ദുരന്തം കണ്‍മുന്നില്‍ കണ്ട ഫസ്റ്റ് ഓഫീസര്‍ ക്ലൈവ് സുന്ദര്‍ പരിഭ്രാന്തനായി ' ഓ..ഷി** എന്ന് അലറി; പൈലറ്റ് സബര്‍വാള്‍ വളരെ കൂളും; അഹമ്മദാബാദ് വിമാന ദുരന്തത്തിന് തൊട്ടുമുമ്പുള്ള നിമിഷങ്ങള്‍ വിവരിച്ച് വാള്‍സ്ട്രീറ്റ് ജേണല്‍ റിപ്പോര്‍ട്ട്; യുഎസ് വിദഗ്ധര്‍ പൈലറ്റിനെ പഴിക്കുമ്പോള്‍ വിയോജിച്ച് ഇന്ത്യന്‍ വിദഗ്ധര്‍; ബ്ലാക്ക് ബോക്‌സ് പരിശോധനയിലും ഇന്ത്യ-യുഎസ് തര്‍ക്കമെന്ന് വെളിപ്പെടുത്തല്‍
ദുരന്തം കണ്‍മുന്നില്‍ കണ്ട ഫസ്റ്റ് ഓഫീസര്‍ ക്ലൈവ് സുന്ദര്‍ പരിഭ്രാന്തനായി ' ഓ..ഷി** എന്ന് അലറി
അഹമ്മദാബാദ്: അഹമ്മദാബാദ് വിമാന ദുരന്തത്തെക്കുറിച്ച് (ബോയിങ് 737 മാക്‌സ് വിമാനം) പുതിയ വെളിപ്പെടുത്തലുകളുമായി യുഎസ് മാധ്യമമായ വാള്‍ സ്ട്രീറ്റ് ജേണല്‍. വിമാനാപകട അന്വേഷണത്തിനിടെ ഇന്ത്യയിലെയും യുഎസിലെയും ഉദ്യോഗസ്ഥര്‍ തമ്മില്‍ രൂക്ഷമായ അഭിപ്രായ ഭിന്നതയുണ്ടായി എന്നും റിപ്പോര്‍ട്ടില്‍ പറയുന്നു.
കോക്പിറ്റിലെ സംഭാഷണങ്ങള്‍: പരിഭ്രാന്തിയും ശാന്തതയും
ദുരന്തം കണ്‍മുന്നില്‍ കണ്ട ഫസ്റ്റ് ഓഫിസര്‍ ക്ലൈവ് കുന്ദര്‍ പരിഭ്രാന്തനായി 'ഓ... ഷി*' എന്ന് അലറി. എന്നാല്‍, വിമാനം നിയന്ത്രിച്ചിരുന്ന ക്യാപ്റ്റന്‍ സുമീത് സബര്‍വാള്‍ ശാന്തനായിരുന്നുവെന്നാണ് വോയിസ് റെക്കോര്‍ഡറിലുള്ളതെന്നാണ് റിപ്പോര്‍ട്ട് അവകാശപ്പെടുന്നത്.
ക്യാപ്റ്റന്‍ സബര്‍വാള്‍ വിമാനത്തിന്റെ യോക്ക് പൂര്‍വസ്ഥിതിയിലാക്കാന്‍ ശ്രമിച്ചില്ലെന്നും, ഫസ്റ്റ് ഓഫിസറാണ് 'പുള്‍ അപി'ന് ശ്രമിച്ചതെന്നും റിപ്പോര്‍ട്ടില്‍ പറയുന്നു. പൈലറ്റ് മനഃപൂര്‍വം വിമാനം തകര്‍ത്തതാകാം എന്നതിലേക്ക് തെളിവുകള്‍ വിരല്‍ചൂണ്ടുന്നുവെന്നാണ് പല അമേരിക്കന്‍ സര്‍ക്കാര്‍-വ്യവസായ ഉദ്യോഗസ്ഥരുടെയും 'സ്വകാര്യ അഭിപ്രായം' എന്ന് പത്രം ആവര്‍ത്തിച്ചു.
