ചൂണ്ടയിടാന്‍ പോകുന്നുവെന്ന് പറഞ്ഞ് വീട്ടിൽ നിന്നിറങ്ങി; ഏറെനേരമായിട്ടും ആളെ കാണാനില്ല; ഫോൺ വിളിച്ച് നോക്കിയിട്ടും രക്ഷയില്ല; നാട്ടുകാരുടെ തിരച്ചിലിൽ ദാരുണ കാഴ്ച; പതിനെട്ടുകാരന് ദാരുണാന്ത്യം

മലപ്പുറം: മലപ്പുറം മേലാറ്റൂരിൽ ഒലിപ്പുഴയിൽ മുങ്ങി മരിച്ച നിലയിൽ കണ്ടെത്തിയത് പൊട്ടിയോടത്തലയിലെ ഒരവംപുറം സ്വദേശിയും ശ്രീധരന്റെയും ശാന്തയുടെയും മകനുമായ ശ്രീശാന്തിനെ (18) ആണ്.

മീൻപിടുത്തത്തിനായി ചൂണ്ടയുമായി രാവിലെ വീട്ടിൽ നിന്ന് പോയ ശ്രീശാന്ത് വൈകുന്നേരമായിട്ടും തിരിച്ചെത്താതിരുന്നതിനെ തുടർന്ന് വീട്ടുകാർക്ക് ആശങ്കയായി. അവർ ഉടൻ തന്നെ മൊബൈൽ ഫോണിൽ വിളിക്കാൻ ശ്രമിച്ചെങ്കിലും മറുപടി ലഭിച്ചില്ല. ഇതോടെ വീട്ടുകാർ മേലാറ്റൂർ പോലീസിനെ വിവരമറിയിച്ചു.

പോലീസ് സൈബർ സെല്ലിന്റെ സഹായത്തോടെ ശ്രീശാന്തിന്റെ മൊബൈൽ ഫോണിന്റെ സ്ഥലം കണ്ടെത്താൻ ശ്രമിച്ചു. ഈ വിവരത്തിന്റെ അടിസ്ഥാനത്തിൽ നാട്ടുകാർ നടത്തിയ തിരച്ചിലിലാണ് യുവാവിനെ കണ്ടെത്തിയത്. ഒലിപ്പുഴ പാലത്തിന് താഴെ മണിതട്ടക്കുണ്ട് ഭാഗത്ത് നിന്നാണ് മൃതദേഹം കണ്ടെടുത്തത്.