വിവിധ സ്ഥലങ്ങളില്‍ നിന്നും ശുചിമുറി മാലിന്യം വണ്ടിയില്‍ കയറ്റും; ശേഷം പൊതുസ്ഥലത്ത് ഒഴുക്കി വിടും; സംഭവം പതിവായതോടെ പ്രതികളെ പിടികൂടി പോലീസ്
കോഴിക്കോട്: ശുചിമുറി മാലിന്യം പൊതുസ്ഥലത്ത് തള്ളുന്നത് പതിവാക്കിയ യുവാക്കൾ പോലീസിന്റെ പിടിയിൽ. ശുചിമുറി മാലിന്യം വൃത്തിയാക്കുന്ന ജോലി കരാര്‍ അടിസ്ഥാനത്തിൽ ചെയ്യുന്ന തൊഴിലാളികളാണ് പിടിയിലായത്. രാമനാട്ടുകര പുതുക്കുടി സ്വദേശി അജ്മല്‍ (26), ഫറോക്ക് കുന്നത്ത്‌മോട്ട സ്വദേശി അബ്ദുല്‍ മനാഫ് (38) എന്നിവരെയാണ് കുന്ദമംഗലം പോലീസ് കഴിഞ്ഞ ദിവസം പിടികൂടിയത്. ശുചിമുറി മാലിന്യം വണ്ടിയില്‍ കയറ്റി ജനവാസം കുറഞ്ഞ മേഖലകളിൽ ഒഴുക്കി വിടുക പ്രതികളുടെ പതിവ് രീതിയെന്നാണ് പോലീസ് പറഞ്ഞത്.
സംഭവം പതിവായതോടെ പോലീസ് ഇവർക്കായുള്ള തിരച്ചിൽ ആരംഭിച്ചിരുന്നു. ഒടുവിൽ കൊടുവള്ളിയില്‍ നിന്നും കൊണ്ടു വന്ന മാലിന്യം ഓടയില്‍ ഒഴുക്കുമ്പോഴാണ് പ്രതികൾ പിടിയിലായത്. കുന്ദമംഗലം കോട്ടംപറമ്പ് ചേരിഞ്ചാല്‍ റോഡിലുള്ള മനത്താനത്ത് താഴം ബസ് സ്റ്റോപ്പിനു സമീപം ഓവ് ചാലിലേക്ക് ശുചിമുറി മാലിന്യം ഒഴുക്കിയ സംഭവത്തിലാണ് ഇരുവരെയും പിടികൂടിയത്.
ഇവര്‍ക്കെതിരെ ഭാരതീയ ന്യായ സംഹിത വകുപ്പ് 271, കേരള പോലീസ് ആക്ട് 120 എന്നിവ പ്രകാരം കേസ് രജിസ്റ്റര്‍ ചെയ്തു. മാലിന്യം കടത്താന്‍ ഉപയോഗിച്ച ലോറിയും കസ്റ്റഡിയില്‍ എടുത്തിട്ടുണ്ട്. കുന്നമംഗലം എസ്‌ഐ ഉമ്മര്‍ ടി കെ, സീനിയര്‍ സിവില്‍ പോലീസ് ഓഫീസര്‍ ബിജു, സിവില്‍ പോലീസ് ഓഫീസര്‍ അഖില്‍ എന്നിവര്‍ അടങ്ങിയ സംഘമാണ് പ്രതികളെ പിടികൂടിയത്.
