സ്‌കൂള്‍ കലോത്സവത്തില്‍ എം ടിക്ക് ആദരം; പ്രധാനവേദിയുടെ പേര് എം ടി-നിള എന്നാക്കി മാറ്റി

തിരുവനന്തപുരം: സംസ്ഥാന സ്‌കൂള്‍ കലോത്സവത്തില്‍ എംടി വാസുദേവന്‍ നായര്‍ക്ക് ആദരം. കലോത്സവത്തിന്റെ പ്രധാനവേദിയുടെ പേര് എംടി-നിള എന്നാക്കി മാറ്റി. വിദ്യാഭ്യാസ മന്ത്രി വി. ശിവന്‍കുട്ടിയുടെ നിര്‍ദ്ദേശപ്രകാരമായിരുന്നു പൊതുവിദ്യാഭ്യാസ വകുപ്പിന്റെ തീരുമാനം.

എംടിയുടെ നിളയെ കുറിച്ചുള്ള പ്രസിദ്ധമായ ഉദ്ധരണി പ്രധാനവേദിയില്‍ ആലേഖനം ചെയ്യും. ഭാരതപ്പുഴ എന്ന പേരാണ് എംടി-നിള എന്ന് പുനര്‍നാമകരണം ചെയ്തത്. 63-ാമത് കേരള സ്‌കൂള്‍ കലോത്സവം ജനുവരി നാല് മുതല്‍ എട്ട് വരെയാണ് തിരുവനന്തപുരത്ത് വച്ച് നടക്കുന്നത്. നഗരത്തിലെ 25 വേദികളിലായിട്ടാണ് ഏകദേശം പതിനായിരം കുട്ടികള്‍ പങ്കെടുക്കുന്ന 249 മത്സര ഇനങ്ങള്‍ അരങ്ങേറാന്‍ പോകുന്നത്.