ന്യൂയോർക്ക്: ലോകമെമ്പാടുമുള്ള ബാങ്കുകൾ, ഗവൺമെന്റുകൾ, ടെക്നോളജി സ്ഥാപനങ്ങൾ എന്നിവയുടെ നിലവിലെ സൈബർ സുരക്ഷാ സംവിധാനങ്ങളെ നിഷ്പ്രഭമാക്കാൻ ശേഷിയുള്ള 'ക്വാണ്ടം കമ്പ്യൂട്ടർ' ഹാക്കർമാർ 2029-ഓടെ രംഗത്തെത്തിയേക്കുമെന്ന് ഗൂഗിളിന്റെ മുന്നറിയിപ്പ്. നിലവിലെ എൻക്രിപ്ഷൻ മാനദണ്ഡങ്ങൾക്ക് ക്വാണ്ടം കമ്പ്യൂട്ടറുകൾ വലിയ ഭീഷണിയാണെന്നും ഈ ദശകം അവസാനിക്കുന്നതിന് മുൻപ് തന്നെ സുരക്ഷാ സംവിധാനങ്ങൾ പരിഷ്കരിക്കണമെന്നും ഗൂഗിൾ ബ്ലോഗ് പോസ്റ്റിലൂടെ വ്യക്തമാക്കി.

ആൽഫബെറ്റിന്റെ ഉടമസ്ഥതയിലുള്ള ഗൂഗിൾ പറയുന്നത് ഇങ്ങനെ: "നിങ്ങളുടെ വിവരങ്ങൾ രഹസ്യമായും സുരക്ഷിതമായും സൂക്ഷിക്കാൻ നിലവിൽ ഉപയോഗിക്കുന്ന എൻക്രിപ്ഷൻ സംവിധാനങ്ങൾ വരും വർഷങ്ങളിൽ ഒരു വൻകിട ക്വാണ്ടം കമ്പ്യൂട്ടറിന് എളുപ്പത്തിൽ തകർക്കാൻ സാധിക്കും." അതിസങ്കീർണ്ണമായ കണക്കുകൂട്ടലുകൾ അതിവേഗം പൂർത്തിയാക്കാൻ ശേഷിയുള്ള ക്വാണ്ടം കമ്പ്യൂട്ടറുകൾ നിലവിൽ പരീക്ഷണ ഘട്ടത്തിലാണ്. ഗൂഗിൾ, മൈക്രോസോഫ്റ്റ് തുടങ്ങിയ വമ്പന്മാരും പ്രമുഖ സർവ്വകലാശാലകളും ഈ സാങ്കേതികവിദ്യ വികസിപ്പിക്കാനുള്ള തീവ്രശ്രമത്തിലാണ്.

ലക്ഷക്കണക്കിന് ക്യുബിറ്റുകൾ ഉള്ള കരുത്തുറ്റ ക്വാണ്ടം കമ്പ്യൂട്ടറുകൾ നിർമ്മിക്കുക എന്നത് സാങ്കേതികമായി വലിയ വെല്ലുവിളിയാണ്. അതിശൈത്യത്തിലുള്ള ഹീലിയം ഉപയോഗിച്ച് താപനില ക്രമീകരിക്കേണ്ടതും ലേസറുകൾ കൃത്യമായി വിന്യസിക്കേണ്ടതും ഇതിന് ആവശ്യമാണ്. നിലവിൽ എൻക്രിപ്ഷൻ തകർക്കാൻ ശേഷിയുള്ള ക്വാണ്ടം കമ്പ്യൂട്ടറുകൾ 2030-നും 2050-നും ഇടയിലേ യാഥാർത്ഥ്യമാകൂ എന്നാണ് ഭൂരിഭാഗം വിദഗ്ധരുടെയും അഭിപ്രായം. എന്നാൽ, ഈ ഭീഷണി മുന്നിൽക്കണ്ട് ഗവൺമെന്റുകൾ ഇപ്പോൾ തന്നെ ഒരുക്കങ്ങൾ തുടങ്ങിക്കഴിഞ്ഞു.

ക്വാണ്ടം കമ്പ്യൂട്ടറുകളെ പ്രതിരോധിക്കാൻ ശേഷിയുള്ള 'പോസ്റ്റ് ക്വാണ്ടം ക്രിപ്റ്റോഗ്രഫി'യിലേക്ക് മാറാനാണ് ഗൂഗിൾ എൻജിനീയറിങ് ടീമുകളോട് നിർദ്ദേശിക്കുന്നത്. ക്വാണ്ടം ഹാക്കിങ്ങിലെ ഏറ്റവും വലിയ അപകടം "ഇപ്പോൾ ശേഖരിക്കുക, പിന്നീട് ഡീക്രിപ്റ്റ് ചെയ്യുക" എന്ന തന്ത്രമാണ്. അതായത്, ഇന്നത്തെ സുരക്ഷാ സംവിധാനങ്ങളുള്ള ഡാറ്റ ഇപ്പോൾ ഹാക്കർമാർ മോഷ്ടിച്ച് സൂക്ഷിക്കുകയും, പത്തു വർഷത്തിന് ശേഷം ക്വാണ്ടം കമ്പ്യൂട്ടറുകൾ വരുമ്പോൾ അത് എളുപ്പത്തിൽ തുറന്ന് പരിശോധിക്കുകയും ചെയ്യാം.

"1920-ലെ ദേശീയ സുരക്ഷാ രേഖകൾക്ക് ഇന്ന് വലിയ പ്രസക്തിയുണ്ടാകില്ല. എന്നാൽ പത്ത് വർഷം മുൻപുള്ള രേഖകൾ ഇന്നും പ്രധാനപ്പെട്ടതാണ്. അവ പത്തു വർഷത്തിന് ശേഷമുള്ള ക്വാണ്ടം കമ്പ്യൂട്ടറുകൾക്ക് പോലും തുറക്കാൻ കഴിയാത്ത വിധം സുരക്ഷിതമാക്കേണ്ടതുണ്ട്," എന്ന് ക്വാണ്ടം വിദഗ്ധ ലിയോണി മ്യൂക്ക് ചൂണ്ടിക്കാട്ടി. 2035-ഓടെ ക്വാണ്ടം ഹാക്കർമാരെ പ്രതിരോധിക്കാൻ സജ്ജമാകണമെന്ന് ബ്രിട്ടനിലെ നാഷണൽ സൈബർ സെക്യൂരിറ്റി സെന്ററും നേരത്തെ സ്ഥാപനങ്ങൾക്ക് നിർദ്ദേശം നൽകിയിരുന്നു.

സൈബർ സുരക്ഷാക്വാണ്ടം കമ്പ്യൂട്ടർഹാക്കർമാർ

സ്വന്തം ലേഖകൻ