ബന്ധുവിന്റെ വീട്ടിൽ കയറി വരുന്നതുപോലെ...ആശുപത്രി നടയിൽ ഒരു അതിഥി; ആളുകൾക്കിടയിലൂടെ നടന്നും ഓടിയും പരിഭ്രാന്തി; ചുറ്റും സിനിമയെ വെല്ലും രംഗങ്ങൾ; മണിക്കൂറുകൾ കഴിഞ്ഞപ്പോൾ കീഴടങ്ങൽ

വണ്ടിപ്പെരിയാർ: വണ്ടിപ്പെരിയാർ സഹകരണ ആശുപത്രിയിൽ കഴിഞ്ഞ ദിവസം ഉടുമ്പ് കയറിയത് ജീവനക്കാർക്കിടയിലും രോഗികൾക്കിടയിലും ആശങ്ക പടർത്തി. അപ്രതീക്ഷിത അതിഥി ആശുപത്രിയുടെ ഉൾഭാഗത്തേക്ക് കയറിവന്നതോടെയാണ് സംഭവം.

സംഭവത്തെത്തുടർന്ന് ആശുപത്രി ജീവനക്കാർ വള്ളക്കടവ് വനപാലകരെ വിവരമറിയിക്കുകയായിരുന്നു. വിവരം ലഭിച്ചയുടൻ സ്ഥലത്തെത്തിയ വള്ളക്കടവ് വനപാലകരും കുമളി റാപ്പിഡ് റെസ്പോൺസ് ടീമും (RRT) ഉടുമ്പിനെ പിടികൂടാനുള്ള ശ്രമങ്ങൾ ആരംഭിച്ചു. ഏകദേശം അര മണിക്കൂറോളം നീണ്ട പരിശ്രമത്തിനൊടുവിൽ ജീവനക്കാരെയും സംഘത്തെയും ഭയപ്പെടുത്തി ആശുപത്രിയുടെ കൗണ്ടറിന് മുകളിലേക്ക് കയറിയ ഉടുമ്പിനെ വിജയകരമായി കീഴ്പ്പെടുത്തി.

പിടികൂടിയ ഉടുമ്പിനെ പിന്നീട് തേക്കടി വനത്തിൽ കൊണ്ടുപോയി സുരക്ഷിതമായി തുറന്നുവിട്ടു. ആശുപത്രിയിൽ നാടകീയ രംഗങ്ങൾക്ക് കാരണമായ സംഭവം അധികൃതരുടെ കൃത്യമായ ഇടപെടലിലൂടെ പരിഹരിക്കപ്പെടുകയായിരുന്നു.