ട്രെയിനിൽ യാത്ര ചെയ്യുന്നതിനിടെ അപകടം; ഗേറ്റിന് സമീപത്ത് വെച്ച് പുറത്തേക്ക് തെറിച്ചുവീണു; യുവാവിന്റെ തലയ്ക്ക് ഗുരുതര പരിക്ക്; രക്ഷപ്പെട്ടത് തലനാരിഴയ്ക്ക്

കോഴിക്കോട്: വടകരയിൽ ട്രെയിൻ യാത്രയ്ക്കിടെ വാതിലിന് സമീപത്ത് നിന്ന് പിടിവിട്ട് തെറിച്ച് വീണ് യുവാവിന് പരിക്കേറ്റു. ഇന്ന് പുലർച്ചെയോടെ കോട്ടക്കൽ റെയിൽവെ ഗേറ്റിന് സമീപമാണ് സംഭവം. തലയ്ക്കാണ് പരിക്കേറ്റതെന്ന് പ്രാഥമിക റിപ്പോർട്ടുകൾ സൂചിപ്പിക്കുന്നു.

തൃശൂർ നീലിപ്പാറ സ്വദേശി ഇസ്മായിൽ ഇബ്രാഹിം (21) ആണ് അപകടത്തിൽപ്പെട്ടത്. വടക്കാഞ്ചേരിയിൽ നിന്ന് ചെന്നൈ മെയിലിൽ കണ്ണൂരിലേക്ക് യാത്ര ചെയ്യുകയായിരുന്ന ഇസ്മായിൽ, ട്രെയിനിലെ അമിതമായ തിരക്കിനിടെ വാതിലിന് സമീപം നിൽക്കുമ്പോഴാണ് നിയന്ത്രണം വിട്ട് പുറത്തേക്ക് വീണത്. തലയിടിച്ചാണ് ഇദ്ദേഹം വീണത്.

അപകടത്തെ തുടർന്ന് ഇസ്മായിലിനെ ഉടൻ തന്നെ വടകര ജില്ലാ ആശുപത്രിയിൽ പ്രവേശിപ്പിച്ചു. പിന്നീട് വിദഗ്ദ്ധ ചികിത്സക്കായി കോഴിക്കോട് മെഡിക്കൽ കോളേജിലേക്ക് മാറ്റി.