രാവിലെ ട്യൂഷന് പോകാത്തതിന് അച്ഛൻ വഴക്ക് പറഞ്ഞു; പിന്നാലെ വീടിനുള്ളിൽ ദാരുണ കാഴ്ച; ഇന്ന് എസ്എസ്എൽസി പരീക്ഷ എഴുതാനിരുന്ന വിദ്യാർത്ഥിനിയെ മരിച്ച നിലയിൽ കണ്ടെത്തി

ആലപ്പുഴ: പൂങ്കാവ് കൊച്ചീക്കാരൻ വീട്ടിൽ പത്താം ക്ലാസ് വിദ്യാർത്ഥിനിയെ വീട്ടിൽ തൂങ്ങിമരിച്ച നിലയിൽ കണ്ടെത്തി. ആലപ്പുഴ പൂങ്കാവ് സ്വദേശികളായ അജോയുടെയും കുടുംബത്തിന്റെയും മകൾ എസ്തേർ (15) ആണ് ദാരുണമായി മരണപ്പെട്ടത്. ഇന്ന് രാവിലെ ട്യൂഷന് പോകാൻ തയ്യാറാകാതിരുന്നതിനെ തുടർന്ന് അച്ഛൻ വഴക്കുപറഞ്ഞതിന് തൊട്ടുപിന്നാലെയാണ് എസ്തേറിനെ വീടിനുള്ളിൽ മരിച്ച നിലയിൽ കണ്ടെത്തുന്നത്.

എസ്എസ്എൽസി പരീക്ഷ എഴുതേണ്ടിയിരുന്ന ദിവസമാണ് ഈ അപ്രതീക്ഷിത മരണം സംഭവിച്ചത് എന്നതും സംഭവത്തിന്റെ ഗൗരവം വർദ്ധിപ്പിക്കുന്നു. ഈ അപ്രതീക്ഷിത വിയോഗം സ്കൂളിലെ സഹപാഠികളിലും പ്രദേശവാസികളിലും വലിയ ഞെട്ടലാണ് ഉളവാക്കിയിരിക്കുന്നത്. വിവരമറിഞ്ഞയുടൻ ആലപ്പുഴ സൗത്ത് പോലീസ് സ്റ്റേഷനിൽ നിന്നുള്ള ഉദ്യോഗസ്ഥർ സംഭവസ്ഥലത്തെത്തി.