ഇസ്രയേലിൽ നിന്ന് മടങ്ങാൻ ആഗ്രഹിക്കുന്നവരെ എത്തിക്കാൻ ഇന്ത്യൻ ഏംബസി സജ്ജം; കൂടുതൽ വിമാന സർവീസുകൾ ആലോചനയിലുണ്ടെന്നും കേന്ദ്രമന്ത്രി വി മുരളീധരൻ

തിരുവനന്തപുരം: ഇസ്രയേലിൽ നിന്ന് മടങ്ങാൻ ആഗ്രഹിക്കുന്നവരെ രാജ്യത്ത് തിരികെയെത്തിക്കാൻ ഏത് നടപടിക്കും ഇന്ത്യൻ എംബസി സജ്ജമെന്ന് കേന്ദ്രമന്ത്രി വി. മുരളീധരൻ. സ്ഥിഗതികൾ എംബസി നിരീക്ഷിച്ചുവരികയാണെന്നും അദ്ദേഹം വ്യക്തമാക്കി.

സംഘർഷ സാധ്യതകളും തിരിച്ച് വരുന്നവരുടെ ആവശ്യകതയും അനുസരിച്ച് നടപടികൾ സ്വീകരിക്കും. വേണ്ടിവന്നാൽ കൂടുതൽ വിമാന സർവീസുകൾ ഏർപ്പാടാക്കുന്നത് ആലോചനയിലുണ്ടെന്നും കേന്ദ്രമന്ത്രി തിരുവനന്തപുരത്ത് പറഞ്ഞു.

ഇതുവരെ രണ്ട് സംഘങ്ങളിലായി 39 മലയാളികൾ തിരികെയെത്തി. ബന്ധുക്കളോ സുഹൃത്തുക്കളോ ഇസ്രയേലിൽ ഉള്ളവർക്ക് എന്താവശ്യം ഉണ്ടെങ്കിലും എംബസിയെ അറിയിക്കാമെന്നും വി.മുരളീധരൻ കൂട്ടിച്ചേർത്തു. വിനോദസഞ്ചാരികളായും വിദ്യാർത്ഥികളായും എത്തിയവരാണ് മടങ്ങിവരാൻ കൂടുതൽ ആഗ്രഹം പ്രകടിപ്പിക്കുന്നതെന്നും മന്ത്രി പറഞ്ഞു.