ചെമ്പും പിച്ചളയും മോഷ്ടിച്ച കേസില്‍ റിമാന്‍ഡ് ചെയ്യപ്പെട്ട ബംഗാള്‍ സ്വദേശികളായ രണ്ട് പ്രതികള്‍ പോലീസിനെ വെട്ടിച്ച് രക്ഷപ്പെട്ടു; ഒരാളെ പിടികൂടി; മറ്റൊരാള്‍ക്കായി പോലീസ് തിരച്ചില്‍ തുടരുന്നു; രക്ഷപെട്ടത് കോടതിവളപ്പില്‍ നിന്ന്
മൂവാറ്റുപുഴ: മൂവാറ്റുപുഴയില്‍ കസ്റ്റഡിയില്‍ നിന്നും രണ്ടു പ്രതികള്‍ പൊലീസിനെ വെട്ടിച്ച് രക്ഷപ്പെട്ടു. ചെമ്പും പിച്ചളയും മോഷ്ടിച്ച കേസില്‍ റിമാന്‍ഡ് ചെയ്യപ്പെട്ട ബംഗാള്‍ സ്വദേശികളായ രണ്ട് യുവാക്കളാണ് മൂവാറ്റുപുഴ കോടതിവളപ്പില്‍ നിന്ന് ഓടിരക്ഷപ്പെട്ടത്. വാഴക്കുളം പൊലീസ് പിടികൂടിയിരുന്ന ശ്രീമന്ദ് മണ്ഡല്‍ (22), സനത് മണ്ഡല്‍ (22) എന്നിവരെ സബ്ജയിലിലേക്ക് കൊണ്ടുപോകാനിരിക്കെ, വൈകിട്ട് ആറരയോടെയാണ് ഇരുവരും പൊലീസ് ജീപ്പില്‍ കയറ്റുന്നതിനിടെ പെട്ടെന്ന് ചാടിപ്പോയത്.
ഒരാളെ, ശ്രീമന്ദ് മണ്ഡലിനെ, മണിക്കൂറുകള്‍ക്കുശേഷം വെള്ളൂര്‍ക്കുന്നം മേള ഓഡിറ്റോറിയത്തിന് സമീപത്ത് നിന്നും പിടികൂടി. മറ്റെയാള്‍ സനത് മണ്ഡലിനായുള്ള തിരച്ചില്‍ തുടരുകയാണ്. മൂവാറ്റുപുഴയും വാഴക്കുളം പൊലീസും സംയുക്തമായി അന്വേഷണം നടത്തുകയാണ്.
ഒക്ടോബര്‍ 15-നാണ് പ്രതികള്‍ വാഴക്കുളം ടൗണിലെ ഒരു പഴയ ലോഹ വ്യാപാരസ്ഥാപനത്തിന്റെ മേല്‍ക്കൂര മുറിച്ചുകയറി ഏകദേശം ഒന്നര ലക്ഷം രൂപ വിലവരുന്ന 200 കിലോ ചെമ്പ് കോയിലുകളും പിച്ചളയും മോഷ്ടിച്ചത്. വാഴക്കുളം സബ് ഇന്‍സ്പെക്ടര്‍ എസ്.എന്‍. സുമിതയുടെ നേതൃത്വത്തിലുള്ള സംഘം ഇവരെ മുമ്പ് മൂവാറ്റുപുഴയില്‍ നിന്ന് പിടികൂടിയതായിരുന്നു.
