'ജന്മദിനത്തോടൊപ്പം മറ്റൊരു സന്തോഷം കൂടി.. കൂടെയുണ്ടാകണം'; കൗൺസിലർ ഓഫീസ് പ്രവർത്തനം ആരംഭിച്ചു; ഫെയ്സ്ബുക്ക് കുറിപ്പുമായി വൈഷ്ണ സുരേഷ്
തിരുവനന്തപുരം: തദ്ദേശ സ്വയംഭരണ തിരഞ്ഞെടുപ്പിൽ ഇടതുകോട്ടയായ മുട്ടട വാർഡിൽ അട്ടിമറി വിജയം നേടിയ തിരുവനന്തപുരം കോർപ്പറേഷൻ കൗൺസിലർ വൈഷ്ണ സുരേഷ് തന്റെ കൗൺസിലർ ഓഫീസ് ഉദ്ഘാടനം ചെയ്തു. തന്റെ ജന്മദിനത്തോടൊപ്പം മറ്റൊരു സന്തോഷം പങ്കുവെക്കുകയാണെന്ന് ഫെയ്സ്ബുക്ക് പോസ്റ്റിലൂടെ വൈഷ്ണ സുരേഷ് അറിയിച്ചു. മുട്ടടയിലെ കൗൺസിലർ ഓഫീസ് പ്രവർത്തനം ആരംഭിച്ച വിവരം ചിത്രങ്ങൾ സഹിതം പങ്കുവെച്ച വൈഷ്ണ, ആശംസകൾ അറിയിച്ച എല്ലാ പ്രിയപ്പെട്ടവർക്കും നന്ദി പറയുകയും ചെയ്തു.
വൈഷ്ണ സുരേഷിന്റെ ഫെയ്സ്ബുക്ക് പോസ്റ്റ്:
ജന്മദിനത്തോടൊപ്പം മറ്റൊരു സന്തോഷം കൂടി..
മുട്ടടയിലെ കൗൺസിലർ ഓഫീസ് നമ്മൾ പ്രവർത്തനം ആരംഭിച്ചിട്ടുണ്ട്.
ആശംസകൾ അറിയിച്ച എല്ലാ പ്രിയപ്പെട്ടവർക്കും ഒരായിരം നന്ദി.
കൂടെയുണ്ടാകണം...
ഇടതുകോട്ടയായിരുന്ന മുട്ടട വാർഡിൽ സി.പി.എമ്മിന്റെ അംശു വാമദേവനെ അട്ടിമറിയിലൂടെ പരാജയപ്പെടുത്തിയാണ് യു.ഡി.എഫ്. സ്ഥാനാർത്ഥിയായ വൈഷ്ണ സുരേഷ് വിജയം നേടിയത്. 1607 വോട്ടുകൾ കരസ്ഥമാക്കിയ വൈഷ്ണ, എതിർ സ്ഥാനാർത്ഥിയായ അഡ്വ. അംശു വാമദേവൻ നേടിയ 1210 വോട്ടുകളേക്കാൾ വ്യക്തമായ ഭൂരിപക്ഷം ഉറപ്പാക്കി. ബി.ഡി.ജെ.എസ്. സ്ഥാനാർത്ഥി അജിത് കുമാർ എൽ.വി.ക്ക് 460 വോട്ടുകൾ മാത്രമാണ് ലഭിച്ചത്. കോൺഗ്രസ് പട്ടികയിലെ ഏറ്റവും പ്രായം കുറഞ്ഞ സ്ഥാനാർത്ഥിയായിരുന്നു വൈഷ്ണ.
തിരഞ്ഞെടുപ്പ് പ്രഖ്യാപനത്തിന് പിന്നാലെ വൈഷ്ണയുടെ വോട്ടർ പട്ടികയിലെ പേര് ഒഴിവാക്കിയത് വലിയ വിവാദങ്ങൾക്ക് വഴിവെച്ചിരുന്നു. വോട്ടർ പട്ടികയിലെ ടി.സി. നമ്പർ തെറ്റാണെന്ന് ആരോപിച്ച് സി.പി.എം. നൽകിയ പരാതി അംഗീകരിച്ചാണ് തിരഞ്ഞെടുപ്പ് കമ്മിഷൻ വൈഷ്ണയുടെ പേര് ഒഴിവാക്കിയത്. എന്നാൽ, മത്സരിക്കാനുള്ള അവസരം നിഷേധിക്കരുതെന്നും രാഷ്ട്രീയപരമായ കാരണങ്ങളാൽ ഒഴിവാക്കുന്നത് ശരിയല്ലെന്നും ഹൈക്കോടതി നിലപാടെടുത്തു. തുടർന്ന് ഹൈക്കോടതിയുടെ ഇടപെടലിനെത്തുടർന്ന് വൈഷ്ണയുടെ പേര് വോട്ടർ പട്ടികയിൽ ഉൾപ്പെടുത്തുകയും അവർക്ക് തിരഞ്ഞെടുപ്പിൽ മത്സരിക്കാൻ സാധിക്കുകയും ചെയ്തു. വൈഷ്ണയുടെ വോട്ട് വെട്ടാൻ മേയർ ആര്യ രാജേന്ദ്രൻ ഇടപെട്ടു എന്ന് കോൺഗ്രസ് ആരോപിച്ചിരുന്നു.
