പുതുവർഷം അടിപൊളിയായി ആഘോഷിക്കാൻ സുഹൃത്തിനൊപ്പം വാട്ടർ ടാങ്കിന് മുകളിൽ കയറി; ഷിജോ അബദ്ധത്തിൽ താഴെ വീണത് കണ്ട് നാട്ടുകാർ നോക്കിയപ്പോൾ മുകളിൽ ഒരാൾ കൂടി അപകടാവസ്ഥയിൽ അവശനിലയിലായത് ശ്രദ്ധയിൽപെട്ടു; ഫയർഫോഴ്‌സ് എത്തി രക്ഷിച്ചതോടെ ഹാപ്പി ന്യൂഇയർ!
തൃശൂർ: പുതുവർഷം ആഘോഷിക്കാൻ പലവഴി തേടുന്നവരാണ് മലയാളികൾ. അത്തരത്തിൽ രണ്ട് പേർ ന്യൂഇയർ ആഘോഷിക്കാൻ വാട്ടർ ടാങ്കിന് മുകളിൽ കയറി ആകെ പുലിവാല് പിടിച്ചു. ഒടുവിൽ ഫയർഫോഴ്‌സ് എത്തിയാണ് കൂട്ടത്തിൽ ഒരാളെ പുറത്തിറക്കിയത്. വാട്ടർ ടാങ്കിന് മുകളിൽ കയറി ഇറങ്ങാനാകാതെ അവശ നിലയിൽ കിടന്നയാളെയാണ് അഗ്‌നിശമന രക്ഷാസേന രക്ഷിച്ചത്.
തൃശൂർ കോർപറേഷൻ പരിധിയിൽ ഡിവിഷൻ മൂന്നിൽ ഉള്ള വാട്ടർ ടാങ്കിന് മുകളിൽ പുതു വർഷം ആഘോഷിക്കാൻ കയറിയ വിയ്യൂർ കുളങ്ങര വീട്ടിൽ സുജീഷ്( 45) നെയാണ് തൃശൂരിൽ നിന്നുള്ള അഗ്‌നിശമനരക്ഷാസേന എത്തി രക്ഷപ്പെടുത്തിയത്. സുജീഷും സുഹൃത്ത് ഷിജോ (38)യുമാണ് വാട്ടർ ടാങ്കിന് മുകളിൽ രാത്രി കയറിയത്. ഷിജോ അബദ്ധത്തിൽ താഴെ വീണത് കണ്ടാണ് നാട്ടുകാർ മുകളിൽ ഒരാൾ കൂടി അപകടാവസ്ഥയിൽ കിടക്കുന്നത് കണ്ടത്.
ഉടൻ തന്നെ നാട്ടുകാർ ഷിജോയെ എടുത്ത് തൃശൂർ ജനറൽ ആശുപത്രിയിൽ എത്തിച്ചു. കാലപഴക്കം മൂലം ദ്രവിച്ച് നിൽക്കുന്ന ഇരുമ്പ് കോണിയിൽ കൂടി സുജീഷിനെ താഴെ ഇറക്കാൻ കഴിയാത്ത സാഹചര്യമായിരുന്നു ഉണ്ടായിരുന്നത്. ഇതോടെയാണ് വിയ്യൂർ പൊലീസും നാട്ടുകാരും അഗ്‌നിശമനരക്ഷാസേനയെ വിവരം അറിയിച്ചത്.
അഗ്‌നിശമനരക്ഷാസേന എത്തി വാഹനത്തിൽ നിന്നും 40 അടി ഉയരമുള്ള എണി 45 അടിയോളം ഉയരമുള്ള വാട്ടർ ടാങ്കിൽ വച്ചാണ് ഫയർ ആൻഡ് റെസ്‌ക്യൂ ഓഫീസർമാരായ വി. എസ് സ്മിനേഷ് കുമാർ,വി.വി. ജിമോദ് എന്നിവർ മുകളിൽ കയറി റോപ്, നെറ്റ് എന്നിവ ഉപയോഗിച്ച് കെട്ടി സുജീഷിനെ സുരക്ഷിതമായി താഴെയിറക്കിയത്.
തൃശൂർ ഫയർ & റെസ്‌ക്യൂ സ്റ്റേഷൻ അസി. സ്റ്റേഷൻ ഓഫീസർ സുരേഷ്‌കുമാർ.പി യുടെ നേൃത്വത്തിൽ ഫയർ ആൻഡ് റെസ്‌ക്യൂ ഓഫീസർമാരായ മഹേഷ് പി.എം,സബാപതി.എം,ജിബിൻ.ജേ എന്നിവരും ചേർന്നാണ് രക്ഷാപ്രവർത്തനം നടത്തിയത്.
