തിരഞ്ഞെടുപ്പ് കമ്മീഷന് എസ് ഐ ആര് സമയപരിധി നീട്ടി; 5 സംസ്ഥാനങ്ങള്ക്കും ഒരു കേന്ദ്രഭരണ പ്രദേശത്തിനും ഒരാഴ്ച കൂടി സമയം; ബംഗാള് അടക്കം നാല് സംസ്ഥാനങ്ങള്ക്ക് മാറ്റമില്ല; വോട്ടര്പട്ടിക പുതുക്കാന് ഇനി കൂടുതല് അവസരം; എസ് ഐ ആര് സമയപരിധി നീട്ടുന്നത് ഇതുരണ്ടാം തവണ
തിരഞ്ഞെടുപ്പ് കമ്മീഷന് എസ് ഐ ആര് സമയപരിധി നീട്ടി
ന്യൂഡല്ഹി: വോട്ടര് പട്ടിക തീവ്ര പരിഷ്കരണ സമയപരിധി കേന്ദ്ര തിരഞ്ഞെടുപ്പ് കമ്മീഷന് നീട്ടി. അഞ്ച് സംസ്ഥാനങ്ങളിലും ഒരു കേന്ദ്രഭരണ പ്രദേശത്തും സ്പെഷ്യല് ഇന്റന്സീവ് റിവിഷന് (SIR) സമര്പ്പിക്കാനുള്ള സമയപരിധി കമ്മീഷന് (ECI) ഒരാഴ്ചത്തേക്കാണ് നീട്ടിയത്. തമിഴ്നാട്, ഗുജറാത്ത്, മധ്യപ്രദേശ്, ഛത്തീസ്ഗഢ്, ഉത്തര്പ്രദേശ് എന്നീ സംസ്ഥാനങ്ങള്ക്കും ആന്ഡമാന് നിക്കോബാര് ദ്വീപുകള് കേന്ദ്രഭരണ പ്രദേശത്തിനുമാണ് സമയം നീട്ടിനല്കിയിട്ടുള്ളത്. അതേസമയം, ഗോവ, ലക്ഷദ്വീപ്, രാജസ്ഥാന്, പശ്ചിമബംഗാള് എന്നിവിടങ്ങളിലെ വോട്ടര് പട്ടിക പുതുക്കല് കാലാവധി ഇന്നവസാനിച്ചു. സമയപരിധി കമ്മീഷന് നീട്ടിയില്ല.
വരാനിരിക്കുന്ന തിരഞ്ഞെടുപ്പുകള്ക്ക് മുന്നോടിയായി വോട്ടര് പട്ടികയില് തങ്ങളുടെ പേരുകള് ശരിയായി ഉള്പ്പെടുത്തുന്നുണ്ടെന്ന് ഉറപ്പാക്കാന് വോട്ടര്മാര്ക്ക് ഇത് കൂടുതല് സമയം നല്കും. പുതുക്കിയ സമയക്രമമനുസരിച്ച്, തമിഴ്നാടും ഗുജറാത്തും ഡിസംബര് 14, 2025 (ഞായര്) എന്ന മുന് സമയപരിധിക്ക് പകരം ഡിസംബര് 19, 2025 (വെള്ളി) നകം SIR സമര്പ്പിക്കണം. മധ്യപ്രദേശ്, ഛത്തീസ്ഗഢ്, ആന്ഡമാന് നിക്കോബാര് ദ്വീപുകള് എന്നിവിടങ്ങളില് ഡിസംബര് 18, 2025 (വ്യാഴം) എന്നതിന് പകരം ഡിസംബര് 23, 2025 (ചൊവ്വ) വരെ സമയം ലഭിക്കും. ഏറ്റവും ഒടുവില് സമയപരിധിയുണ്ടായിരുന്ന ഉത്തര്പ്രദേശിന് ഡിസംബര് 26, 2025 (വെള്ളി) എന്നതിന് പകരം ഡിസംബര് 31, 2025 (ബുധന്) വരെയാണ് പുതുക്കിയ സമയം.
ഈ സമയപരിധി നീട്ടിയതിലൂടെ, വോട്ടര്മാര്ക്ക് അവരുടെ പേരുകള് വോട്ടര് പട്ടികയില് കൃത്യമായി ഉള്പ്പെടുത്തിയിട്ടുണ്ടോ എന്ന് പരിശോധിക്കാനും ആവശ്യമായ തിരുത്തലുകള് വരുത്താനും സാധിക്കും. കൂടാതെ, ബൂത്ത് ലെവല് ഓഫീസര്മാര്ക്കും (BLOs) ബൂത്ത് ലെവല് ഏജന്റുമാര്ക്കും വോട്ടര് പട്ടികയില് നിന്ന് ഒഴിവാക്കപ്പെട്ടവര്, മാറ്റിപ്പാര്പ്പിക്കപ്പെട്ടവര്, മരണപ്പെട്ടവര്, ഇരട്ടിച്ച പേരുകളുള്ളവര് എന്നിവരുടെ പട്ടിക പങ്കിടാന് ഏഴ് അധിക ദിവസം ലഭിക്കും.
ഇത് രണ്ടാം തവണയാണ് തിരഞ്ഞെടുപ്പ് കമ്മീഷന് SIR സമയപരിധി നീട്ടുന്നത്. നേരത്തെ നവംബര് 30-ന്, 12 സംസ്ഥാനങ്ങളിലും കേന്ദ്രഭരണ പ്രദേശങ്ങളിലും ഒരാഴ്ചത്തേക്ക് സ്പെഷ്യല് ഇന്റന്സീവ് റിവിഷന് ഷെഡ്യൂള് തിരഞ്ഞെടുപ്പ് കമ്മീഷന് ദീര്ഘിപ്പിച്ചിരുന്നു.
