ഹൈദരാബാദ്: നഗരമധ്യത്തിൽ നിയമവിരുദ്ധമായി ഗ്യാസ് സിലിണ്ടറുകൾ സംഭരിക്കുകയും കൊള്ളവിലയ്ക്ക് വിൽക്കുകയും ചെയ്ത പത്തംഗ സംഘത്തെ പോലീസ് പിടികൂടി. ബഞ്ചാര ഹിൽസ് കേന്ദ്രീകരിച്ച് പ്രവർത്തിച്ചിരുന്ന സംഘത്തിൽ നിന്ന് 21.88 ലക്ഷം രൂപ വിലമതിക്കുന്ന 414 സിലിണ്ടറുകളും പത്ത് വിതരണ വാഹനങ്ങളും പിടിച്ചെടുത്തു. രഹസ്യവിവരത്തെത്തുടർന്ന് ജൂബിലി ഹിൽസ് സോൺ ടാസ്‌ക് ഫോഴ്സ് ഞായറാഴ്ച നടത്തിയ മിന്നൽ പരിശോധനയിലാണ് പ്രതികൾ വലയിലായത്.

ഷംഷാബാദിലെ 'മെട്രോ ഗ്യാസ് ഏജൻസി' ഉടമയായ മുഹമ്മദ് ആമിർ (42) ആണ് തട്ടിപ്പിന്റെ സൂത്രധാരൻ. തന്റെ ഏജൻസിയിലേക്ക് വരുന്ന സിലിണ്ടറുകൾ നാഗാർജുന എക്സ് റോഡിന് സമീപമുള്ള ഒരു ശ്മശാനത്തിലേക്ക് മാറ്റിയാണ് ഇയാൾ തട്ടിപ്പ് നടത്തിയിരുന്നത്. തൊഴിലാളികളുടെയും ഡ്രൈവർമാരുടെയും സഹായത്തോടെ ഇവിടെ സിലിണ്ടറുകൾ സുരക്ഷിതമല്ലാത്ത രീതിയിൽ കൂട്ടിയിടുകയായിരുന്നു.

അടിയന്തരമായി സിലിണ്ടറുകൾ ആവശ്യമുള്ളവരെ ലക്ഷ്യം വെച്ചായിരുന്നു ഇവരുടെ പ്രവർത്തനം. സർക്കാർ നിശ്ചയിച്ച നിരക്കിനേക്കാൾ വലിയ തുകയാണ് സംഘം ഈടാക്കിയിരുന്നത്. പിടിയിലായവരിൽ ഡെലിവറി തൊഴിലാളികൾ, ഡ്രൈവർമാർ, സിലിണ്ടറുകൾ സൂക്ഷിക്കാൻ സ്ഥലം വാടകയ്ക്ക് നൽകിയ വ്യക്തി എന്നിവരും ഉൾപ്പെടുന്നു.

പോലീസ് നടത്തിയ റെയ്ഡിൽ വൻതോതിലുള്ള സിലിണ്ടർ ശേഖരവും വാഹനങ്ങളുമാണ് പിടിച്ചെടുത്തത്. ഇതിൽ 47 കിലോയുടെ 30 കൊമേഴ്‌സ്യൽ സിലിണ്ടറുകൾ, 19 കിലോയുടെ 148 സിലിണ്ടറുകൾ, 5 കിലോയുടെ 35 സിലിണ്ടറുകൾ എന്നിവ ഉൾപ്പെടുന്നു. കൂടാതെ 192 എണ്ണം 19 കിലോയുടേതും 9 എണ്ണം 5 കിലോയുടേതുമായി ആകെ 201 ഒഴിഞ്ഞ സിലിണ്ടറുകളും കണ്ടെടുത്തു. സിലിണ്ടറുകൾ കടത്താൻ ഉപയോഗിച്ചിരുന്ന രണ്ട് ഡിസിഎം വാനുകൾ, രണ്ട് ബോലേറോ വാഹനങ്ങൾ, ടാറ്റ എയ്‌സ്, ടാറ്റ ഇൻട്രാ, ടാറ്റ മാജിക് എന്നിവയ്ക്ക് പുറമെ നാല് ഓട്ടോറിക്ഷകളും പോലീസ് കസ്റ്റഡിയിലെടുത്തു.

"സുരക്ഷാ മാനദണ്ഡങ്ങൾ കാറ്റിൽ പറത്തിയാണ് ജനവാസ മേഖലയ്ക്ക് സമീപം സിലിണ്ടറുകൾ സൂക്ഷിച്ചിരുന്നത്. ഇത് വലിയ അപകടങ്ങൾക്ക് കാരണമാകുമായിരുന്നു. അനധികൃത വിൽപനക്കാർക്കെതിരെ കർശന നടപടി തുടരും."ഗെയ്‌ക്‌വാദ് വൈഭവ് രഘുനാഥ്, ഡിസിപി. അനധികൃത വിൽപനക്കാരിൽ നിന്ന് സിലിണ്ടറുകൾ വാങ്ങരുതെന്നും ഇത്തരം പ്രവർത്തനങ്ങൾ ശ്രദ്ധയിൽപ്പെട്ടാൽ ഉടൻ പോലീസിനെ അറിയിക്കണമെന്നും അധികൃതർ പൊതുജനങ്ങളോട് അഭ്യർത്ഥിച്ചു.

ഗ്യാസ് സിലിണ്ടർജൂബിലി ഹിൽസ് സോൺടാസ്‌ക് ഫോഴ്സ്

സ്വന്തം ലേഖകൻ