ആളില്ലാത്ത വീട്ടിലെ സിസിടിവി ക്യാമറ നീക്കം ചെയ്ത് മോഷണം; രണ്ട് വീടുകളില്‍ നിന്നായി 14 പവന്‍ കവര്‍ന്നു
ആളില്ലാത്ത വീട്ടിലെ സിസിടിവി ക്യാമറ നീക്കം ചെയ്ത് മോഷണം; രണ്ട് വീടുകളില്‍ നിന്നായി 14 പവന്‍ കവര്‍ന്നു
കൊല്ലം: അഞ്ചല്‍ കുരുവിക്കോണത്ത് ആളില്ലാത്ത വീടുകളില്‍ മോഷണം. രണ്ട് വീടുകളില്‍ നിന്നായി 14 പവന്‍ സ്വര്‍ണം കവര്‍ന്നു. വീട്ടിലെ നിരീക്ഷണ ക്യാമറകളുടെ ഹാര്‍ഡ് ഡിസ്‌കുകള്‍ നീക്കം ചെയ്താണ് കള്ളന്മാര്‍ മോഷണം നടത്തിയത്. സമീപത്തുള്ള മറ്റ് സിസിടിവി ക്യാമറകള്‍ കേന്ദ്രീകരിച്ച് പൊലീസ് അന്വേഷണം തുടങ്ങി.
അഞ്ചല്‍ കുരുവിക്കോണം കളപ്പുരക്കല്‍ സണ്ണി ജോര്‍ജിന്റെ വീട്ടില്‍ നിന്ന് 13 പവന്‍ സ്വര്‍ണ്ണമാണ് കവര്‍ന്നത്. എല്ലാ മുറികളിലെയും അലമാരകള്‍ കുത്തിത്തുറന്നു. സാധനങ്ങള്‍ എല്ലാം വലിച്ചു വാരിയിട്ട നിലയിലാണ്. മോഷണ ദൃശ്യം ലഭിക്കാതിരിക്കാന്‍ വീട്ടിലെ സിസിടിവികളുടെ ഹാര്‍ഡ് ഡിസ്‌കുകളും മോഷ്ടിച്ചു കൊണ്ടു പോയി. വീട്ടുടമസ്ഥന്‍ വിദേശത്താണ്. ക്യാമറ ദൃശ്യങ്ങള്‍ കിട്ടാത്തതിനെ തുടര്‍ന്ന് സമീപത്തെ വീട്ടില്‍ വിളിച്ചു പറഞ്ഞ് അന്വേഷിച്ചപ്പോഴാണ് മോഷണ വിവരം അറിയുന്നത്.
സമീപത്തു തന്നെയുള്ള രാജമണി എന്നയാളുടെ വീട്ടിലും മോഷണം നടന്നു. അടുക്കള ഭാഗത്തെ ജനല്‍ പൊളിച്ച് വാതില്‍ തുറന്നാണ് അകത്തുകടന്നത്. ഇവിടെ നിന്നും ഒരു പവന്‍ സ്വര്‍ണ്ണവും 6000 രൂപയും മോഷ്ടിച്ചു. ഈ വീട്ടിലും ആളുണ്ടായിരുന്നില്ല. ഉടമ ബംഗളൂരുവില്‍ ആയിരുന്നു. ഒരാളാണോ ഒന്നില്‍ കൂടുതല്‍ പേര്‍ ചേര്‍ന്നാണോ കവര്‍ച്ച നടത്തിയതെന്ന് സ്ഥിരീകരിച്ചിട്ടില്ല. സമീപ പ്രദേശങ്ങളിലെ സിസിടിവി ദൃശ്യങ്ങള്‍ അടക്കം കേന്ദ്രീകരിച്ച് അഞ്ചല്‍ പൊലീസ് അന്വേഷണം തുടരുകയാണ്.
