സിപിഎമ്മുമായി സഹകരിക്കാൻ തയ്യാർ; ഒരുമിച്ച് നീങ്ങേണ്ട രാഷ്ട്രീയ സാഹചര്യമാണ് ഇപ്പോഴുള്ളത്; സിപിഎമ്മിന് നേരെ തങ്ങൾ വാതിലടച്ചിട്ടില്ലെന്ന് വെൽഫെയർ പാർട്ടി

കാസർകോട്: സിപിഎമ്മിലേക്ക് പാലമിട്ട് വെൽഫെയർ പാർട്ടിയും. സിപിഎമ്മുമായി സഹകരിക്കാൻ തയ്യാറെന്ന് വെൽഫെയർ പാർട്ടി വ്യക്തമാക്കി. സിപിഐഎമ്മിന് നേരെ തങ്ങൾ വാതിൽ അടച്ചിട്ടില്ലെന്നും സഹകരിക്കാൻ തയ്യാറെന്നും പാർട്ടി സംസ്ഥാന പ്രസിഡന്റ് റസാഖ് പാലേരി വ്യക്തമാക്കി. ഒരുമിച്ച് നീങ്ങേണ്ട രാഷ്ട്രീയ സാഹചര്യമാണ് ഇപ്പോഴുള്ളത്. കഴിഞ്ഞകാല തെരഞ്ഞെടുപ്പുകളിലും ഒരുമിച്ച് നിന്ന് പ്രവർത്തിച്ചിട്ടുണ്ട്. വെൽഫെയർ പാർട്ടിയോടുള്ള സിപിഎമ്മിന്റെ വാതിൽ ചാരൽ മാറുമെന്നാണ് പ്രതീക്ഷയെന്നും റസാഖ് പാലേരി പറഞ്ഞു.

കഴിഞ്ഞ ലോക്‌സഭ, നിയമസഭ തെരഞ്ഞെടുപ്പുകളിൽ വെൽഫെയർ പാർട്ടി യുഡിഎഫിന് പിന്തുണ നൽകിയിരുന്നു. പുറമെ, സംസ്ഥാന സർക്കാറിന്റെ അഭിമാന പദ്ധതിയായ സിൽവർലൈനെയും ശക്തമായി എതിർത്തിരുന്നു. പദ്ധതിയുടെ സർവേക്കായി സ്ഥാപിച്ച കല്ല് പിഴുതി മാറ്റിയാണ് പാർട്ടി സമരം നടത്തിയത്.

പുറമെ, ഗെയിൽ പൈപ്പ് ലൈൻ, ദേശീയപാത പദ്ധതികൾക്കെതിരെയും വെൽഫെയർ പാർട്ടി രംഗത്തെത്തിയിരുന്നു. ഏകവ്യക്തി നിയമ വിവാദത്തിന്റെ പശ്ചാത്തലത്തിലാണ് സിപിഎമ്മുമായി സഹകരിക്കാൻ തയ്യാറാണെന്ന് വെൽഫെയർ പാർട്ടി നിലപാട് സ്വീകരിച്ചത്.