സ്റ്റാൻഡിൽ നിന്ന് മണിയടി ശബ്ദം മുഴങ്ങിയാൽ ആക്സിലറേറ്റർ ആഞ്ഞുചവിട്ടുന്ന ഡ്രൈവർ ആശാൻ; മനസ്സും ശരീരവും ദൃഢമാക്കി മണിക്കൂറുകൾ നീണ്ട യാത്ര; ഇതോടെ വിശന്ന് തളർന്നുപോകുന്ന ചില ആളുകളും; ഇനി ആനവണ്ടിയിൽ കയറിയാൽ അതിനെല്ലാം പരിഹാരമുണ്ട്; വരുന്നത് കെഎസ്ആർടിയുടെ 'ഹൈടെക്' യുഗം!! ആ ലോക പ്രശസ്ത ബ്രാൻഡുമായി കൈകോർത്ത് കെഎസ്ആര്ടിസി
തിരുവനന്തപുരം: കേരളത്തിലെ പൊതുഗതാഗത രംഗത്ത് വിപ്ലവകരമായ മാറ്റങ്ങൾ കൊണ്ടുവരുന്നതിന്റെ ഭാഗമായി കെഎസ്ആർടിസി പുതിയൊരു ചുവടുവെപ്പ് കൂടി നടത്തിയിരിക്കുകയാണ്. ദീർഘദൂര യാത്രക്കാർക്ക് ബസിനുള്ളിൽ തന്നെ ഇഷ്ടപ്പെട്ട ഭക്ഷണം ലഭ്യമാക്കുന്നതിനായി പ്രമുഖ ഫാസ്റ്റ് ഫുഡ് ശൃംഖലയായ 'ചിക്കിങ്ങു'മായി കെഎസ്ആർടിസി കൈകോർക്കുന്നു. ഗതാഗത മന്ത്രി കെ.ബി. ഗണേഷ് കുമാർ പ്രഖ്യാപിച്ച ഈ പദ്ധതി, യാത്രക്കാർക്ക് കൂടുതൽ സൗകര്യപ്രദവും ആസ്വാദ്യകരവുമായ യാത്രാനുഭവം നൽകാനാണ് ലക്ഷ്യമിടുന്നത്.
ഈ പുതിയ സംവിധാനം വഴി യാത്രക്കാർക്ക് ബസ് സ്റ്റോപ്പുകളിൽ ഇറങ്ങി ഹോട്ടലുകൾ തേടി നടക്കേണ്ടി വരില്ല. ബസിനുള്ളിൽ സ്ഥാപിച്ചിട്ടുള്ള പ്രത്യേക ക്യുആർ (QR) കോഡ് സ്കാൻ ചെയ്തുകൊണ്ട് യാത്രക്കാർക്ക് തങ്ങൾക്കാവശ്യമുള്ള ഭക്ഷണം ഓർഡർ ചെയ്യാം. ഓർഡർ നൽകുന്ന മുറയ്ക്ക് അടുത്തുള്ള പ്രധാന സ്റ്റോപ്പുകളിൽ ബസ് എത്തുമ്പോൾ ചിക്കിങ് പ്രതിനിധികൾ ഭക്ഷണം നേരിട്ട് ബസിനുള്ളിൽ യാത്രക്കാരന്റെ സീറ്റിലെത്തിക്കും. ഡിജിറ്റൽ പേയ്മെന്റ് സൗകര്യങ്ങളും ഇതിനായി ഒരുക്കിയിട്ടുണ്ട്.
പദ്ധതിയുടെ പ്രാരംഭ ഘട്ടത്തിൽ തിരഞ്ഞെടുത്ത അഞ്ച് വോൾവോ എയർ കണ്ടീഷൻ ബസുകളിലാണ് ഈ സേവനം പരീക്ഷണാടിസ്ഥാനത്തിൽ ആരംഭിക്കുന്നത്. ദീർഘദൂര യാത്രക്കാരുടെ എണ്ണവും അവരുടെ ഭക്ഷണ ആവശ്യങ്ങളും പരിഗണിച്ചാണ് പ്രീമിയം ബസുകളിൽ ആദ്യം ഇത് നടപ്പിലാക്കുന്നത്. ഈ പരീക്ഷണം വിജയകരമാകുന്ന പക്ഷം കൂടുതൽ ബസുകളിലേക്കും കൂടുതൽ ഭക്ഷണ ശൃംഖലകളിലേക്കും പദ്ധതി വ്യാപിപ്പിക്കാനാണ് കെഎസ്ആർടിസി ലക്ഷ്യമിടുന്നത്.
