എറണാകുളം: ഭീഷണിപ്പെടുത്തി അഭിനയിപ്പിച്ച അഡൽസ് ഒൺലി സീരീസിന്റെ പ്രദർശനം തടയണമെന്ന് ആവശ്യപ്പെട്ട് നടനായ യുവാവ് ഹൈക്കോടതിയെ സമീപിച്ചു.
ഒടിടി പ്ലാറ്റ്ഫോമായ യെസ്മക്കെതിരെയാണ് യുവാവ് കോടതിയെ സമീപിച്ചിരിക്കുന്നത്. ഹർജി അൽപസമയത്തിനുള്ളിൽ ഹൈക്കോടതി പരിഗണിക്കും.തിരുവനന്തപുരം വെങ്ങാനൂർ സ്വദേശിയാണ് തന്നെ ഭീഷണിപ്പെടുത്തി അശ്ലീലചിത്രത്തിൽ അഭിനയിപ്പിച്ചെന്ന് ആരോപിച്ച് ഒടിടി പ്ലാറ്റ്ഫോമിനും സംവിധായികയ്ക്കുമെതിരെ രംഗത്തെത്തിയത്.
സിനിമ അശ്ലീല ചിത്രമാണെന്ന് ആദ്യം പറഞ്ഞിരുന്നില്ല. സിനിമയുടെ ചില ഭാഗങ്ങൾ ചിത്രീകരിച്ച ശേഷം കരാറിൽ ഒപ്പുവെപ്പിച്ചു. പിന്നീട് അശ്ലീല ചിത്രമാണെന്ന് പറഞ്ഞ് ഭീഷണിപ്പെടുത്തി അഭിനയിപ്പിക്കുകയായിരുന്നെന്നാണ് യുവാവിന്റെ പരാതി.അരുവിക്കരയിലെ ആളൊഴിഞ്ഞ ഒരു ഫൽറ്റിൽ വച്ചായിരുന്നു സീരീസിന്റെ ചിത്രീകരണം. മൊബൈൽ റേഞ്ച് പോലും സ്ഥലത്തുണ്ടായിരുന്നില്ല. അശ്ലീലചിത്രത്തിൽ അഭിനയിക്കാൻ സാധിക്കില്ലെന്ന് പറഞ്ഞതോടെ അഞ്ചുലക്ഷം രൂപ നഷ്ടപരിഹാരം നൽകണമെന്ന് സംവിധായിക ആവശ്യപ്പെട്ടെന്നും യുവാവ് പരാതിയിൽ പറഞ്ഞിരുന്നു.
യുവാവിന്റെ പരാതിക്ക് പിന്നാലെ സീരീസിന്റെ ടീസർ നിർമ്മാതാക്കൾ പുറത്തുവിടുകയും ചെയ്തിരുന്നു. സീരീസിന്റെ കരാറിൽ ധാരണയാവുന്ന ദൃശ്യങ്ങൾ അടങ്ങിയ ടീസറാണ് ഒടിടി പ്ലാറ്റ്ഫോമിലൂടെ പുറത്തുവന്നിരിക്കുന്നത്. 90 ശതമാനം നഗ്നതയാവാമെന്ന് യുവാവുമായി കരാറുണ്ടെന്നാണ് സംവിധായിക അവകാശപ്പെടുന്നത്. സീരിസിൽ അഭിനയിച്ച യുവാവ് അടക്കമുള്ള അഭിനേതാക്കൾ കുടുംബാംഗങ്ങളുടെ സമ്മതം വാങ്ങിയതാണെന്നും സംവിധായിക പറഞ്ഞിരുന്നു.സംഭവത്തിൽ ഒടിടി പ്ലാറ്റ്ഫോം ഉടമകൾക്കെതിരെയും സംവിധായികയ്ക്കുമെതിരെയും വഞ്ചനാക്കുറ്റം ചുമത്തി വിഴിഞ്ഞം പൊലീസ് കേസെടുത്തിരുന്നു.
