കണ്ണൂര്‍ മെഡിക്കല്‍ കോളേജില്‍ ചികിത്സയിലിരിക്കെ കസ്റ്റഡിയില്‍ നിന്നും രക്ഷപ്പെട്ട കുപ്രസിദ്ധ മോഷ്ടാവ് തീവെട്ടി ബാബു അറസ്റ്റില്‍; പിടികൂടിയത് ഉച്ചയോടെ ഏമ്പേറ്റ് ഗ്രൗണ്ടിന് സമീപം വെച്ച്
കുപ്രസിദ്ധ മോഷ്ടാവ് തീവെട്ടി ബാബു അറസ്റ്റില്‍
കണ്ണൂര്‍: പരിയാരത്തെ കണ്ണൂര്‍ മെഡിക്കല്‍ കോളേജാശുപത്രിയില്‍ ചികിത്സയിലിരിക്കെ മ രക്ഷപ്പെട്ട കുപ്രസിദ്ധ മോഷ്ടാവ് മണിക്കൂറുകള്‍ക്കുള്ളില്‍ പൊലിസ് പിടിയില്‍. കൊല്ലം സ്വദേശി തീവെട്ടി ബാബു (60) വാണ് ഇന്ന് ഉച്ചയോടെ ഏമ്പേറ്റ് ഗ്രൗണ്ടിന് സമീപം വെച്ചു പൊലിസ് പിടിയിലായത്.
ഇന്ന് രാവിലെ 10.15 നാണ് ഇയാള്‍ മെഡിക്കല്‍ കോളേജാശുപത്രിയിലെ വാര്‍ഡില്‍ നിന്നും പാറാവു നിന്ന പൊലിസുകാരുടെ കണ്ണ് വെട്ടിച്ച് രക്ഷപ്പെട്ടത്. പയ്യന്നൂര്‍ പോലീസ് സ്റ്റേഷന്‍ പരിധിയില്‍ മോഷണകേസില്‍ പ്രതിയായ ഇയാള്‍ പരിയാരത്തെ കണ്ണൂര്‍മെഡിക്കല്‍ കോളേജില്‍ ചികിത്സയില്‍ ഇരിക്കെയാണ് കസ്റ്റഡിയില്‍ നിന്നും രക്ഷപ്പെട്ടത്. പൊലിസ് നടത്തിയ പരിശോധനയിലാണ് ഏമ്പേറ്റില്‍ നിന്നും പ്രതി മണിക്കൂറുകള്‍ക്കുള്ളില്‍ പിടിയിലായത്.
നിരവധി മോഷണ കേസിലെ പ്രതിയാണ് തീവെട്ടി ബാബു' ജയിലില്‍ കഴിയവെ അസുഖ ബാധിതനായതിനെ തുടര്‍ന്നാണ് ഇയാളെ കഴിഞ്ഞ ദിവസം മെഡിക്കല്‍ കോളേജാശുപത്രിയില്‍ പ്രവേശിപ്പിച്ചത്. പ്രതിയെ കോടതിയില്‍ ഹാജരാക്കുമെന്ന് പൊലിസ് അറിയിച്ചു. നിരവധി വീടുകളിലും കടകളിലും മോഷണം നടത്തി കേസിലെ പ്രതിയാണ് തീവെട്ടി ബാബു.