പദ്ധതിയുടെ ഉദ്ഘാടനത്തോടനുബന്ധിച്ച് ആകർഷകമായ ഓഫറുകളും കെഎസ്ആർടിസി പ്രഖ്യാപിച്ചിട്ടുണ്ട്. ഈ സേവനം ഉപയോഗിക്കുന്ന യാത്രക്കാർക്ക് ഭക്ഷണത്തിന് 25 ശതമാനം ഡിസ്കൗണ്ട് ലഭിക്കുമെന്ന് മന്ത്രി അറിയിച്ചു. റെയിൽവേയിൽ ഐആർസിടിസി നടപ്പിലാക്കുന്ന 'ഇ-കാറ്ററിംഗ്' മാതൃകയിലാണ് കേരളത്തിലെ ആനവണ്ടിയിലും ഈ സംവിധാനം വരുന്നത്. യാത്രക്കാർക്ക് പുറത്തുനിന്നുള്ള ഭക്ഷണശാലകളെ അപേക്ഷിച്ച് ന്യായമായ നിരക്കിൽ ഗുണമേന്മയുള്ള ഭക്ഷണം ഉറപ്പാക്കാൻ ഇതിലൂടെ സാധിക്കും.
ഭക്ഷണത്തോടൊപ്പം തന്നെ ബസുകളിൽ മിതമായ നിരക്കിൽ കുടിവെള്ളം ലഭ്യമാക്കാനുള്ള പദ്ധതിയും ഉടൻ ആരംഭിക്കും. ഒരു കുപ്പി വെള്ളം വിൽക്കുമ്പോൾ കണ്ടക്ടർക്കും ഡ്രൈവർക്കും നിശ്ചിത തുക ഇൻസെന്റീവ് നൽകാനും തീരുമാനമായിട്ടുണ്ട്. ഡ്രൈവർമാർക്ക് വെള്ളം സൂക്ഷിക്കാൻ ബസിനുള്ളിൽ പ്രത്യേക ഹോൾഡറുകൾ സ്ഥാപിക്കും. 15 വർഷം പഴക്കമുള്ള സ്വകാര്യ വാഹനങ്ങളുടെ റീ-രജിസ്ട്രേഷൻ ഫീസിൽ സംസ്ഥാന സർക്കാർ 50 ശതമാനം ഇളവ് പ്രഖ്യാപിച്ചു. കേന്ദ്ര സർക്കാർ വലിയ തോതിൽ വർദ്ധിപ്പിച്ച ഫീസിൽ സാധാരണക്കാർക്ക് ആശ്വാസം നൽകാനാണ് സംസ്ഥാനത്തിന്റെ ഈ ഇടപെടൽ.
ബസിനുള്ളിൽ ഭക്ഷണം വിതരണം ചെയ്യുമ്പോൾ ഉണ്ടാകുന്ന പാക്കിംഗ് വേസ്റ്റുകളും മറ്റും കൃത്യമായി ശേഖരിക്കാനും സംസ്കരിക്കാനുമായി പ്രത്യേക വേസ്റ്റ് മാനേജ്മെന്റ് സംവിധാനം കെഎസ്ആർടിസി ഏർപ്പെടുത്തും. ഭക്ഷണം കഴിക്കാനായി ബസ് ദീർഘനേരം ഹോട്ടലുകൾക്ക് മുന്നിൽ നിർത്തുന്നത് ഒഴിവാക്കാം. ഇത് യാത്രാസമയം കുറയ്ക്കാൻ സഹായിക്കും. അംഗീകൃത ഭക്ഷണ ശൃംഖലയായ ചിക്കിങ്ങുമായി സഹകരിക്കുന്നതിലൂടെ ഭക്ഷണത്തിന്റെ ഗുണനിലവാരവും ശുചിത്വവും ഉറപ്പാക്കാം.
ട്രെയിനിലും വിമാനത്തിലും ലഭിക്കുന്നത് പോലുള്ള പ്രീമിയം സൗകര്യം സാധാരണക്കാർക്ക് കെഎസ്ആർടിസിയിൽ ലഭ്യമാകുന്നു. കെഎസ്ആർടിസിയെ ലാഭകരമാക്കുന്നതിനൊപ്പം യാത്രക്കാർക്ക് മികച്ച സേവനം നൽകുക എന്ന ലക്ഷ്യത്തോടെയാണ് ഇത്തരം നൂതന പദ്ധതികൾ ആവിഷ്കരിക്കുന്നത്. കെഎസ്ആർടിസിയുടെ ഈ സ്മാർട്ട് ചുവടുവെപ്പിനെ സോഷ്യൽ മീഡിയയിലും മറ്റും വലിയ ആവേശത്തോടെയാണ് ജനങ്ങൾ സ്വീകരിച്ചിരിക്കുന്നത്. വരും ദിവസങ്ങളിൽ കൂടുതൽ റൂട്ടുകളിലേക്ക് ഈ 'രുചിയേറും യാത്ര' എത്തിയേക്കും.
