സിദ്ധാർഥ് മദ്യപിച്ച് വണ്ടിയോടിച്ചതിനെ ന്യായീകരിക്കുകയല്ല; നാട്ടുകാരുടെ പ്രവൃത്തി ഭീകരമായിട്ട് തോന്നി; ഒരു സെലിബ്രിറ്റിയായതിനാൽ മാക്സിമം ചവിട്ടിതാഴ്ത്തണം; വിമർശനവുമായി നടൻ ജിഷിൻ മോഹൻ
കൊച്ചി: മദ്യലഹരിയിൽ വാഹനമോടിച്ച് കാൽനടയാത്രക്കാരനെ ഇടിച്ചിട്ട കേസിൽ അറസ്റ്റിലായ സീരിയൽ നടൻ സിദ്ധാർഥ് പ്രഭുവിനെ നാട്ടുകാർ കൈകാര്യം ചെയ്ത രീതിക്കെതിരെ രൂക്ഷവിമർശനവുമായി നടൻ ജിഷിൻ മോഹൻ. മദ്യപിച്ചയാളെ പൊലീസിൽ ഏൽപ്പിക്കേണ്ടതിന് പകരം സിദ്ധാർഥിന്റെ കഴുത്ത് പിടിച്ച് ഞെരിക്കുകയും കാലുകെട്ടിയിടുകയും ചെയ്ത നാട്ടുകാരുടെ പ്രവൃത്തി ക്രിമിനൽ നടപടിയാണെന്ന് ജിഷിൻ ആരോപിച്ചു. ഇത് 'പ്രബുദ്ധകേരളമാണോ' എന്നും അദ്ദേഹം ഇൻസ്റ്റഗ്രാം പോസ്റ്റിലൂടെ ചോദ്യം ചെയ്തു.
ഇൻസ്റ്റഗ്രാം പോസ്റ്റിലാണ് സിദ്ധാർഥിന്റെ പ്രവൃത്തിയെ ഒരു തരത്തിലും ന്യായീകരിക്കുന്നില്ലെന്ന് വ്യക്തമാക്കിയ ജിഷിൻ, നാട്ടുകാരുടെ അതിക്രമത്തിനെതിരെ ശക്തമായി പ്രതികരിച്ചത്. "സിദ്ധാർഥ് ആദ്യമായല്ല മദ്യപിക്കുന്നതും വണ്ടിയോടിക്കുന്നതും. എന്നാൽ ഇങ്ങനെയാണോ മദ്യപിച്ച ഒരാളെ കൈകാര്യം ചെയ്യേണ്ടത്? നാട്ടുകാരുടേത് ക്രിമിനൽ ആക്ടിവിറ്റിയാണ്," ജിഷിൻ കുറിച്ചു. മധുവിനെ തല്ലിക്കൊന്നപ്പോൾ പലരും പരിതപിച്ച കാര്യം ഓർമ്മിപ്പിച്ച ജിഷിൻ, ഇവിടെ സിദ്ധാർഥ് ഒരു കലാകാരനും സെലിബ്രിറ്റിയുമായതുകൊണ്ട് അയാളെ ചവിട്ടിതാഴ്ത്താൻ ശ്രമിക്കുകയാണോ എന്നും ചോദിച്ചു.
ജിഷിൻ മോഹന്റെ വാക്കുകൾ:
നമ്മുടെ സഹപ്രവർത്തകൻ സിദ്ധാർഥ് മദ്യപിച്ച് വണ്ടിയോടിച്ച്, ആ വണ്ടിയൊരാളെ തട്ടി. ഇതിനെ ന്യായീകരിക്കുകയോ ലഘൂകരിക്കുകയോ ചെയ്യുന്നില്ല. ഇതിൽ നാട്ടുകാർ ചെയ്ത പ്രവൃത്തി ഭീകരമായിട്ട് തോന്നി. ഇവർ ചെയ്തത് ക്രിമിനൽ ആക്ടിവിറ്റിയാണ്. മദ്യപിച്ചയാളെ പൊലീസിൽ ഏൽപ്പിക്കുകയാണ് വേണ്ടത്. നാട്ടുകാർ ഇവന്റെ കഴുത്ത് പിടിച്ച് ഞെരിച്ച് റോഡിലിട്ട് ചവിട്ടുന്നു. ഇതാണോ കേരളം, ഇതാണോ പ്രബുദ്ധകേരളം ?മധുവിനെ തല്ലിക്കൊന്നപ്പോൾ കുറേപേർ പരിതപിച്ചിരുന്നു. എവിടെ പരിതാപമൊന്നുമില്ലേ ആർക്കും. എന്തേ , കാരണം അവൻ ആർടിസ്റ്റാണ്, സെലിബ്രിറ്റിയാണ്. എന്നവച്ചാല് മാക്സിമം അവനെ ചവിട്ടിതാഴ്ത്തണം. ഇപ്പോ കുറേ പേർ പറയുന്നുണ്ട് അവൻ വണ്ടിയിടിച്ചതിനാൽ അല്ലേ അങ്ങനെ ചെയ്തത് എന്ന്. ഇതിന് കൈകാര്യം ചെയ്യാനാണോ നാട്ടുകാർ ?, ഇവിടെ പൊലീസും കോടതിയും ഒന്നുമില്ലേ, ലോകത്തിൽ ആദ്യമായി മദ്യപിച്ച് വണ്ടിയോടിച്ച ആളല്ല സിദ്ധാർഥ്, ക്രിസ്മസ് ന്യൂ ഇയർ ടൈമിൽ എല്ലാവരും മദ്യപിച്ചൊക്കെ തന്നെയാകും വണ്ടിയോടിക്കുന്നത്. അത് നല്ലതല്ല, അനുകൂലിക്കുന്നുമില്ല,പക്ഷേ ഇതിൽ പ്രതികരിക്കേണ്ടത് ഇങ്ങനെയല്ല. ഒരാളെ വലിച്ചിഴച്ചല്ല, ശ്വാസം മുട്ടിച്ചല്ല പ്രതികരിക്കേണ്ടത്. പ്രബുദ്ധകേരളമാണ് പോലും ...നാണിമില്ലേ കേരളത്തിലേ ജനങ്ങളേ, നിങ്ങൾക്ക് പ്രതികരിക്കേണ്ടേ ? ലജ്ജ തോന്നുന്നു.
ഡിസംബർ 24-ന് രാത്രി കോട്ടയം എംസി റോഡിൽ നാട്ടകം ഗവ. കോളജിനു സമീപത്താണ് നടൻ സിദ്ധാർഥിന്റെ വാഹനം വഴിയാത്രക്കാരനെ ഇടിച്ചത്. തുടർന്ന് സ്ഥലത്തെത്തിയ നാട്ടുകാർ ഇയാളെ തടഞ്ഞുനിർത്തുകയും കയ്യേറ്റം ചെയ്യുകയുമായിരുന്നു. പിന്നീട് വിവരമറിഞ്ഞെത്തിയ പൊലീസ് സിദ്ധാർഥിനെ അറസ്റ്റ് രേഖപ്പെടുത്തി. നടൻ ജിഷിൻ മോഹന്റെ ഈ പ്രതികരണം സമൂഹമാധ്യമങ്ങളിൽ വലിയ ചർച്ചകൾക്ക് തുടക്കമിട്ടിട്ടുണ്ട്.
