൻഷൻ
ഇടുക്കി:ലഹരിവിരുദ്ധ ദിനത്തിൽ സ്‌കൂളിൽ മദ്യപിച്ചത്തിയ അദ്ധ്യാപകന് സസ്‌പെൻഷൻ.ഇടുക്കിയിൽ വാഗമണ്ണിലെ സർക്കാർ സ്‌കൂളിലാണ് സംഭവം.വാഗമൺ കോട്ടമല ഗവ. എൽ പി സ്‌കൂൾ അദ്ധ്യാപകൻ വിനോദിനെയാണ് സസ്‌പെന്റ് ചെയ്തത്.രക്ഷിതാക്കളുടെ പരാതിയെ തുടർന്ന് നടത്തിയ അന്വേഷണത്തിനൊടുവിലാണ് ഒരു മാസത്തിന് ശേഷം അദ്ധ്യാപകനെതിരെയുള്ള നടപടി.
നവംബർ 14 ന് ലഹരി വിരുദ്ധ ദിനമായി സർക്കാർ ആചരിക്കുന്നതിന്റെ ഭാഗമായി നടത്തിയ പരിപാടിക്കിടെയാണ് വിനോദ് മദ്യപിച്ചെത്തിയത് അദ്ധ്യാപകന്റെ പെരുമാറ്റത്തിൽ സംശയം തോന്നിയ മാതാപിതാക്കൾ പൊലീസിനെ അറിയിക്കുകയായിരുന്നു.തുടർന്ന് പൊലീസ് എത്തി നടത്തിയ വൈദ്യപരിശോധനയിൽ ഇയാൾ മദ്യപിച്ചതായി തെളിഞ്ഞു.മെഡിക്കൽ സർട്ടിഫിക്കറ്റും പൊലീസിന്റെ എഫ്‌ഐആറും പരിശോധിച്ച ശേഷമാണ് ഇടുക്കി ജില്ലാ വിദ്യാഭ്യാസ ഉപ ഡയറക്ടർ അന്വേഷണത്തിന് ഉത്തരവിട്ടത്.
അന്വേഷണം തുടങ്ങിയ ഉടനെ വിനോദിനെ നിർബന്ധിത ലീവിൽ പ്രവേശിപ്പിച്ചിരുന്നു.തുടർന്ന് ഒരു മാസമായിട്ടും നടപടിയില്ലാതെ വന്നതോടെ രക്ഷിതാക്കൾ പരസ്യസമരം തുടങ്ങുമെന്ന് മുന്നറിയിപ്പുമായി രംഗത്ത് വന്നതോടെയാണ് സസ്‌പെൻഷൻ ഉത്തരവിറങ്ങിയത്.തിരുവനനന്തപുരം കാഞ്ഞിരംകുളം സ്വദേശിയായ വിനോദ് കഴിഞ്ഞ ഒരു വർഷമായി കോട്ടമല സ്‌കൂളിലെ അദ്ധ്യാപകനായി പ്രവർത്തിച്ച് വരികയാണ്.
