കൊല്ലം: ചടയമംഗലത്തെ മൊബൈൽ ഷോപ്പിൽ അതിക്രമിച്ചു കടന്ന് അമ്പതോളം മൊബൈൽ ഫോണുകളും മൂന്ന് ലാപ്ടോപ്പുകളും മോഷ്ടിച്ച കേസിൽ എൻജിനീയറിങ് വിദ്യാർഥിയടക്കം മൂന്നുപേരെ പോലീസ് അറസ്റ്റ് ചെയ്തു. ഓഗസ്റ്റ് ഒന്നിന് പുലർച്ചെയാണ് സംഭവം നടന്നത്. കേസിലെ പ്രധാന പ്രതിയായ ജസീം എന്നയാളെ കണ്ടെത്താനുള്ള തിരച്ചിൽ തുടരുകയാണ്.

കല്ലമ്പലം സ്വദേശികളായ അൽ അമീൻ, മുഹമ്മദ് ആഷിക്, എൻജിനീയറിങ് വിദ്യാർഥിയായ മുഹമ്മദ് ഇർഫാൻ എന്നിവരാണ് അറസ്റ്റിലായത്. ചടയമംഗലത്തെ മൊബൈൽ ഷോപ്പിന്റെ പിൻഭാഗം തകർത്ത് കവർച്ച നടത്തിയ സംഘത്തിൽ ഇവരുണ്ടായിരുന്നു. മോഷ്ടിച്ച മൊബൈൽ ഫോണുകളും ലാപ്ടോപ്പുകളും ജസീമിന്റെ ഉടമസ്ഥതയിലുള്ള കല്ലമ്പലത്തെ പഞ്ചർ കടയിൽ നിന്ന് പോലീസ് കണ്ടെടുത്തു.

പ്രധാന പ്രതിയായ ജസീമും അൽ അമീനും ചേർന്ന് ഷോപ്പിനുള്ളിൽ കടന്ന് മോഷണം നടത്തുകയും, മോഷ്ടിച്ച സാധനങ്ങൾ പുറത്ത് കാറിൽ കാത്തുനിന്ന സഹായികൾക്ക് കൈമാറുകയും ചെയ്തതായി പോലീസ് കണ്ടെത്തി. സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണമാണ് പ്രതികളെ വലയിലാക്കാൻ സഹായിച്ചത്. ഒളിവിൽ പോയ ജസീമിനെ പിടികൂടാനുള്ള തിരച്ചിൽ പോലീസ് ഊർജിതമാക്കിയിട്ടുണ്ട്. ഈ കേസിൽ മറ്റ് പ്രതികളുണ്ടോ എന്ന് കണ്ടെത്താനും അന്വേഷണം പുരോഗമിക്കുന്നു.

ചടയമംഗലംമോഷണംപ്രതികൾ പിടിയിൽ

സ്വന്തം ലേഖകൻ