തിരുവനന്തപുരം: ഇന്നസെന്റ് വിടവാങ്ങി ഒരാഴ്‌ച്ച പിന്നിടുമ്പോൾ ഒരു വാക്കെങ്കിലും അദ്ദേഹത്തെക്കുറിച്ച് പറയാത്തവരോ എഴുതാത്തവരോ വിരളമായിരിക്കും. അങ്ങിനെയിരിക്കുമ്പോൾ അദ്ദേഹത്തിന്റെ കൂടെ സജീവമായുണ്ടായിരുന്ന ഇടവേള ബാബു ഒന്നും പ്രതികരിക്കാതെ ഇരുന്നത് ഏവരെയും ഞെട്ടിച്ചിരുന്നു.എന്നാൽ ഇപ്പോഴിത ഇന്നസെന്റിനെക്കുറിച്ചുള്ള തന്റെ ഓർമ്മകളും ഇന്നസെന്റിന്റെ അവസാനകാലത്തെ അനുഭവങ്ങളും പ്രേക്ഷകരുമായി പങ്കുവെക്കുകയാണ് അദ്ദേഹം.

ആദ്യം തന്നെ താൻ ഇത്രയും നാൾ മൗനം പാലിച്ചതിനെക്കുറിച്ച് പറഞ്ഞാണ് അദ്ദേഹം തുടങ്ങുന്നത്.എന്റെ അവസ്ഥ ഇപ്പോൾ നിർജീവമായ മനസ്സാണ്.സങ്കടം ഒക്കെ പോയി, അതിനു അപ്പുറത്തേക്ക് ആണ്. മരണം നമ്മൾ പ്രതീക്ഷിച്ചതാണ്.അദ്ദേഹം വിട്ടുപോകുന്നു എന്ന് ആദ്യം മനസിലാക്കിയത് ഞാൻ ആണ്. മൂന്ന് ആഴ്ചകൾക്ക് മുൻപാണ് ചില കാര്യങ്ങൾ പറയണം എന്ന് പറഞ്ഞുകൊണ്ട് എന്നെ വിളിക്കുന്നത്. ഞാൻ ഒരു രോഗി ആണെന്ന് മനസിലാകുന്നത് ഇപ്പോൾ ആണ് എന്ന് അദ്ദേഹം പറഞ്ഞു.അതുപോലെ ഇനി തന്നെ കാണണ്ട എന്നും പറഞ്ഞു.

അദ്ദേഹത്തിന്റെ മരണം രണ്ടുദിവസം മുൻപേ ഞാൻ വിഷ്വലൈസ് ചെയ്തിരുന്നു.എങ്ങനെ കൊണ്ടുപോകണം എങ്ങനെ ചെയ്യണം എന്ന്. ചിലർ പറയില്ലേ യാഥാർഥ്യങ്ങൾക്ക് മുൻപേ സഞ്ചരിക്കണം എന്ന്.ഞാൻ സോനുവിനോട് പറഞ്ഞു, നീ കരഞ്ഞു തീർക്കാൻ. പക്ഷെ ഞാൻ അവിടെ വച്ചുകരഞ്ഞാൽ എല്ലാവരും തളർന്നു പോകും എന്ന് എനിക്ക് അറിയാമായിരുന്നു. പ്രത്യേകിച്ചും പേരകുട്ടികളൊക്കെ നെഞ്ചു പൊട്ടിയാണ് കരഞ്ഞുകൊണ്ടിരിക്കുന്നത്.ഞാൻ ആരും കാണാതെ എന്റെ ബെഡ് റൂമിൽ വന്നു കരഞ്ഞു തീർത്തു.

എന്നെ മാന്യമായി പറഞ്ഞയക്കണം കേട്ടോ എന്നാണ് അദ്ദേഹം പറഞ്ഞിരുന്നത്. മരിച്ചു കഴിഞ്ഞാൽ ആരൊക്കെ വരും എന്ന് വരെ ചേട്ടൻ പറഞ്ഞിരുന്നു. ഞങ്ങൾ ഇതൊക്കെ ഡിസ്‌കസ് ചെയ്ത കാര്യങ്ങൾ ആണ് ജീവിച്ചിരിക്കുമ്പോൾ, ഇത് ചേച്ചിയോട് പറയുമ്പോൾ ചേച്ചിക്ക് വലിയ അത്ഭുതം ആയിരുന്നു. പക്ഷെ ഞാൻ പ്രതീക്ഷിച്ചതിന് അപ്പുറം ആയിരുന്നു അദ്ദേഹത്തിനെ കാണാൻ ആളുകൾ എത്തിയത്. ഗംഗാധരൻ ഡോക്ടർ ചേട്ടന് ദൈവം ആയിരുന്നു. കോവിഡ് വന്ന് ലങ്‌സ് വല പോലെയായി എന്നാണ് ഡോക്ടർമാർ പറഞ്ഞത്. ഒരിക്കലും അദ്ദേഹം മരിച്ചത് ക്യാൻസർ കൊണ്ട് ആയിരുന്നില്ലെന്നും ഇടവേള ബാബു പറയുന്നു.

