കണക്ഷൻ വിച്ഛേദിക്കൽ ഒഴിവാക്കാൻ വാട്ടർ ബിൽ യഥാസമയം അടക്കണം: വാട്ടർ അഥോറിറ്റി

തിരുവനന്തപുരം: കണക്ഷൻ വിച്ഛേദിക്കൽ ഒഴിവാക്കാൻ വാട്ടർ ബിൽ യഥാസമയം അടക്കണമെന്ന് വാട്ടർ അഥോറിറ്റി അറിയിച്ചു. വാട്ടർ ചാർജ് വർധനക്കു ശേഷം, ചില ഉപഭോക്താക്കൾ ബിൽ കുടിശ്ശിക വരുത്തുന്നത് ശ്രദ്ധയിൽപ്പെട്ടു. യഥാസമയം ബിൽ അടക്കാതെ കുടിശിക വരുത്തുന്നപക്ഷം കണക്ഷൻ വിച്ഛേദിക്കപ്പെടുമെന്നും വാട്ടർ അഥോറിറ്റി അറിയിച്ചു.

കണക്ഷൻ വിച്ഛേദിക്കപ്പെട്ടാൽ, കുടിശികക്കു പുറമെ പിഴ കൂടി അടച്ചാൽ മാത്രമേ കണക്ഷൻ പുനഃസ്ഥാപിക്കാൻ കഴിയൂ. ബിൽ തുക അടക്കാതിരുന്നാൽ കുടിവെള്ള പദ്ധതികളുടെ അറ്റകുറ്റപ്പണികളും അനുബന്ധ പ്രവർത്തനങ്ങളും തടസപ്പെടും. ഇങ്ങനെ സംഭവിച്ചാൽ കുടിവെള്ള പദ്ധതി പ്രവർത്തനം നിലച്ചു പോവുകയും പദ്ധതിക്കായി ചെലവഴിച്ച വൻതുക പാഴാവുകയും ചെയ്യും.

പദ്ധതികൾ സ്വയം നിലനിൽക്കാൻ ഗുണഭോക്താക്കളിൽനിന്നു തന്നെ വിഭവ സമാഹരണം നടത്തണമെന്ന കേന്ദ്ര സർക്കാർ നിബന്ധനയുമുണ്ട്. അതിനാൽ വാട്ടർ ബിൽ യഥാസമയം അടച്ച് കണക്ഷൻ വിച്ഛേദിക്കുന്നത് ഒഴിവാക്കാൻ ഉപഭോക്താക്കൾ സഹകരിക്കണമെന്ന് വാട്ടർ അഥോറിറ്റി അറിയിച്ചു.