ഡല്‍ഹിയില്‍ വെച്ച് വിശകലനം ചെയ്ത ഡാറ്റ കാണിക്കുന്നത്, ടേക്ക് ഓഫിന് തൊട്ടുപിന്നാലെ രണ്ട് എഞ്ചിനുകളിലേക്കുമുള്ള ഇന്ധന പ്രവാഹം നിയന്ത്രിക്കുന്ന സ്വിച്ചുകള്‍ 'കട്ട്-ഓഫ്' സ്ഥാനത്തേക്ക് മാറ്റിയിരുന്നു എന്നാണ്. കോക്പിറ്റ് റെക്കോര്‍ഡിംഗുകള്‍ അനുസരിച്ച്, ഫസ്റ്റ് ഓഫിസര്‍ വിമാനം രക്ഷിക്കാന്‍ ശ്രമിക്കുമ്പോള്‍ ക്യാപ്റ്റന്‍ ശാന്തനായിരുന്നുവെന്നും, ഈ കണ്ടെത്തലുകള്‍ അപകടം മനഃപൂര്‍വമാണെന്ന അമേരിക്കന്‍ ആശങ്കകള്‍ക്ക് ആക്കം കൂട്ടിയെന്നും വാല്‍സ്ട്രീറ്റ് ജേണല്‍ റിപ്പോര്‍ട്ടിലുണ്ട്.
എന്നാല്‍, ഇന്ത്യന്‍ ഉദ്യോഗസ്ഥര്‍ ഈ വ്യാഖ്യാനത്തോട് പൂര്‍ണ്ണമായി യോജിക്കുന്നില്ല, എയര്‍ക്രാഫ്റ്റ് ആക്സിഡന്റ് ഇന്‍വെസ്റ്റിഗേഷന്‍ ബ്യൂറോയുടെ (AAIB) പ്രാഥമിക റിപ്പോര്‍ട്ടില്‍ ആരാണ് സ്വിച്ചുകള്‍ മാറ്റിയതെന്നോ ആര്‍ക്കാണ് കുറ്റമെന്നോ വ്യക്തമാക്കിയിരുന്നില്ല.
സുപ്രീം കോടതി ഇടപെടല്‍
വിമാനാപകടത്തില്‍ മരിച്ച പൈലറ്റ് ക്യാപ്റ്റന്‍ സുമീത് സബര്‍വാളിന്റെ 91 വയസ്സുള്ള പിതാവ് പുഷ്‌കര്‍ രാജ് സബര്‍വാള്‍ നല്‍കിയ ഹര്‍ജിയില്‍ നവംബര്‍ 7-ന് സുപ്രീം കോടതി കേന്ദ്ര സര്‍ക്കാരിനും ഡിജിസിഎക്കും നോട്ടീസ് അയച്ചിരുന്നു. അപകടത്തില്‍ ആരെയും കുറ്റപ്പെടുത്താനാവില്ലെന്നും അത് ഒരു അപകടം മാത്രമായിരുന്നുവെന്നും പൈലറ്റ് കുറ്റക്കാരനല്ലെന്നും ബെഞ്ച് വാക്കാല്‍ നിരീക്ഷിച്ചു.
പൈലറ്റിന്റെ പെരുമാറ്റം മാത്രം അന്വേഷിക്കുന്നത് യഥാര്‍ത്ഥ മെക്കാനിക്കല്‍ പ്രശ്നങ്ങള്‍ മറച്ചുവെക്കാന്‍ സാധ്യതയുണ്ടെന്നും, അതിനാല്‍ സ്വതന്ത്രമായ, കോടതിയുടെ മേല്‍നോട്ടത്തിലുള്ള അന്വേഷണം വേണമെന്നും ഹര്‍ജിയില്‍ ആവശ്യപ്പെടുന്നു.
