അടൂര്‍ ബൈപ്പാസില്‍ ടൂറിസ്റ്റ് ബസിലേക്ക് ഇടിച്ച് കയറി; രണ്ട് യുവാക്കള്‍ക്ക് ദാരുണാന്ത്യം; മരിച്ചത് സൂപ്പര്‍മാര്‍ക്കറ്റ് ജീവനക്കാര്‍

പത്തനംതിട്ട: അടൂര്‍ ബൈപ്പാസില്‍ ബൈക്കും ബസും കൂട്ടിയിടിച്ച് രണ്ട് യുവാക്കള്‍ മരിച്ചു. മിത്രപുരത്ത് ഇന്നലെ അര്‍ധ രാത്രി 12.15 ഓടെയാണ് അപകടം. അടൂര്‍ അമ്മകണ്ടകര അമല്‍ (20), നിശാന്ത് (23) എന്നിവരാണ് മരിച്ചത്. അടൂരില്‍ നിന്നു പന്തളത്തേക്ക് പോയ ടൂറിസ്റ്റ് ബസുമായിട്ട് ഇവര്‍ സഞ്ചരിച്ചിരുന്ന ബൈക്ക് കൂട്ടിയിടിക്കുകയായിരുന്നു.

ബൈക്ക് ബസിലേക്ക് ഇടിച്ചു കയറുകയായിരുന്നു എന്നാണ് പൊലീസ് പറയുന്നത്. സിസിടിവി ദൃശ്യങ്ങള്‍ അടക്കം പരിശോധിച്ചാല്‍ മാത്രമേ അപകടത്തിന്റെ യഥാര്‍ഥ കാരണം അറിയാന്‍ സാധിക്കു എന്നും പൊലീസ് വ്യക്തമാക്കി. യുവാക്കര്‍ തല്‍ക്ഷണം മരിച്ചു. സൂപ്പര്‍മാര്‍ക്കറ്റിലെ ജീവനക്കാരാണ് മരിച്ച യുവാക്കള്‍. അന്വേഷണം തുടരുകയാണെന്നും പൊലീസ് കൂട്ടിച്ചേര്‍ത്തു. മൃതദേഹം അടൂര്‍ ജനറല്‍ ആശുപത്രിയിലേക്ക് മാറ്റി.