ഐഎസ്ആര്‍ഒയുടെ വിശ്വസ്ത പടക്കുതിരയ്ക്കുണ്ടായ അത്യപൂര്‍വ്വ പരാജയം; വിക്ഷേപണത്തിന് ശേഷം മൂന്നാം ഘട്ടത്തിലുണ്ടായ അപ്രതീക്ഷിത പ്രശ്‌നങ്ങളാണ് ദൗത്യം പരാജയപ്പെടാന്‍ കാരണമെന്ന് ഇസ്രോ ചെയര്‍മാന്‍; ശ്രീഹരിക്കോട്ടയില്‍ നിന്നുള്ള 101-ാം വിക്ഷേപണത്തില്‍ വില്ലനായത് സാങ്കേതിക പ്രതിസന്ധി; റോക്കറ്റും ഉപഗ്രഹവും നഷ്ടം
ചെന്നൈ: ഇഒഎസ്-09 ഭൗമനിരീക്ഷണ ഉപഗ്രഹവുമായുള്ള പിഎസ്എല്‍വി സി-61 വിക്ഷേപണം പരാജയപ്പെടുമ്പോള്‍ ഐഎസ് ആര്‍ഒ പൂര്‍ണ്ണ നിരാശയില്‍. ഞായറാഴ്ച രാവിലെ 5.59-ന് ശ്രീഹരിക്കോട്ടയിലെ സതീഷ് ധവാന്‍ സ്പെയ്സ് സെന്ററില്‍നിന്ന് വിക്ഷേപണം നടന്നെങ്കിലും ദൗത്യം പരാജയപ്പെട്ടതായി ഐഎസ്ആര്‍ഒ ചെയര്‍മാന്‍ ഡോ. വി. നാരായണന്‍ അറിയിച്ചു. ദൗത്യത്തിന്റെ മൂന്നാംഘട്ടത്തിലാണ് പ്രശ്‌നങ്ങള്‍ നേരിട്ടതെന്നും അദ്ദേഹം പറഞ്ഞു. എന്താണ് സംഭവിച്ചത് എന്നതില്‍ ഐഎസ് ആര്‍ഒ പഠനം നടത്തും. അതിന് ശേഷം വീണ്ടും വിക്ഷേപിക്കും. പി എസ് എല്‍ വിയെ ഐഎസ്ആര്‍ഒയുടെ വിശ്വസ്ത പടക്കുതിര എന്നാണ് വിശേഷിപ്പിക്കാറുള്ളത്. അതുകൊണ്ട് പി എസ് എല്‍ വി വിക്ഷേപണ പരാജയം വലിയ നിരാശയാണ് രാജ്യത്തിന് നല്‍കുന്നത്. അത്യപൂര്‍വ്വമായി മാത്രമേ പി എസ് എല്‍ വി രാജ്യത്തിന് നിരാശ നല്‍കാറുള്ളൂ. ഉപഗ്രഹവും റോക്കറ്റും ഇന്ത്യയ്ക്ക് പൂര്‍ണ്ണമായും നഷ്ടമാകുന്ന തരത്തിലാണ് മിഷന്‍ പരാജയപ്പെട്ടത്.
