ജസ്റ്റിസ് നിതിന്‍ ജാംദാര്‍ കേരള ഹൈക്കോടതി ചീഫ് ജസ്റ്റിസ്; ബോംബെയില്‍ നിന്നെത്തുന്ന നാലാമത്തെ ചീഫ് ജസ്റ്റിസ്; എട്ട് ഹൈക്കോടതികളില്‍ പുതിയ ചീഫ് ജസ്റ്റിസുമാര്‍
മലയാളി വേരുകളുള്ള കെ.ആര്‍. ശ്രീറാം മദ്രാസ് ഹൈക്കോടതിയിലേക്ക്
ന്യൂഡല്‍ഹി: ബോംബെ ഹൈക്കോടതിയിലെ ജസ്റ്റിസ് നിതിന്‍ ജാംദാറിനെ കേരള ഹൈക്കോടതി ചീഫ് ജസ്റ്റിസ് ആയി നിയമിച്ച് കേന്ദ്ര സര്‍ക്കാര്‍ വിജ്ഞാപനം ഇറക്കി. ജസ്റ്റിസ് നിതിന്‍ ജാംദാര്‍ വൈകാതെ തന്നെ കേരള ഹൈക്കോടതി ചീഫ് ജസ്റ്റിസ് ആയി സത്യപ്രതിജ്ഞ ചെയ്ത് അധികാരമേല്‍ക്കും.
ബോംബെ ഹൈക്കോടതിയിലെ ജസ്റ്റിസ് കെ ആര്‍ ശ്രീറാമിനെ മദ്രാസ് ഹൈക്കോടതി ചീഫ് ജസ്റ്റിസ് ആയി നിയമിച്ച് കൊണ്ടുള്ള വിജ്ഞാപനവും കേന്ദ്ര സര്‍ക്കാര്‍ പുറത്തിറക്കി. തൃശൂര്‍ ജില്ലയിലെ വടക്കാഞ്ചേരിയില്‍ വേരുകളുള്ളയാളാണ് ജസ്റ്റിസ് ശ്രീറാം. കേരള, മദ്രാസ് ഹൈകോടതികള്‍ക്ക് പുറമെ ആറ് ഹൈകോടതികള്‍ക്ക് കൂടി പുതിയ ചീഫ് ജസ്റ്റിസുമാരെ നിയമിച്ചു. ഹൈക്കോടതികളുടെ ചീഫ് ജസ്റ്റിസ് നിയമനം വൈകുന്നതിനെതിരെ ഹര്‍ജി അടുത്ത ആഴ്ച്ച സുപ്രീം കോടതി പരിഗണിക്കാന്‍ ഇരിക്കെയാണ് കേന്ദ്രം നിയമന വിജ്ഞാപനം ഇറക്കിയത്.
ബോംബെ ഹൈക്കോടതിയില്‍ ചീഫ് ജസ്റ്റിസ് ഡി.കെ. ഉപാധ്യായ കഴിഞ്ഞാല്‍ ഏറ്റവും സീനിയര്‍ ആയ ജഡ്ജിയാണ് നിതിന്‍ ജാംദാര്‍. ഷോലപുര്‍ സ്വദേശിയായ ജസ്റ്റിസ് നിതിന്‍ ജാംദാര്‍ ബോംബെ ഹൈക്കോടതിയുടെ ആക്ടിങ് ചീഫ് ജസ്റ്റിസായും സേവനം അനുഷ്ഠിച്ചിട്ടുണ്ട്. 2012 ജനുവരി 23-നാണ് ബോംബെ ഹൈക്കോടതി ജഡ്ജി ആയി നിയമിതനായത്. അതിന് മുമ്പ് കേന്ദ്രസര്‍ക്കാരിന്റെ സീനിയര്‍ സ്റ്റാന്റിങ് കോണ്‍സല്‍ ആയിരുന്നു.
കേരള ഹൈക്കോടതി ചീഫ് ജസ്റ്റിസ് ആകുന്ന ആദ്യ ബോംബെ ഹൈക്കോടതി ചീഫ് ജസ്റ്റിസ് സുജാത മനോഹര്‍ ആയിരുന്നു. 1994 ഏപ്രില്‍ 21 മുതല്‍ അതേ വര്‍ഷം നവംബര്‍ നാല് വരെ ജസ്റ്റിസ് സുജാത മനോഹര്‍ കേരള ഹൈക്കോടതി ചീഫ് ജസ്റ്റിസ് ആയിരുന്നു. കേരള ഹൈക്കോടതി ചീഫ് ജസ്റ്റിസ് ആയിരുന്നപ്പോഴാണ് ജസ്റ്റിസ് സുജാത മനോഹറിനെ സുപ്രീം കോടതി ജഡ്ജിയായി ഉയര്‍ത്തിയത്.
