തുലാവര്‍ഷം പിന്‍വാങ്ങി; കേരളത്തില്‍ പകല്‍ ഉയര്‍ന്ന താപനില വരും ദിവസങ്ങളിലും തുടരും; വ്യാഴാഴ്ചയോടെ മഴയും എത്തിയേക്കും
കേരളത്തില്‍ പകല്‍ ഉയര്‍ന്ന താപനില വരും ദിവസങ്ങളിലും തുടരും; വ്യാഴാഴ്ചയോടെ മഴയും എത്തിയേക്കും
തിരുവനന്തപുരം: തെക്കേ ഇന്ത്യന്‍ സംസ്ഥാനങ്ങളില്‍ നിന്ന് തുലാവര്‍ഷം പൂര്‍ണമായും പിന്‍വാങ്ങിയെന്ന് കേന്ദ്ര കാലാവസ്ഥ വകുപ്പ്. 2023 തുലാവര്‍ഷം 2024 ജനുവരി 14നും 2022 (2023 ജനുവരി 12), 2021( 2022 ജനുവരി 22) ആണ് പിന്‍വാങ്ങിയത്.
കേരളത്തില്‍ പകല്‍ ഉയര്‍ന്ന താപനില വരും ദിവസങ്ങളിലും തുടരാനാണ് സാധ്യത. ഈ മാസം അവസാനവും ഫെബ്രുവരി ആദ്യ ദിവസങ്ങളിലും ചെറിയ രീതിയില്‍ വീണ്ടും മഴക്കുള്ള സാധ്യതയുണ്ടെന്നും കാലാവസ്ഥ വകുപ്പ് അറിയിച്ചു.
ഇടക്ക് മഴ ലഭിക്കുമെന്നത് കേരളത്തിന് ചെറിയ ആശ്വാസമാകും. വ്യാഴാഴ്ചയോടെ മഴയുണ്ടായേക്കുമെന്ന സൂചനയാണ് കാലാവസ്ഥ വകുപ്പ് നല്‍കുന്നത്. വ്യാഴാഴ്ച രണ്ട് ജില്ലകളില്‍ യെല്ലോ അലര്‍ട്ട് പ്രഖ്യാപിച്ചിട്ടുണ്ട്. പത്തനംതിട്ട, ഇടുക്കി ജില്ലകളിലാണ് 30ാം തീയ്യതി
മഞ്ഞ അലര്‍ട്ട് പ്രഖ്യാപിച്ചിരിക്കുന്നത്. ഒറ്റപ്പെട്ട ശക്തമായ മഴക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറില്‍ 64.5 മില്ലിമീറ്റര്‍ മുതല്‍ 115.5 മില്ലിമീറ്റര്‍ വരെ മഴ ലഭിക്കാവുന്ന സാഹചര്യമുണ്ടെന്നാണ് കാലാവസ്ഥ വകുപ്പ് പറയുന്നത്.
