രാവിലെ ബിഹാർ പോലീസ് ആസ്ഥാനത്ത് നിന്ന് അതിർത്തി പ്രദേശങ്ങളിലേക്ക് അലർട്ട് കോൾ; രാജ്യത്തെ ഞെട്ടിച്ച് മൂന്ന് പാക്ക് ഭീകരർ നുഴഞ്ഞുകയറിയെന്ന് റിപ്പോർട്ടുകൾ; നേപ്പാൾ വഴി കടന്ന് ബുദ്ധി; എല്ലാം നിരീക്ഷിച്ച് ഇന്റലിജൻസ്; അതീവ ജാഗ്രത
പട്ന: നേപ്പാളിലെ കാഠ്മണ്ഡു വഴി മൂന്ന് പാക്ക് ഭീകരർ രാജ്യത്ത് പ്രവേശിച്ചതായി രഹസ്യാന്വേഷണ വിഭാഗത്തിന് ലഭിച്ച വിവരത്തെ തുടർന്ന് ബിഹാറിൽ അതീവ ജാഗ്രത പുലർത്തുന്നു. പാകിസ്ഥാൻ ആസ്ഥാനമായുള്ള ജെയ്‌ഷെ മുഹമ്മദ് (ജെ.ഇ.എം) സംഘടനാംഗങ്ങളാണ് ഇവർ എന്നാണ് റിപ്പോർട്ടുകൾ വ്യക്തമാക്കുന്നത്. ഓഗസ്റ്റ് 15-ന് അരാരിയ വഴി ഇവർ ബിഹാറിൽ പ്രവേശിച്ചതായി ഇന്റലിജൻസ് വിവരങ്ങൾ സൂചിപ്പിക്കുന്നു.
ഭീകരരുടെ തിരിച്ചറിയൽ വിവരങ്ങൾ പങ്കുവെച്ചതായി ബിഹാർ പൊലീസ് അറിയിച്ചു. റാവൽപിണ്ടി സ്വദേശിയായ ഹസ്‌നാനിൻ അലി, ഉമർകോട്ടിൽ നിന്നുള്ള ആദിൽ ഹുസൈൻ, ഭവാൽപൂരിൽ നിന്നുള്ള മുഹമ്മദ് ഉസ്മാൻ എന്നിവരാണ് ഇവർ. ഈ മൂന്ന് ഭീകരർ ഓഗസ്റ്റ് ആദ്യ വാരത്തിൽ പാകിസ്ഥാനിൽ നിന്ന് നേപ്പാളിലേക്ക് കടന്നതായും തുടർന്ന് ഓഗസ്റ്റ് 15-ന് ബിഹാറിലേക്ക് നുഴഞ്ഞുകയറിയതായും വിവരങ്ങൾ പുറത്തുവന്നിട്ടുണ്ട്.
സംസ്ഥാന പൊലീസ് ആസ്ഥാനം മൂന്ന് ഭീകരരുടെയും പേരുകൾ, ഫോട്ടോഗ്രാഫുകൾ, പാസ്‌പോർട്ട് വിവരങ്ങൾ എന്നിവ അതിർത്തി സംസ്ഥാനങ്ങളിലേക്ക് കൈമാറിയിട്ടുണ്ട്. സംസ്ഥാനമെമ്പാടും ജാഗ്രതാ നിർദ്ദേശം നൽകിയിരിക്കുകയാണ്. ദേശവിരുദ്ധ ശക്തികളുടെ ഏതൊരു നീക്കവും തടയുന്നതിനായി പട്രോളിംഗും തിരച്ചിൽ പ്രവർത്തനങ്ങളും ശക്തമാക്കിയിട്ടുണ്ടെന്ന് ബിഹാർ ഡിജിപി വിനയ് കുമാർ അറിയിച്ചു.
സംസ്ഥാന നിയമസഭാ തെരഞ്ഞെടുപ്പ് അടുത്തിരിക്കെയാണ് ഈ നുഴഞ്ഞുകയറ്റ റിപ്പോർട്ട് പുറത്തുവന്നിരിക്കുന്നത്. ഇതിന്റെ പശ്ചാത്തലത്തിൽ വിമാനത്താവളങ്ങൾ, റെയിൽവേ സ്റ്റേഷനുകൾ എന്നിവിടങ്ങളിലെ സുരക്ഷ വർദ്ധിപ്പിച്ചിട്ടുണ്ട്. പ്രാദേശിക തലത്തിൽ സംശയാസ്പദമായ പ്രവർത്തനങ്ങൾ നിരീക്ഷിക്കുന്നതിനായി ഇന്റലിജൻസ് യൂണിറ്റുകൾക്ക് നിർദ്ദേശം നൽകിയിട്ടുണ്ട്.
ഇന്റലിജൻസ് റിപ്പോർട്ടുകളെ തുടർന്നുള്ള മുൻകരുതൽ നടപടിയുടെ ഭാഗമായി രാജ്ഗിർ, ബോധ്ഗയ, പട്ന തുടങ്ങിയ വിവിധ പ്രധാന കേന്ദ്രങ്ങളിലും വിനോദസഞ്ചാര കേന്ദ്രങ്ങളിലും സുരക്ഷാ ക്രമീകരണങ്ങൾ ശക്തമാക്കിയിട്ടുണ്ട്. ബോധ്ഗയയിലെ മഹാബോധി ക്ഷേത്ര സമുച്ചയം, രാജ്ഗിറിലെ വിശ്വശാന്തി സ്തൂപം, പട്നയിലെ മഹാവീർ ക്ഷേത്രം, തഖത് ശ്രീ ഹരിമന്ദിർ ജി, പട്ന സാഹിബ് തുടങ്ങിയ തിരക്കേറിയ സ്ഥലങ്ങളിലും സുരക്ഷ ഉറപ്പാക്കിയിട്ടുണ്ട്. ഈ സാഹചര്യത്തിൽ രാജ്യത്തിന്റെ സുരക്ഷക്ക് ഭീഷണിയുയർത്തുന്ന ഏതൊരു നീക്കവും തടയുന്നതിനുള്ള പ്രതിരോധ നടപടികൾ സർക്കാർ സ്വീകരിച്ചുവരുന്നു.
