പെരിന്തൽമണ്ണ: അവിവാഹിതയായ യുവതിയെ വിവാഹം ചെയ്യാമെന്ന് പറഞ്ഞു വിശ്വസിപ്പിച്ച് പീഡിപ്പിച്ച് ഗർഭിണിയാക്കിയ കേസിലെ പ്രതിയെ 15 വർഷം കഠിനതടവിനും അഞ്ചുവർഷം തടവിനും ഒന്നരലക്ഷം രൂപ പിഴയടയ്ക്കാനും ശിക്ഷിച്ചു. പ്രതി പൊന്മള മുട്ടിപ്പാലം സ്വദേശി പട്ടത്ത് മുഹമ്മദ് ഷാഫി(46) യെയാണ് പെരിന്തൽമണ്ണ അതിവേഗ പ്രത്യേക കോടതി(രണ്ട്) ജഡ്ജി എസ്.ആർ. സിനി ശിക്ഷിച്ചത്. പിഴ അടച്ചാൽ ഒരു ലക്ഷം രൂപ അതിജീവിതയ്ക്ക് നൽകാനും ഉത്തരവിട്ടു.

ഗർഭിണിയായ യുവതി ആൺകുഞ്ഞിന് ജന്മം നൽകിയ സംഭവത്തിൽ മലപ്പുറം പൊലീസാണ് 2015-ൽ കേസെടുത്തത്. മലപ്പുറം പൊലീസ് ഇൻസ്‌പെക്ടറായിരുന്ന ആർ. അശോകൻ രജിസ്റ്റർ ചെയ്ത കേസിൽ ഇൻസ്‌പെക്ടർ കെ.സി. വിനു ആണ് പ്രതിയെ അറസ്റ്റ് ചെയ്ത് കുറ്റപത്രം സമർപ്പിച്ചത്.

പ്രോസിക്യൂഷനുവേണ്ടി സ്‌പെഷ്യൽ പബ്ലിക് പ്രോസിക്യൂട്ടർ അഡ്വ. ആർ. കവിത ഹാജരായി. പ്രതിയെ തവനൂർ സെൻട്രൽ ജയിലിലേക്ക് അയയ്ക്കും.

 

 

മറുനാടന്‍ മലയാളി

    മറുനാടന്‍ മലയാളി ബ്യൂറോ