ഭർത്താവ് കിടപ്പുമുറിയിൽ പെരുമാറുന്നത് അതിരുവിട്ട രീതിയിൽ; ഒട്ടും സഹിക്കാൻ പറ്റുന്നില്ല; യുവതിയുടെ പരാതിയിൽ കേസ് രജിസ്റ്റർ ചെയ്തെങ്കിലും സംഭവിച്ചത് മറ്റൊന്ന്; കേസ് റദ്ദാക്കി കോടതി
ഗ്വാളിയോർ: ദാമ്പത്യ ജീവിതത്തിനിടയിൽ ഭർത്താവിൽ നിന്നും നേരിടേണ്ടി വരുന്ന നിർബന്ധിത അസ്വാഭാവിക ലൈംഗിക പ്രവൃത്തികൾ നിലവിലുള്ള നിയമ ചട്ടക്കൂടിനുള്ളിൽ കുറ്റകരമായി കാണാനാവില്ലെന്ന് മധ്യപ്രദേശ് ഹൈക്കോടതി. ഭിന്ദ് ജില്ലയിലെ ഒരു യുവാവിനെതിരെ ഭാര്യ നൽകിയ പരാതിയും അതിൻമേൽ പോലീസ് രജിസ്റ്റർ ചെയ്ത എഫ്ഐആറും റദ്ദാക്കിക്കൊണ്ടാണ് കോടതി ഈ സുപ്രധാന നിരീക്ഷണം നടത്തിയത്. ജസ്റ്റിസ് മിലിന്ദ് രമേശ് ഫാഡ്കെ അധ്യക്ഷനായ ഗ്വാളിയോർ ബെഞ്ചിന്റേതാണ് ഉത്തരവ്.
ഭാര്യ ഉന്നയിച്ച പരാതിയിലെ ആരോപണങ്ങൾ പൂർണ്ണമായും ശരിയാണെന്ന് കരുതിയാൽ പോലും, അവ ദാമ്പത്യ ബന്ധത്തിന്റെ ഭാഗമായി നടന്നവയായതിനാൽ ഇന്ത്യൻ ശിക്ഷാനിയമത്തിലെ (IPC) 377-ാം വകുപ്പ് പ്രകാരം അസ്വാഭാവിക കുറ്റകൃത്യമായി കണക്കാക്കാൻ കഴിയില്ലെന്ന് കോടതി വ്യക്തമാക്കി. നിയമഭേദഗതി പ്രകാരം ഓറൽ, അനൽ പെനട്രേഷൻ തുടങ്ങിയവ ബലാത്സംഗത്തിന്റെ പരിധിയിൽ കൊണ്ടുവന്നിട്ടുണ്ടെങ്കിലും, സ്വന്തം ഭാര്യയുമായുള്ള ലൈംഗിക ബന്ധമോ പ്രവൃത്തികളോ ബലാത്സംഗമായി കാണാൻ കഴിയില്ലെന്ന നിയമപരമായ ഇളവ് കോടതി ചൂണ്ടിക്കാട്ടി.
ഭാര്യാഭർത്താക്കന്മാർക്കിടയിൽ ആരോപിക്കപ്പെടുന്ന ഇത്തരം ലൈംഗിക പ്രവൃത്തികളെ ഐപിസി 377-ാം വകുപ്പിന്റെ പരിധിയിൽ കൊണ്ടുവരുന്നത് നിലവിലെ നിയമം അനുവദിക്കുന്നില്ലെന്നും കോടതി വിധിന്യായത്തിൽ കുറിച്ചു.
ഭിന്ദ് ജില്ലയിൽ നിന്നുള്ള യുവതിയാണ് തന്റെ ഭർത്താവിനെതിരെ ക്രൂരമായ അസ്വാഭാവിക ലൈംഗിക പീഡനം, സ്ത്രീധന പീഡനം, ക്രിമിനൽ ഭീഷണി തുടങ്ങിയ കുറ്റങ്ങൾ ആരോപിച്ച് പരാതി നൽകിയത്. ഇതിന്റെ അടിസ്ഥാനത്തിൽ പോലീസ് കേസെടുക്കുകയും കുറ്റപത്രം സമർപ്പിക്കുകയും ചെയ്തിരുന്നു. എന്നാൽ, തനിക്കെതിരെയുള്ള എഫ്ഐആറും തുടർ നടപടികളും റദ്ദാക്കണമെന്ന് ആവശ്യപ്പെട്ട് ഭർത്താവ് ഹൈക്കോടതിയെ സമീപിക്കുകയായിരുന്നു.
അസ്വാഭാവിക ലൈംഗിക പീഡന പരാതി റദ്ദാക്കിയെങ്കിലും, പ്രതിക്കെതിരെയുള്ള മറ്റ് ഗുരുതരമായ ആരോപണങ്ങളിൽ ഇടപെടാൻ ഹൈക്കോടതി തയ്യാറായില്ല. സ്ത്രീധന പീഡനം (IPC 498A), ശാരീരികമായ അക്രമം, ക്രിമിനൽ ഭീഷണി തുടങ്ങിയ പരാതികളിൽ ഭർത്താവിനെതിരെ പ്രഥമദൃഷ്ട്യാ തെളിവുകളുണ്ടെന്ന് കോടതി നിരീക്ഷിച്ചു.
ഈ കുറ്റങ്ങൾ വിചാരണ വേളയിൽ വിശദമായി പരിശോധിക്കേണ്ടതാണെന്നും അതിനാൽ ഇവയുമായി ബന്ധപ്പെട്ട നടപടികൾ തുടരാമെന്നും ജസ്റ്റിസ് മിലിന്ദ് രമേശ് ഫാഡ്കെ വ്യക്തമാക്കി. ചുരുക്കത്തിൽ, ലൈംഗികാരോപണത്തിൽ നിന്ന് ഭർത്താവിന് ആശ്വാസം ലഭിച്ചെങ്കിലും സ്ത്രീധന പീഡനക്കേസിൽ അയാൾ വിചാരണ നേരിടേണ്ടി വരും.