ജസ്റ്റിസ് എ.വി. സാവന്ത്, ജസ്റ്റിസ് ബി.എന്‍. ശ്രീകൃഷ്ണ എന്നിവരാണ് ബോംബെ ഹൈക്കോടതിയില്‍നിന്ന് കേരള ഹൈക്കോടതിയിലേക്ക്
ചീഫ് ജസ്റ്റിസുമാരായി എത്തിയ മറ്റ് ജഡ്ജിമാര്‍. 2000 മെയ് 30 മുതല്‍ സെപ്റ്റംബര്‍ 17 വരെ മൂന്നരമാസ കാലയളവിലാണ് ജസ്റ്റിസ് എ.വി. സാവന്ത് കേരള ഹൈക്കോടതി ചീഫ് ജസ്റ്റിസ് ആയിരുന്നത്. 2001 സെപ്റ്റംബര്‍ ആറ് മുതല്‍ 2002 ഒക്ടോബര്‍ ഒന്നുവരെ ആയിരുന്നു ജസ്റ്റിസ് ബി.എന്‍. ശ്രീകൃഷ്ണ കേരള ഹൈക്കോടതി ചീഫ് ജസ്റ്റിസ് ആയിരുന്നത്. സുപ്രീം കോടതി ജഡ്ജിയായി ഉയര്‍ത്തപ്പെട്ടില്ലായെങ്കില്‍ ജസ്റ്റിസ് നിതിന്‍ ജാംദര്‍ 2026 ജനുവരി ഒമ്പതിന് വിരമിക്കും.
മറ്റ് ചീഫ് ജസ്റ്റിസുമാര്‍
ജസ്റ്റിസ് മന്‍മോഹന്‍ - ഡല്‍ഹി ഹൈക്കോടതി
ജസ്റ്റിസ് രാജീവ് ശഖ്ദര്‍ - ഹിമാചല്‍ പ്രദേശ് ഹൈക്കോടതി
ജസ്റ്റിസ് സുരേഷ് കുമാര്‍ കെയ്ത് - മധ്യപ്രദേശ് ഹൈക്കോടി
ജസ്റ്റിസ് ഇന്ദ്ര പ്രസന്ന മുഖര്‍ജി - മേഘാലയ ഹൈക്കോടതി
ജസ്റ്റിസ് തഷി റബ്സ്ഥാന്‍ - ജമ്മു ആന്റ് കശ്മീര്‍, ലഡാക്ക് ഹൈക്കോടതി
ജസ്റ്റിസ് എം.എസ് രാമചന്ദ്ര റാവു - ജാര്‍ഖണ്ഡ് ഹൈക്കോടതി
കെ.ആര്‍. ശ്രീറാം മദ്രാസ് ഹൈക്കോടതിയിലേക്ക്
ബോംബെ ഹൈക്കോടതിയില്‍ ചീഫ് ജസ്റ്റിസ് ഡി.കെ. ഉപാധ്യായ, ജസ്റ്റിസ് നിതിന്‍ ജാംദാര്‍ എന്നിവര്‍ കഴിഞ്ഞാല്‍ സീനിയര്‍ ആയ ജസ്റ്റിസ് കല്‍പ്പാത്തി രാജേന്ദ്രന്‍ ശ്രീറാമാണ് മദ്രാസ് ഹൈക്കോടതിയുടെ പുതിയ ചീഫ് ജസ്റ്റിസ്. ജനിച്ചത് മുംബൈയില്‍ ആണെങ്കിലും ജസ്റ്റിസ് കെ.ആര്‍. ശ്രീറാമിന്റെ കുടുംബം തൃശൂര്‍ ജില്ലയിലെ വടക്കാഞ്ചേരിയില്‍ നിന്നാണ്.
പ്രമുഖ സീനിയര്‍ അഭിഭാഷകന്‍ എസ്. വെങ്കിടേശ്വരന്റെ ജൂനിയറായി 1986-ല്‍ ആണ് കെ.ആര്‍. ശ്രീറാം പ്രാക്ടീസ് ആരംഭിക്കുന്നത്. ഷിപ്പിംഗ്, ഇന്റര്‍നാഷണല്‍ ട്രേഡ് ലോ എന്നിവയുമായി ബന്ധപ്പെട്ട സുപ്രധാനമായ പല കേസുകളിലും അഭിഭാഷകനായി ഹാജരായിട്ടുണ്ട്. 2013 ജൂണ്‍ 21-ന് ബോംബെ ഹൈക്കോടതി ജഡ്ജിയായി നിയമിക്കപ്പെട്ടു.