ബ്ലാക്ക് ബോക്‌സ് പരിശോധനയിലെ തര്‍ക്കം
എയര്‍ ഇന്ത്യ വിമാനാപകടത്തിന്റെ അന്വേഷണം നടത്തുന്ന ഇന്ത്യന്‍ ഉദ്യോഗസ്ഥരും സഹായിക്കുന്ന യുഎസ് വിദഗ്ധരും തമ്മില്‍ 'സംശയങ്ങള്‍, പിരിമുറുക്കം, ആശയവിനിമയത്തിലെ പോരായ്മകള്‍' എന്നിവ പ്രകടമായിരുന്നുവെന്നും വാള്‍സ്്ട്രീറ്റ ജേണല്‍ റിപ്പോര്‍ട്ടില്‍ പറയുന്നു.
രണ്ട് യുഎസ് നാഷണല്‍ ട്രാന്‍സ്‌പോര്‍ട്ടേഷന്‍ സേഫ്റ്റി ബോര്‍ഡ് (NTSB) സ്‌പെഷ്യലിസ്റ്റുകള്‍ ന്യൂഡല്‍ഹിയില്‍ എത്തിയപ്പോള്‍ ഇന്ത്യന്‍ അധികൃതര്‍ ബ്ലാക്ക് ബോക്‌സ് വിവരങ്ങള്‍ വിശകലനം ചെയ്യുന്നതിനായി അവരെ രാത്രി വൈകി സൈനിക വിമാനത്തില്‍ ഒരു 'വിദൂര രഹസ്യ കേന്ദ്രത്തിലേക്ക്' കൊണ്ടുപോകാന്‍ ശ്രമിച്ചു. NTSB ചെയര്‍പേഴ്‌സണായ ജെന്നിഫര്‍ ഹോമന്‍ഡി സുരക്ഷാ കാരണങ്ങള്‍ ചൂണ്ടിക്കാട്ടി അടിയന്തിരമായി ഇടപെട്ടു. യുഎസ് സ്റ്റേറ്റ് ഡിപ്പാര്‍ട്ട്മെന്റ് നല്‍കിയ സുരക്ഷാ മുന്നറിയിപ്പുകളുടെ അടിസ്ഥാനത്തില്‍ എംബസി ഉദ്യോഗസ്ഥരെ വിമാനത്താവളത്തിലേക്ക് അയച്ച് വിദഗ്ധരെ തടഞ്ഞു, അവര്‍ ഡല്‍ഹിയില്‍ തന്നെ തുടര്‍ന്നു.
ഡല്‍ഹിയിലോ വാഷിംഗ്ടണിലോ വെച്ച് ബ്ലാക്ക് ബോക്‌സ് ഡാറ്റ ഉടന്‍ പുറത്തെടുക്കണമെന്ന് യുഎസ് പക്ഷം ആവര്‍ത്തിച്ച് ആവശ്യപ്പെട്ടു. കാലതാമസം തുടര്‍ന്നാല്‍ അമേരിക്കന്‍ സഹായം പിന്‍വലിക്കുമെന്ന് ഹോമന്‍ഡി മുന്നറിയിപ്പ് നല്‍കി. ഒടുവില്‍ ഇന്ത്യന്‍ ഉദ്യോഗസ്ഥര്‍ വഴങ്ങുകയും, വിദൂര ലാബിന് പകരം NTSB നല്‍കിയ പ്രത്യേക ഉപകരണങ്ങള്‍ ഉപയോഗിച്ച് ഡല്‍ഹിയില്‍ വെച്ച് ബ്ലാക്ക് ബോക്‌സ് ഡാറ്റ ഡൗണ്‍ലോഡ് ചെയ്യാന്‍ സമ്മതിക്കുകയും ചെയ്തു. 'കടുത്ത സംഘര്‍ഷത്തിന്റെ നിമിഷം' എന്നാണ് വാള്‍സ്ട്രീറ്റ് ജേണല്‍ വിശേഷിപ്പിച്ചത്.
