കുളിക്കാനിറങ്ങിയ മകനും രക്ഷിക്കാൻ ചാടിയ അച്ഛനും അച്ചൻകോവിലാറ്റിലെ കയത്തിൽപ്പെട്ടു; ആറിന് മറുകര നീന്തി ജവാന്റെ രക്ഷാപ്രവർത്തനം; മരണക്കയത്തിലാണ്ടവരെ ജീവന്റെ മുനമ്പിലേക്ക് തിരികെ എത്തിച്ചത് വള്ളിക്കോട്ടുകാരൻ അജിത്തും കൂട്ടുകാരും

പത്തനംതിട്ട: കൊടുംവേനലിൽ പലയിടത്തും മെലിഞ്ഞൊഴുകുകയാണ് അച്ചൻകോവിലാർ. പക്ഷേ, മരണം പതിയിരിക്കുന്ന കയങ്ങൾ ഒരു പാടുണ്ട് ഈ നദിയിൽ. അത്തരമൊരു കയത്തിൽ വീണ പന്ത്രണ്ടുകാരനെയും അവനെ രക്ഷിക്കാൻ ചാടി ഒഴുക്കിൽപ്പെട്ട പിതാവിനെയും തിരികെ ജീവിതത്തിലേക്ക് മടക്കിയിരിക്കുകയാണ് ഒരു ജവാനും കൂട്ടുകാരും ചേർന്ന്.

മുള്ളനിക്കാട് മഠത്തിലേത്ത് ഷിബു(45), മകൻ നിതിൻ എന്നിവരുടെ ജീവനാണ് വള്ളിക്കോട് മായാലി കോതപുരത്തേത്ത് അജിത് ആർ. നായർ (27) രക്ഷപ്പെടുത്തിയത്. ഞായറാഴ്ച ഉച്ചയ്ക്ക് രണ്ടു മണിയോടെയാണ് സംഭവം. അച്ചൻകോവിലാറിന്റെ മുള്ളനിക്കാട് അരീക്കത്തറ കടവിൽ കുളിക്കാനിറങ്ങിയതായിരുന്നു ഷിബുവും മക്കളായ നേഹയും നിതിനും. വിശാലമാല മണൽപ്പരപ്പിന്റെ ഭാഗത്താണ് കുളിക്കാനിറങ്ങിയത്. പക്ഷേ, ഇവിടെ മരണമൊളിപ്പിച്ച കയമുണ്ടെന്ന കാര്യം ഇവർ അറിഞ്ഞില്ല. നിതിൻ കയത്തിൽപ്പെട്ടതു കണ്ട് ഷിബുവും ഒപ്പം ചാടി. ഈ സമയം ആറിന്റെ മറുകരയിൽ തൃക്കോവിൽ ഭാഗത്തുള്ള സുഹൃത്തിന്റെ വീട്ടിലിരിക്കുകയായിരുന്നു അജിത്തും സുഹൃത്തുക്കളും. പെട്ടെന്നാണ് മറുകരയിൽ നിന്ന് നേഹയുടെ നിലവിളി കേട്ടത്. ഓടിച്ചെന്നു നോക്കുമ്പോൾ രണ്ടു പേർ ഒഴുക്കിൽപ്പെട്ട് കയത്തിൽ താഴുന്നതാണ് കണ്ടത്.

പിന്നെ ഒന്നും നോക്കിയില്ല. മാവേലി കടവിൽ നിന്ന് അജിത്ത് മറുകര ലക്ഷ്യമാക്കി നീന്തി. കയത്തിൽ നിന്ന് ആദ്യം നിതിനെ രക്ഷിച്ച് അരീക്കത്തറ കടവിലെത്തിച്ചു. പിന്നെ നോക്കുമ്പോൾ ഷിബും ഒഴുക്കിപ്പെട്ടതാണ് കണ്ടത്. അപ്പോഴേക്കും സുഹൃത്ത് ആകാശുമെത്തി. അജിത്തും ആകാശും ചേർന്ന ഷിബുവിനെ മറുകരയിൽ മാവേലിക്കരയിൽ അടുപ്പിച്ചു. ബൈജു, അഖിൽ, രജിത്ത് എന്നീ കൂട്ടുകാർ കൂടി ചേർന്ന് പ്രഥമശുശ്രൂഷ നൽകി. അപ്പോഴേക്കും വിവരം അറിഞ്ഞ് ഫയർ ഫോഴ്സുമെത്തി. വഴി കണ്ടു പിടിക്കാൻ ഫയർഫോഴ്സ് ബുദ്ധിമുട്ടിയിരുന്നു.

രാജസ്ഥാനിലെ കരസേന എൻജിനീയറിങ്ങി വിഭാഗത്തിലാണ് അജിത്തിന് ജോലി. ലേയിലേക്ക് സ്ഥലം മാറ്റം ലഭിച്ചതിനാൽ 25 ദിവസം മുൻപ് അവധി കിട്ടി നാട്ടിലേക്ക് പോന്നു. ബുധനാഴ്ച ലേയിലേക്ക് മടങ്ങാൻ ഒരുങ്ങുകയാണ്.