ഹൈപ്പർ മാർക്കറ്റിൽ ഇടിച്ചു കയറി കാട്ടുപന്നി; സാധനങ്ങൾക്കിടയിലൂടെ തലങ്ങും വിലങ്ങും പാഞ്ഞു; പിന്നാലെ പുറത്തേക്ക് ഓടി; സംഭവം കാസർകോഡ്

കാസർകോഡ്: കുമ്പള ടൗണിലെ ഹൈപ്പർ മാർക്കറ്റിൽ പാഞ്ഞു കയറി കാട്ടുപന്നി. കാസർകോട് ജില്ലയിലെ കുമ്പള ടൗണിലുള്ള സ്മാർട്ട് ബസാർ ഹൈപ്പർ മാർക്കറ്റിൽ ആയിരുന്നു സംഭവം. കഴിഞ്ഞ ദിവസം രാത്രിയാണ് ഹൈപ്പർ മാർക്കറ്റിൽ കയറി സാധനങ്ങൾക്കിടയിലൂടെ തലങ്ങും വിലങ്ങും പാഞ്ഞത്. അൽപ സമയം സാധനങ്ങൾക്കിടയിലൂടെ പാഞ്ഞ ശേഷം കയറിയ വാതിലിലൂടെ തന്നെ പുറത്തിറങ്ങി ഓടി രക്ഷപ്പെട്ടു. ഹൈപ്പർ മാർക്കറ്റിൽ അധികം ആളുകൾ ഇല്ലാത്ത സമയത്തായിരുന്നു പന്നി കയറിയത്. അതിനാൽ അനിഷ്ട സംഭവങ്ങളൊന്നും ഉണ്ടായില്ല.

കാട്ടുപന്നിയുടെ പരാക്രമം കണ്ടുകൊണ്ടിരുന്ന ഒരാൾ ദൃശ്യങ്ങൾ മൊബൈൽ ക്യാമറയിൽ പകർത്തി. സംഭവത്തിൽ ആർക്കും പരിക്കേറ്റിട്ടില്ല. കുമ്പളയിലും പരിസര പ്രദേശത്തും കാട്ടുപന്നിയുടെ ശല്യം രൂക്ഷമാണെന്നാണ് നാട്ടുകാർ പറയുന്നത്. ഇരുചക്ര വാഹനങ്ങളിൽ സഞ്ചരിക്കുന്നതിനിടെ രാത്രി കാട്ടുപന്നി ഇടിച്ച് പരിക്കേൽക്കുന്നതു പോലുള്ള സംഭവങ്ങളും കുമ്പളയിൽ നിന്ന് റിപ്പോർട്ട് ചെയ്യപ്പെട്ടിട്ടുണ്ട്.