ആ 'ബീഫ്' സീൻ..ഏറ്റില്ല!! 'ദി കേരള സ്റ്റോറി' സിനിമയുടെ രണ്ടാം ഭാഗം ട്രെയിലർ കണ്ട മലയാളികൾ ഒന്നടങ്കം ചോദിക്കുന്നു ഇത് ഏത് കേരളമെന്ന്; മുഖ്യമന്ത്രി അടക്കം പ്രതികരിച്ചതോടെ ഇതാ.. ഹൈക്കോടതിയുടെ ഇടപെടൽ; ചൊവ്വാഴ്ച ദിവസത്തിനായി കാത്തിരിപ്പിൽ ജനം; വിവാദ രംഗങ്ങൾക്ക് 'കട്ട്' പറയുമോ?
കൊച്ചി: വിവാദചിത്രം 'ദ കേരള സ്റ്റോറി 2' വിന്റെ സെൻസർ സർട്ടിഫിക്കറ്റ് റദ്ദാക്കണമെന്നും ചിത്രത്തിന്റെ പ്രദർശനം തടയണമെന്നും ആവശ്യപ്പെട്ട് സമർപ്പിച്ച ഹർജിയിൽ കേരള ഹൈക്കോടതി സെൻസർ ബോർഡിനും നിർമ്മാതാക്കളായ സൺഷൈൻ പിക്ചേഴ്സിനും നോട്ടീസ് അയച്ചു. ഹർജി വരുന്ന ചൊവ്വാഴ്ച പരിഗണിക്കുമെന്ന് കോടതി വ്യക്തമാക്കി.
കണ്ണൂര് ചിറ്റാരിപ്പറമ്പ് സ്വദേശി ശ്രീദേവ് നമ്പൂതിരിയാണ് ഹൈക്കോടതിയെ സമീപിച്ചത്. സിനിമ കേരളത്തെ കളങ്കപ്പെടുത്താൻ ലക്ഷ്യമിട്ടുള്ളതാണെന്നും ക്രമസമാധാന പ്രശ്നങ്ങൾക്ക് കാരണമാകുമെന്നും ഹർജിക്കാരൻ ചൂണ്ടിക്കാട്ടുന്നു. കേരളത്തെ തീവ്രവാദത്തിന്റെയും നിർബന്ധിത മതപരിവർത്തനത്തിന്റെയും നാടായി ചിത്രീകരിക്കാൻ ഈ സിനിമ ശ്രമിക്കുന്നുവെന്നും സെൻസർ അനുമതി നിയമവിരുദ്ധമാണെന്നും ഹർജിയിൽ പറയുന്നു.
ചിത്രത്തിന്റെ ട്രെയിലർ പുറത്തുവന്നതിന് പിന്നാലെ മുഖ്യമന്ത്രി പിണറായി വിജയൻ ഉൾപ്പെടെയുള്ളവർ സിനിമ വർഗീയ ധ്രുവീകരണത്തിന് കാരണമാകുമെന്ന് ആരോപിച്ച് രംഗത്തെത്തിയിരുന്നു. കേരളത്തിനെതിരെ വിദ്വേഷം വിതയ്ക്കാനും നമ്മുടെ മതനിരപേക്ഷ പാരമ്പര്യത്തെ അവഹേളിക്കാനും ലക്ഷ്യമിട്ടുള്ളതാണ് ഈ ചിത്രമെന്ന് മുഖ്യമന്ത്രി അന്ന് പ്രസ്താവിച്ചു. നട്ടാൽ കുരുക്കാത്ത നുണകളും വിദ്വേഷവും കേരളവിരുദ്ധ പ്രചാരണവും കുത്തിനിറച്ച ഒന്നാം ഭാഗം വർഗീയ ലക്ഷ്യത്തോടെ നിർമ്മിച്ചതാണെന്ന് സമൂഹം തിരിച്ചറിഞ്ഞതാണെന്നും അദ്ദേഹം കൂട്ടിച്ചേർത്തു. സാഹോദര്യവും മതേതരത്വവും ഉയർത്തിപ്പിടിക്കുന്ന കേരളത്തിന്റെ മാതൃകയെ ഭയപ്പെടുന്നവരാണ് ഇത്തരം വിദ്വേഷ പ്രചാരണങ്ങൾക്ക് പിന്നിലെന്നും പരസ്പര സമ്മതത്തോടെയുള്ള വിവാഹങ്ങളെപ്പോലും നിർബന്ധിത മതപരിവർത്തനമായി ചിത്രീകരിക്കുന്നത് സംഘപരിവാർ കേന്ദ്രങ്ങളാണെന്നും മുഖ്യമന്ത്രി വിമർശിച്ചിരുന്നു.
