വെളിച്ചപ്പാടിന്റെ കടിയേറ്റ് അയൽക്കാരനായ യുവാവിന് പരിക്ക്; ഉപദ്രവിച്ചതിന്റെ കാരണം കേട്ട് തലപുകഞ്ഞ് നാട്ടുകാർ; സംഭവം കാസർകോട്
കാസർകോട്: ചന്തേരയിൽ അതിർത്തി തർക്കത്തെ തുടർന്ന് അയൽവാസിയായ യുവാവിനെ വെളിച്ചപ്പാട് കടിച്ചു പരിക്കേൽപ്പിച്ചു. ചന്തേര മാണിയാട്ട് കാട്ടൂർ തറവാടിന് സമീപം താമസിക്കുന്ന പെയിന്റിംഗ് തൊഴിലാളി പി. പ്രകാശനാണ് (45) ചന്തേര ചെമ്പിലേട് ക്ഷേത്രത്തിലെ വെളിച്ചപ്പാടായ അയൽവാസി കൃഷ്ണന്റെ കടിയേറ്റത്. സംഭവത്തിൽ പ്രകാശൻ പോലീസിൽ പരാതി നൽകിയിട്ടുണ്ട്.
കഴിഞ്ഞ ദിവസമാണ് കേസിനാസ്പദമായ സംഭവം നടന്നത്. വെളിച്ചപ്പാടായ കൃഷ്ണൻ ഓടിച്ച കാർ മതിലിൽ ഇടിച്ചതിനെത്തുടർന്നുണ്ടായ അതിർത്തി തർക്കമാണ് സംഘർഷത്തിലേക്ക് വഴിമാറിയത്. തർക്കം രൂക്ഷമായതോടെ കൃഷ്ണൻ പ്രകാശന്റെ തോളിൽ കടിച്ചു പരിക്കേൽപ്പിക്കുകയായിരുന്നുവെന്ന് പരാതിയിൽ പറയുന്നു.
കടിയേറ്റതിനെത്തുടർന്ന് പ്രകാശനെ ചെറുവത്തൂർ കെ.എ.എച്ച് ആശുപത്രിയിൽ പ്രവേശിപ്പിച്ചു. പരിക്ക് സാരമുള്ളതല്ലെന്ന് നാട്ടുകാർ അറിയിച്ചു.
സംഭവത്തിൽ പ്രകാശൻ ചന്തേര പോലീസിൽ പരാതി നൽകിയിട്ടുണ്ടെങ്കിലും, പോലീസ് ഇതുവരെ കേസെടുത്തിട്ടില്ല. വിശദമായ അന്വേഷണം നടത്തി തുടർനടപടികൾ സ്വീകരിക്കുമെന്ന് പോലീസ് വ്യക്തമാക്കി. അയൽവാസികൾ തമ്മിലുള്ള അതിർത്തി തർക്കങ്ങൾ പലപ്പോഴും ഗുരുതരമായ സംഘർഷങ്ങളിലേക്ക് വഴിമാറുന്നതിന്റെ ഉദാഹരണമായി ഈ സംഭവം മാറുകയാണ്.
