കൊൽക്കത്ത: കാമുകിയുമൊത്തുള്ള സ്വകാര്യ വീഡിയോ ഓൺലൈനിൽ ലീക്കായതോടെ ബംഗാളിൽ നിന്നുള്ള ഇൻസ്റ്റഗ്രാം കണ്ടന്റ് ക്രിയേറ്ററായ സോഫിക് എസ്.കെ.ക്ക് പുതുതായി ലഭിച്ചത് നാലുലക്ഷത്തിലധികം ഫോളോവേഴ്സ്. ഈ വിവാദ സംഭവത്തിന് ശേഷം നിലവിൽ ഇയാളുടെ ഇൻസ്റ്റഗ്രാം അക്കൗണ്ടിന് അഞ്ച് ലക്ഷത്തിലധികം ഫോളോവേഴ്സുണ്ട്. ഈ വിഷയം സമൂഹമാധ്യമങ്ങളിൽ വലിയ ചർച്ചകൾക്കും വിമർശനങ്ങൾക്കും വഴിവെക്കുകയും, പിന്നാലെ സോഫിക് പരസ്യമായി ക്ഷമാപണം നടത്തുകയും ചെയ്തിരുന്നു.

സോഫിക് എസ്.കെ.യുടെയും കാമുകിയുടെയും ഒരു വർഷം മുമ്പ് റെക്കോർഡ് ചെയ്ത സ്വകാര്യ വീഡിയോ ഒരു പൊതു സുഹൃത്ത് പ്രചരിപ്പിച്ചതോടെയാണ് വിവാദങ്ങളുടെ തുടക്കം. തങ്ങളുടെ മൊബൈൽ ഫോണുകളിലേക്ക് ആക്സസ് ഉണ്ടായിരുന്ന ഈ സുഹൃത്ത് വീഡിയോ ക്ലിപ്പ് ഉപയോഗിച്ച് ഭീഷണിപ്പെടുത്തിയിരുന്നതായും, പിന്നീട് തങ്ങൾ അയാളിൽ നിന്ന് അകന്നപ്പോൾ പ്രതികാരമെന്നോണം വീഡിയോ ഓൺലൈനിൽ അപ്‌ലോഡ് ചെയ്യുകയായിരുന്നെന്നും സോഫിക് ആരോപിച്ചു. "ഒരു സഹോദരനെപ്പോലെ ഞാൻ കണ്ട ഒരാൾ എന്നോടിങ്ങനെ ചെയ്യുമെന്ന് ഒരിക്കലും കരുതിയിരുന്നില്ല," സോഫിക് വികാരാധീനനായി പ്രതികരിച്ചു.

ഈ സംഭവം പബ്ലിസിറ്റിക്ക് വേണ്ടിയുള്ള ഒരു സ്റ്റണ്ടായിരുന്നോ എന്ന വിമർശനങ്ങൾ വ്യാപകമായി ഉയർന്നുവെങ്കിലും, താനോ കാമുകിയോ വീഡിയോ ചോർത്തിയതാണെന്ന ആരോപണങ്ങൾ സോഫിക് നിഷേധിച്ചു. തന്റെ നിരപരാധിത്വം തെളിയിക്കാൻ സ്ക്രീൻഷോട്ടുകൾ, സുഹൃത്തിന്റെ വീഡിയോ, വോയ്‌സ് നോട്ടുകൾ എന്നിവയുൾപ്പെടെയുള്ള തെളിവുകൾ അദ്ദേഹം പങ്കുവെച്ചു. വീഡിയോ പ്രചരിപ്പിക്കരുതെന്നും സുഹൃത്തിനെതിരെ സൈബർ ക്രൈം യൂണിറ്റിൽ പരാതി നൽകിയിട്ടുണ്ടെന്നും സോഫിക് കൈകൾ കൂപ്പി ഫോളോവേഴ്സിനോട് ക്ഷമ ചോദിച്ച് വ്യക്തമാക്കി.

സംഭവത്തെക്കുറിച്ച് വിശദീകരിച്ച് സോഫിക്കും കാമുകിയും വീഡിയോ പോസ്റ്റ് ചെയ്തതിന് രണ്ടുദിവസങ്ങൾക്ക് ശേഷം, അദ്ദേഹത്തിന്റെ ഇൻസ്റ്റഗ്രാം അക്കൗണ്ടിൽ പുതിയൊരു ഡാൻസ് റീലും അപ്‌ലോഡ് ചെയ്യപ്പെട്ടു. ഈ റീലിന് താഴെ ഇരുവരേയും വിമർശിച്ചും പിന്തുണച്ചുമെല്ലാം നിരവധി കമന്റുകളാണ് എത്തുന്നത്.

സോഫിക് എസ് കെസ്വകാര്യ വീഡിയോഇൻസ്റ്റഗ്രാം കണ്ടന്റ് ക്രിയേറ്റർ

സ്വന്തം ലേഖകൻ