പത്തനംതിട്ടക്കാരുടെ ശ്രദ്ധയ്ക്ക്..!!; നാളെ മൂന്ന് താലൂക്കുകൾക്ക് പ്രാദേശിക അവധി പ്രഖ്യാപിച്ചു; എല്ലാ വിദ്യാഭ്യാസ സ്ഥാപനങ്ങൾക്കും ഇത് ബാധകമെന്ന് കളക്ടർ; ഉത്തരവ് പുറത്തിറക്കി

പത്തനംതിട്ട: പരുമല പള്ളി തിരുനാളിനോടനുബന്ധിച്ച് തിങ്കളാഴ്ച (നാളെ) മൂന്ന് താലൂക്കുകളിൽ പ്രാദേശിക അവധി പ്രഖ്യാപിച്ചു. പത്തനംതിട്ട ജില്ലയിലെ തിരുവല്ല, ആലപ്പുഴ ജില്ലയിലെ മാവേലിക്കര, ചെങ്ങന്നൂർ താലൂക്കുകളിലെ സർക്കാർ ഓഫീസുകൾക്കും വിദ്യാഭ്യാസ സ്ഥാപനങ്ങൾക്കുമാണ് ജില്ലാ കളക്ടർമാർ അവധി പ്രഖ്യാപിച്ചത്. മുൻകൂട്ടി നിശ്ചയിച്ച പൊതു പരീക്ഷകൾക്ക് ഈ അവധി ബാധകമായിരിക്കില്ല.

പരിശുദ്ധ ഗീവറുഗീസ് മാർ ഗ്രിഗോറിയോസ് തിരുമേനിയുടെ (പരിശുദ്ധ പരുമല തിരുമേനി) 123-ാമത് ഓർമ്മപ്പെരുന്നാളിനോടനുബന്ധിച്ചാണ് അവധി പ്രഖ്യാപിച്ചിരിക്കുന്നത്. ക്രൈസ്തവ വിശുദ്ധരുടെ ഗണത്തിലേക്ക് ഉയർത്തപ്പെട്ട ആദ്യ ഭാരതീയനാണ് പരിശുദ്ധ പരുമല തിരുമേനി.

സംസ്ഥാന ആരോഗ്യമന്ത്രി വീണാ ജോർജിന്റെ അധ്യക്ഷതയിൽ ചേർന്ന സർക്കാർതല യോഗത്തിൽ പെരുന്നാൾ പ്രമാണിച്ച് വിപുലമായ ക്രമീകരണങ്ങൾ ഏർപ്പെടുത്താൻ തീരുമാനമായിരുന്നു. വിവിധ വകുപ്പുകളുടെ പ്രവർത്തനങ്ങൾ ഏകോപിപ്പിക്കാനും ഹരിതചട്ടങ്ങൾ കർശനമായി പാലിക്കാനും നിർദ്ദേശങ്ങൾ നൽകി. കെ.എസ്.ആർ.ടി.സി.യുടെ പ്രത്യേക സർവീസുകൾ, കുടിവെള്ള വിതരണം, റോഡുകളുടെയും പാലങ്ങളുടെയും അറ്റകുറ്റപ്പണികൾ, വഴിവിളക്കുകൾ എന്നിവയെല്ലാം പെരുന്നാളിനോടനുബന്ധിച്ച് ഉറപ്പാക്കാൻ യോഗത്തിൽ തീരുമാനമായി.

ഒക്ടോബർ 26-ന് കൊടിയേറിയ പരുമല പെരുന്നാളിനോടനുബന്ധിച്ച് പ്രത്യേക പൊലീസ് കൺട്രോൾ റൂം സജ്ജമാക്കുകയും ആരോഗ്യവകുപ്പ് ആംബുലൻസ് സേവനവും മെഡിക്കൽ ടീമിനെയും ഒരുക്കുകയും ചെയ്തിട്ടുണ്ട്. വിവിധ ഉദ്യോഗസ്ഥരും ജനപ്രതിനിധികളും യോഗത്തിൽ പങ്കെടുത്തു. ഈ പ്രാദേശിക അവധി പരുമല പെരുന്നാളിൻ്റെ പ്രാധാന്യം വിളിച്ചോതുന്നു.