സമീപകാലത്ത് ഒരു അമേരിക്കൻ യാത്ര ചേട്ടൻ നടത്തി ആർക്കും അത് ഇഷ്ടം ഉണ്ടായിരുന്നില്ല. പോകണോ എന്ന് ഞാൻ ചോദിച്ചപ്പോൾ എന്നോട് ദേഷ്യപ്പെട്ടു. എന്നാൽ അവിടെ ചെന്ന് അദ്ദേഹം ഒന്ന് വീണു, അതോടെ പെട്ടെന്ന് തിരികെ വരണമെന്നായി അദ്ദേഹത്തിന്.ഇന്നസെന്റ് ചേട്ടനെ ജീവിതത്തിലേക്ക് തിരികെ കൊണ്ടുവരാൻ അവസാന നിമിഷം വരെ എല്ലാം ചെയ്തു.അവിടെ സാമ്പത്തികം ഒരു വിഷയം ആയിരുന്നില്ല. ചിലപ്പോ ഞാൻ ബോധം ഇല്ലാതെ കിടന്നാലും പിച്ച ചട്ടി എടുത്ത് നടക്കരുത് എന്ന് ചേട്ടൻ എന്നോട് പറഞ്ഞിരുന്നു.അമ്മയുടെ ഇന്ഷുറന്‌സ് ഒക്കെ ചേട്ടൻ എടുത്തിരുന്നു.

അവസാന നിമിഷം വരെ ചേട്ടന് ഒരു ബുദ്ധിമുട്ട് ഉണ്ടാകാതെ പോകണം എന്ന് എനിക്കും സോനുവിനും ഉണ്ടായിരുന്നു. ആരുടേയും കൈയിൽ നിന്നും ചികിത്സയ്ക്കായി കാശ് വാങ്ങരുതെന്ന നിർബന്ധം ഉണ്ടായിരുന്നു അദ്ദേഹത്തിന്.ഇന്നത്തെ ഇന്നസെന്റ് ആകുന്നത് അദ്ദേഹത്തിന്റെ സ്ട്രയിന് കൊണ്ടാണ്. ആദ്യ സമയങ്ങളിൽ ചെന്നൈയിലെ ചേട്ടന്റെ വീട്ടിലേക്ക് ചെല്ലുന്ന കാര്യം പറയുമ്പോൾ ആദ്യമൊക്കെ അതിനെ അദ്ദേഹം എതിർത്തിരുന്നു. എന്നാൽ പിന്നെ എന്നോട് ഒരിക്കൽ വരാൻ പറഞ്ഞപ്പോൾ നീ വന്നോ, പക്ഷെ മനസ്സിനെ പാകപ്പെടുത്തിയിട്ടാകണം വരുന്നത് എന്ന് പറഞ്ഞു.

ടൗണിൽ നിന്നും കുറെ ദൂരെയാണ് ചേട്ടൻ താമസിച്ചിരുന്നത് അതും ഒരു ചെറിയ വാടകവീട്ടിൽ, ഇരിക്കാൻ ഒരു കസേരപോലും വീട്ടിൽ ഉണ്ടായിരുന്നില്ല.അത്രയും ദുരവസ്ഥയിൽ കഴിഞ്ഞിട്ടുണ്ട്.അവിടെ നിന്നും ഒരുപാട് സ്ട്രെയിൻ എടുത്തിട്ടാണ് ചേട്ടൻ ഇവിടെ വരെ എത്തിയത്.അവസാനം പുതിയ വീട് പണിഞ്ഞപ്പോൾ ഞാൻ ചോദിച്ചു ഇത് എന്തിനാണ് എന്ന്.ഏറ്റവും നല്ല സംവിധാനം ഉള്ള വീട് വേണം എന്ന് ചേട്ടന് നിർബന്ധം ആയിരുന്നു.പല തീരുമാനങ്ങളും അദ്ദേഹം ജീവിതത്തിൽ നടപ്പിലാക്കിയിട്ടുണ്ട്. എല്ലാം സാധിച്ചിട്ടാണ് അദ്ദേഹം പോയിരിക്കുന്നത്. സ്‌നേഹിക്കുന്നവർക്ക് നഷ്ടം തന്നെയാണ് പക്ഷെ എല്ലാം നേടിയ ആളാണ് ചേട്ടൻ- ഇടവേള ബാബു മാധ്യമപ്രവർത്തകൻ അലിയോട് പറഞ്ഞു.

മറുനാടന്‍ മലയാളി

    മറുനാടന്‍ മലയാളി ബ്യൂറോ