തീവ്രവോട്ടര്‍ പട്ടിക പരിഷ്‌കരണത്തിന് സമയപരിധി നീട്ടി; ഡിസംബര്‍ പതിനൊന്ന് വരെ ഫോമുകള്‍ തിരികെ നല്‍കാം, കരട് പ്രസിദ്ധീകരിക്കുന്നത് പതിനാറ് വരെ; സമയപരിധി നീട്ടിയത് കേരളമടക്കം പന്ത്രണ്ട് സംസ്ഥാനങ്ങളിൽ; തീരുമാനം ബി എല്‍ ഒമാരുടെ പരാതികൾ ഉയർന്ന സാഹചര്യത്തിൽ
ന്യൂഡല്‍ഹി: തീവ്രവോട്ടര്‍ പട്ടിക പരിഷ്‌കരണത്തിന് സമയപരിധി നീട്ടി കേന്ദ്ര തിരഞ്ഞെടുപ്പ് കമ്മീഷന്‍. ഫോമുകള്‍ തിരികെ നല്‍കാന്‍ ഡിസംബര്‍ പതിനൊന്ന് വരെ സമയം ഉണ്ട്. പതിനാറ് വരെ കരട് പ്രസിദ്ധീകരിക്കും. ഫെബ്രുവരി പതിനാലിനാണ് അന്തിമ വോട്ടര്‍ പട്ടിക. കേരളമടക്കം പന്ത്രണ്ട് ഇടങ്ങളിലാണ് സമയപരിധി നീട്ടിയത്. ബി എല്‍ ഒമാരുടെ പരാതി അടക്കം പരിശോധിച്ചാണ് തീരുമാനം. പല സംസ്ഥാനങ്ങളിലും ബി എല്‍ ഒമാര്‍ കടുത്ത സമ്മര്‍ദ്ദത്തിലായിരുന്നു.
രാജ്യത്തുടനീളം നടക്കുന്ന തീവ്ര വോട്ടര്‍ പട്ടിക പരിഷ്കരണം ഉടന്‍ നിര്‍ത്തിവയ്ക്കണമെന്ന് പ്രതിപക്ഷ പാര്‍ട്ടികള്‍ ആവശ്യപ്പെടുന്നുണ്ട്. സുതാര്യവും പൗരസൗഹൃദവുമായ ഒരു പ്രക്രിയ വോട്ടര്‍ പട്ടികയുടെ സമഗ്രതയെയും ആ ജോലി ഏറ്റെടുക്കാന്‍ നിര്‍ബന്ധിതരായവരുടെ സുരക്ഷയെയും ഭീഷണിപ്പെടുത്തുന്ന ഒന്നായി മാറിയിരിക്കുന്നു. മുഴുവന്‍ പ്രക്രിയയും വളരെ തിരക്കേറിയതും ആസൂത്രണം ചെയ്യാത്തതുമായ രീതിയിലാണ് നടത്തുന്നത്.
ബൂത്ത് ലെവല്‍ ഓഫീസര്‍മാര്‍ക്ക് (ബിഎല്‍ഒ) പരിശോധന പൂര്‍ത്തിയാക്കാന്‍ അസാധ്യമായ സമയപരിധി നല്‍കിയിട്ടുണ്ട്. പലയിടങ്ങളിലും ബിഎല്‍ഒമാര്‍ ചില പാര്‍ട്ടി ഓഫീസുകളില്‍ തമ്പടിച്ച് വോട്ടര്‍മാരെ സന്ദര്‍ശിക്കാന്‍ ആവശ്യപ്പെടുന്നതായി പരാതികള്‍ ഉയര്‍ന്നിട്ടുണ്ട്. ഇതെല്ലാം പിശകുകള്‍ക്ക് ഇടയാക്കുമെന്നാണ് വിലയിരുത്തല്‍.
ബിഎല്‍ഒമാരുടെ മേല്‍ ഉണ്ടായിട്ടുള്ള വലിയ സമ്മര്‍ദ്ദം ഇതിനകം നിരവധി ജീവന്‍ അപഹരിച്ചു. മതിയായ വിശ്രമമോ സുരക്ഷാ സംവിധാനങ്ങളോ ഇല്ലാതെ അവര്‍ കഠിനമായ ജോലിഭാരത്തില്‍ ജോലി ചെയ്യുന്നു. ഇവ ആകസ്മികമായ അപകടങ്ങളല്ല നിരുത്തരവാദപരവും മനുഷ്യത്വരഹിതവുമായ ഒരു ഭരണ പ്രക്രിയയുടെ നേരിട്ടുള്ള ഫലമാണ്. തിരഞ്ഞെടുപ്പ് കമ്മീഷന്‍ ഈ തെറ്റായ പ്രക്രിയ ഉടന്‍ നിര്‍ത്തിവയ്ക്കണം. വലിയൊരു വിഭാഗം ആളുകളുടെ വോട്ടവകാശം നിഷേധിക്കുന്നത് അവസാനിപ്പിക്കണമെന്നുമാണ് പ്രതിപക്ഷം നിലപാട്.