ഐഎസ്ആര്‍ഒയുടെ അതിവിശ്വസ്ത വിക്ഷേപണ വാഹനമാണ് പി എസ് എല്‍ വി. ഏറ്റെടുക്കുന്ന ദൗത്യമെല്ലാം പൂര്‍ണ്ണ വിജയത്തിലെത്തിക്കാറുള്ള വിക്ഷേപന വാഹനം. വിക്ഷേപണത്തിന് ശേഷം മൂന്നാം ഘട്ടത്തിലുണ്ടായ അപ്രതീക്ഷിത പ്രശ്‌നങ്ങളാണ് ദൗത്യം പരാജയപ്പെടാന്‍ കാരണമായത്. ദൗത്യം ലക്ഷ്യം കണ്ടില്ലെന്ന് ഐഎസ്ആര്‍ ഒ ചെയര്‍മാന്‍ ഡോ. വി നാരായണന്‍ അറിയിച്ചു. ഭൌമനിരീക്ഷണ ഉപഗ്രഹത്തെ ഭ്രമണപഥത്തില്‍ എത്തിക്കാനായില്ല. പിഎസ്എല്‍വി ദൗത്യം പരാജയപ്പെടുന്നത് അത്യപൂര്‍വമാണ്. ആദ്യ രണ്ട് ഘട്ടം വിജയകരമായി പൂര്‍ത്തിയാക്കാന്‍ സാധിച്ചെങ്കിലും മൂന്നാം ഘട്ടത്തില്‍ അപ്രതീക്ഷിത പ്രതിസന്ധി നേരിട്ടതാണ് ദൗത്യം പരാജയപ്പെടാന്‍ കാരണം. അഞ്ച് നൂതന ഇമേജിംഗ് സംവിധാനങ്ങളാണ് ഉപഗ്രഹത്തിലുണ്ടായിരുന്നത്. അതിര്‍ത്തികളില്‍ നിരീക്ഷണം, കൃഷി, വനം, മണ്ണിന്റെ ഈര്‍പ്പം, വെള്ളപ്പൊക്കം എന്നിവ സംബന്ധിച്ച വിവരങ്ങള്‍ ശേഖരിക്കുന്നതിനായി സജ്ജമാക്കിയിരുന്ന ഉപഗ്രഹമായിരുന്നു ഇത്. ശ്രീഹരിക്കോട്ടയില്‍ നിന്നുള്ള 101ാം വിക്ഷേപണം കൂടിയായിരുന്നു.
ഏതു കാലാവസ്ഥയിലും രാപകല്‍ഭേദമില്ലാതെ ഭൗമോപരിതലത്തിന്റെ വ്യക്തതയാര്‍ന്ന ചിത്രങ്ങള്‍ പകര്‍ത്താന്‍ ശേഷിയുള്ള ഇന്ത്യയുടെ ഭൗമനിരീക്ഷണ ഉപഗ്രഹമാണ് ഇഒഎസ്-09 താമസിയാതെ തന്നെ വീണ്ടും വിക്ഷേപിക്കും. വിക്ഷേപിച്ച് 18 മിനിറ്റിനുള്ളില്‍ പിഎസ്എല്‍വി സി-61 ഉപഗ്രഹത്തെ ഭ്രമണപഥത്തിലെത്തിക്കുമെന്നായിരുന്നു കണക്കുക്കൂട്ടല്‍. 1,710 കിലോഗ്രാം ഭാരമുള്ളതാണ് ഇഒഎസ്-09. ദേശസുരക്ഷ, ദുരന്തനിവാരണം, കൃഷി, വനം, നഗരാസൂത്രണം എന്നിവയുള്‍പ്പെടെയുള്ള വിവിധ ആവശ്യങ്ങള്‍ക്ക് ഉപഗ്രഹത്തില്‍നിന്ന് ലഭിക്കുന്ന വിവരങ്ങള്‍ നിര്‍ണായകമാവും. പഹല്‍ഗാം ഭീകരാക്രമണത്തിന്റെ പശ്ചാത്തലത്തില്‍ രാജ്യത്തിന്റെ അതിര്‍ത്തികള്‍ സൂക്ഷ്മമായി നിരീക്ഷിക്കുന്ന ശക്തമായ ഉപഗ്രഹമായി മാറും ഇഒഎസ്- 09 എന്നായിരുന്നു വിലയിരുത്തല്‍.
റഡാര്‍ ഉപയോഗിച്ച് ഭൗമനിരീക്ഷണം നടത്തുന്ന റഡാര്‍ ഇമേജിങ് സാറ്റലൈറ്റ് (റിസാറ്റ്)ശ്രേണിയില്‍പ്പെട്ട ഇഒഎസ്-09-ന് അഞ്ചു വര്‍ഷമാണ് ആയുസ്സാണ് നിശ്ചയിച്ചിരുന്നത്. നേരത്തെ റിസാറ്റ് 1ബി എന്നായിരുന്നു ഇതിനു പേരിട്ടിരുന്നത്. പിഎസ്എല്‍വിയുടെ 63-ാമത്തെ വിക്ഷേപണദൗത്യമായിരുന്നു ഇത്. പോളാര്‍ സാറ്റലൈറ്റ് ലോഞ്ച് വെഹിക്കിളിന്റെ (പിഎസ്എല്‍വി) 63-ാമത്തെ വിക്ഷേപണം കൂടിയായിരുന്നു ഇത്. ഇവിടെയാണ് പ്രതിസന്ധിയുണ്ടായത്.
