കോട്ടയം: ഗൂഗിൾ മാപ്പു നോക്കി യാത്ര ചെയ്തു പണി കിട്ടിയവർ മുമ്പും ഉണ്ടായിട്ടുണ്ട്. ഇപ്പോഴിത, ഗൂഗിളിൽ എളുപ്പവഴി തിരഞ്ഞു പോയവർ ശരിക്കും വെട്ടിലായി. ഗൂഗിൾ മാപ്പ് നോക്കി കാറിൽ യാത്ര ചെയ്ത സംഘം തോട്ടിൽ വീഴുകയായിരുന്നു. കോട്ടയം കുറുപ്പുന്തറ കടവ് പാലത്തിന് സമീപം ശനിയാഴ്ച പുലർച്ചെ മൂന്ന് മണിയോടെയാണ് അപകടം നടന്നത്.

യാത്രക്കാരെയെല്ലാം രക്ഷപ്പെടുത്തി. ഹൈദരാബാദിൽ നിന്നെത്തിയ സംഘമാണ് അപകടത്തിൽപ്പെട്ടത്. മൂന്നാറിൽ നിന്ന് ആലപ്പുഴയിലേക്ക് പോകുന്ന വഴിയായിരുന്നു അപകടം. നാല് യുവാക്കളായിരുന്നു വാഹനതതിൽ ഉണ്ടായിരുന്നത്. വാഹനം തോട്ടിൽ വീണതോടെ പിൻഡോർ തുറന്നാണ് യാത്രക്കാർ രക്ഷപെട്ടത്.

കടവ് പാലത്തിന് എത്തുന്നതിന് മുമ്പായി രണ്ട് പ്രധാനപ്പെട്ട റോഡുകളാണുള്ളത്. തോടിന്റെ വശത്തുകൂടിയുള്ള റോഡും ആലപ്പുഴയിലേക്കുള്ള റോഡും. ആലപ്പുഴയിലേക്കുള്ള റോഡ് പലപ്പോഴും ഗൂഗിൾ മാപ്പിൽ കാണിക്കാറില്ലെന്നാണ് നാട്ടുകാർ പറയുന്നത്. ഇങ്ങനെ തോട്ടിലേക്ക് ഗൂഗിൾ മാപ്പ് തെറ്റായി കാണിച്ച പാതയാണ് അപകടത്തിലേക്ക് നയിച്ചത്.

മഴയുണ്ടായിരുന്നതിനാൽ തോട്ടിൽ നല്ല ഒഴുക്കുണ്ടായിരുന്നു. കൃത്യ സമയത്തെ നാട്ടുകാരുടെയും പൊലീസിന്റെയും ഇടപ്പെടലിൽ യാത്രികരെ രക്ഷിക്കാൻ കഴിഞ്ഞു. അതേസമയം കാർ ഒഴുകിപ്പോയി. ഒഴുകി പോയ കാർ കണ്ടെത്തി തോട്ടിൽ നിന്നും പുറത്തെത്തിച്ചിട്ടുണ്ട്. നേരത്തെയും ഗൂഗിൾ മാപ്പ് നോക്കി സഞ്ചരിച്ച വാഹനം കോട്ടയത്ത് അപകടത്തിൽപ്പെട്ടിരുന്നു.