കെ എസ് ഇബി വൈദ്യുതി ലൈനിന്റെ പണിക്ക് വന്ന കരാർ തൊഴിലാളിയെ കടുവ ആക്രമിച്ചു; സംഭവം ആങ്ങമൂഴി കോട്ടമൺപാറയിൽ; പരുക്കേറ്റ അനുകുമാർ മെഡിക്കൽ കോളജിൽ

പത്തനംതിട്ട: ശബരിഗിരി പള്ളം വൈദ്യതി ലൈനിന്റെ പണിക്ക് എത്തിയ കെഎസ്ഇബി കരാർ തൊഴിലാളിയെ കടുവ ആക്രമിച്ചു. ആങ്ങമുഴി കൊച്ചാണ്ടി കാരക്കൽ അനു കുമാറിനാണ് (42 )പരുക്കേറ്റത്. സീതത്തോട് കോട്ടമൺപാറയിൽ ചൊവ്വാഴ്ച ഉച്ചയ്ക്ക് 12 മണിയോടെയാണ് സംഭവം.

പതിനെട്ട് തൊഴിലാളികളാണ് ഇവിടെ പണിക്ക് എത്തിയത്. വനമേഖലയിലെ നാല് കിലോമീറ്റർ ഉള്ളിലാണ് സംഭവം ഉണ്ടായത്. പന്നിയെ ആക്രമിച്ചു കൊണ്ടിരുന്ന കടുവ പൊടുന്നനേ അനു കുമാറിന് നേരേ തിരിയുകയായിരുന്നു. കാലിനും വയറിനും ആഴത്തിൽ മുറിവേറ്റു. അനുവിന്റെ നിലവിളി കേട്ട് ഓടി വന്ന സഹപ്രവർത്തകരെ കണ്ട് കടുവ ഉപേക്ഷിച്ച് മറഞ്ഞു. പരുക്ക് പറ്റിയ അനുവിനെ ആംബുലൻസ് വിളിച്ച് ജനറൽ ആശുപത്രിയിൽ പ്രവേശിപ്പിച്ചു.