മത്സ്യബന്ധനം കഴിഞ്ഞ് തീരത്തേക്ക് മടങ്ങുമ്പോള്‍ ശക്തമായ തിരമാല; വള്ളം മറിഞ്ഞ് കടലില്‍ തെറിച്ചു വീണു; യുവാവിന്റെ മൃതദേഹം കണ്ടെത്തി
തിരുവനന്തപുരം: പെരുമാതുറ കടല്‍തീരത്ത് മൂന്ന് ദിവസമായി തുടരുന്ന തെരച്ചിലിന് അവസാനമായി. വള്ളം മറിഞ്ഞ് കാണാതായ യുവാവിന്റെ മൃതദേഹം ഇന്ന് പുലിമുട്ട് സമീപത്ത് നിന്ന് കണ്ടെത്തി. മരിച്ചത് വലിയവിളാകം സ്വദേശിയായ ഷഹാന്‍ (19) ആണെന്ന് പൊലീസ് സ്ഥിരീകരിച്ചു.
മത്സ്യബന്ധനം കഴിഞ്ഞ് തീരത്തേക്ക് മടങ്ങുമ്പോഴായിരുന്നു ദാരുണ സംഭവം. പെരുമാതുറ സ്വദേശി ഷാക്കിറിന്റെ ഉടമസ്ഥതയിലുള്ള ഹസ്ബി റബ്ബി എന്ന വള്ളം അഴിമുഖത്തിന് സമീപം ശക്തമായ തിരയില്‍ പെട്ട് തെന്നിമാറുകയായിരുന്നു. അതിനിടെ ഷഹാന്‍ കടലില്‍ വീണു. ഒപ്പമുണ്ടായിരുന്ന അല്‍ അമീന്‍ നീന്തി രക്ഷപ്പെട്ടു.
സംഭവം അറിഞ്ഞ ഉടന്‍ തന്നെ കോസ്റ്റുഗാര്‍ഡ്, നേവി, തീരസേന, മത്സ്യത്തൊഴിലാളികള്‍ എന്നിവര്‍ ചേര്‍ന്ന് വന്‍തോതില്‍ തിരച്ചില്‍ ആരംഭിച്ചിരുന്നു. കടല്‍പ്രക്ഷുബ്ധമായതിനാല്‍ ശ്രമങ്ങള്‍ ദുഷ്‌കരമായിരുന്നു. നിരവധി മണിക്കൂറുകള്‍ നീണ്ട തെരച്ചിലിനൊടുവിലാണ് ഷഹാന്റെ മൃതദേഹം പുലിമുട്ട് തീരത്ത് കണ്ടെത്തിയത്.
ശരീരം മെഡിക്കല്‍ കോളജ് ആശുപത്രി മോര്‍ച്ചറിയിലേക്ക് മാറ്റി. കടലില്‍ സുരക്ഷാ മുന്‍കരുതലുകള്‍ കൂടുതല്‍ ശക്തമാക്കണമെന്നും നാട്ടുകാര്‍ ആവശ്യപ്പെട്ടു.
