ആർപിഎഫിന് സംശയം തോന്നി; പെരുമ്പാവൂരിൽ നിന്ന് കാണാതായ വിദ്യാർത്ഥിനികളെ പിടികൂടിയത് ട്രെയിനിൽ നിന്ന്

കൊച്ചി: പെരുമ്പാവൂരിൽ നിന്ന് കാണാതായ സ്‌കൂൾ വിദ്യാർത്ഥിനികളെ പിടികൂടിയത് കണ്ണൂരിൽ നിന്ന്. രാത്രി 12.30 ഓടെ ട്രെയിനിൽ നിന്ന് ആർപിഎഫ് ഉദ്യോഗസ്ഥരാണ് പെൺകുട്ടിയെ കണ്ടെത്തിയത്. തുടർന്ന് പെരുമ്പാവൂർ പൊലീസ് കണ്ണൂരിലെത്തി പെൺകുട്ടികളെ കൊച്ചിയിലെത്തിച്ചു.

മജിസ്‌ട്രേറ്റിന് മുന്നിൽ ഹാജരാക്കിയശേഷം പെൺകുട്ടികളെ വീട്ടുകാർക്ക് വിട്ടു നൽകുമെന്നാണ് വിവരം. പെരുമ്പാവൂരിനടുത്ത് പാലക്കാട്ടുതാഴം, ഒന്നാംമൈൽ സ്വദേശിനികളായ ഒൻപതാംക്ലാസ് വിദ്യാർത്ഥിനികളെയാണ് തിങ്കളാഴ്ച വൈകീട്ടു മുതൽ കാണാതായത്.

ഒരേ ക്ലാസിൽ പഠിക്കുന്ന ഇവർ സ്‌കൂൾ വിട്ടാൽ ട്യൂഷനും കഴിഞ്ഞാണ് വീട്ടിൽ എത്തുന്നത്. തിങ്കളാഴ്ച സന്ധ്യകഴിഞ്ഞിട്ടും കുട്ടികൾ വീട്ടിലെത്താതിരുന്നതോടെയാണ് വീട്ടുകാർ പരാതിയുമായി പൊലീസിനെ സമീപിച്ചത്.

പെൺകുട്ടികളിൽ ഒരാളെ വീട്ടിൽ വഴക്കു പറഞ്ഞതിനാലാണ് വീട്ടിൽ പോകാതിരുന്നതെന്നാണ് വിവരം. പെൺകുട്ടി കൂട്ടുകാരിയെയും ഒപ്പംകൂട്ടുകയായിരുന്നു എന്നാണ് പൊലീസിന് ലഭിച്ച വിവരം.