അതേസമയം ചിത്രത്തിന്റെ ട്രെയിലർ പുറത്തിറങ്ങിയത് മുതൽ വലിയ തോതിലുള്ള പ്രതിഷേധങ്ങളാണ് ഉയരുന്നത്. മുഖ്യമന്ത്രി പിണറായി വിജയൻ ഉൾപ്പെടെയുള്ള പ്രമുഖ നേതാക്കൾ ചിത്രത്തിനെതിരെ കടുത്ത ഭാഷയിൽ പ്രതികരിച്ചിരുന്നു. കേരളത്തെ വിദ്വേഷത്തിന്റെ വിളനിലമായി കാണിക്കാനുള്ള സംഘപരിവാർ അജണ്ടയുടെ ഭാഗമാണിതെന്നാണ് മുഖ്യമന്ത്രിയുടെ വിമർശനം.
മതനിരപേക്ഷ പാരമ്പര്യമുള്ള കേരളത്തെ അവഹേളിക്കാനാണ് സിനിമയുടെ നിർമ്മാതാക്കൾ ശ്രമിക്കുന്നതെന്നും, ഒന്നാം ഭാഗം തന്നെ നുണകൾ കുത്തിനിറച്ചതാണെന്ന് സമൂഹം തിരിച്ചറിഞ്ഞതാണെന്നും അദ്ദേഹം ഓർമ്മിപ്പിച്ചു. പരസ്പര സമ്മതത്തോടെ നടക്കുന്ന വിവാഹങ്ങളെപ്പോലും 'ലൗ ജിഹാദ്' അല്ലെങ്കിൽ നിർബന്ധിത മതപരിവർത്തനം എന്ന പേരിൽ ചിത്രീകരിക്കുന്നത് വിദ്വേഷ പ്രചാരണത്തിന്റെ ഭാഗമാണെന്നും കേരളം ഇത്തരം നീക്കങ്ങളെ ഒറ്റക്കെട്ടായി പ്രതിരോധിക്കുമെന്നും മുഖ്യമന്ത്രി വ്യക്തമാക്കി.
സിനിമയുടെ ഒന്നാം ഭാഗം പുറത്തിറങ്ങിയപ്പോഴും സമാനമായ രീതിയിൽ വലിയ തർക്കങ്ങൾ ഉടലെടുത്തിരുന്നു. ആവിഷ്കാര സ്വാതന്ത്ര്യത്തിന്റെ പേരിൽ സിനിമയെ അനുകൂലിക്കുന്നവരും, സമുദായങ്ങൾക്കിടയിൽ ഭിന്നിപ്പുണ്ടാക്കാൻ സിനിമ ഉപയോഗിക്കപ്പെടുന്നു എന്ന് വാദിക്കുന്നവരും തമ്മിലുള്ള പോരാട്ടം ഇപ്പോൾ രണ്ടാം ഭാഗത്തിലേക്ക് എത്തിയിരിക്കുകയാണ്.
ഹൈക്കോടതിയുടെ വരാനിരിക്കുന്ന വിധി ചിത്രത്തിന്റെ ഭാവി തീരുമാനിക്കുന്നതിൽ നിർണ്ണായകമാകും. സെൻസർ ബോർഡ് കോടതിയിൽ എന്ത് വിശദീകരണം നൽകും എന്നതിനെ ആശ്രയിച്ചിരിക്കും സിനിമയുടെ പ്രദർശനം.
