പെട്രോള്‍ അടിക്കാൻ പമ്പിലെത്തിയ ഗുഡ്‌സ് ഓട്ടോ; പരിശോധനയിൽ ടാങ്കിൽ എന്തോ..നിറഞ്ഞിരിക്കുന്നത് ശ്രദ്ധിച്ചു; വണ്ടി നേരെ വര്‍ക്ഷോപ്പില്‍ എത്തിച്ചതും ഞെട്ടൽ; പോലീസിൽ പരാതി നൽകി

കോഴിക്കോട്: മത്സ്യ ഗുഡ്‌സ് ഓട്ടോയിലെ ഇന്ധന ടാങ്കില്‍ സാമൂഹ്യവിരുദ്ധര്‍ ഉപ്പ് വിതറിയെന്ന് പരാതി. നാദാപുരത്ത് വളയം ചുഴലിയിലാണ് സംഭവം നടന്നത്. പാറയുള്ള പറമ്പത്ത് റോഷന്റെ ഉടമസ്ഥതയിലുള്ള ഇന്ധന ടാങ്കിലാണ് ഉപ്പ് നിറച്ചത്. പുലര്‍ച്ചെ മത്സ്യം എടുക്കാനായി ചോമ്പാല ഹാര്‍ബറിലേക്ക് പുറപ്പെട്ടപ്പോഴാണ് ഇത് ശ്രദ്ധയില്‍പ്പെട്ടത്.

പെട്രോള്‍ നിറയ്ക്കാനായി പമ്പില്‍ കയറിയപ്പോള്‍ ടാങ്കില്‍ ഉപ്പിന്റെ അംശം കണ്ടെത്തി. ഉടനെ വര്‍ക്ഷോപ്പില്‍ എത്തിച്ച് ഇന്ധന ടാങ്ക് പരിശോധിച്ചപ്പോള്‍ ഉപ്പ് നിറച്ചതായി കണ്ടെത്തുകയായിരുന്നു. ഒരു കിലോയോളം ഉപ്പ് ടാങ്കില്‍ നിന്നും ലഭിച്ചു.

കഴിഞ്ഞ ഞായറാഴ്ച രാത്രി വീടിന് സമീപത്തെ ഷെല്‍ട്ടറില്‍ വാഹനം പാര്‍ക്ക് ചെയ്തിരുന്നു. അപ്പോഴാകാം സംഭവം നടന്നതെന്നാണ് കരുതുന്നത്. ഇത് സംബന്ധിച്ച് റോഷന്‍ വളയം പൊലീസ് സ്‌റ്റേഷനില്‍ പരാതി നല്‍കിയിട്ടുണ്ട്.